Ads by Google Ads by Google

Fautua Lolo i lana Kapeneta ina ia mulimuli i le tulafono


O se va'aiga i le fonotaga a le Kapeneta sa faia i le vaiaso na te’a nei, [ata AF]
ausage@samoanews.com

Na fautuaina e le afioga i le Kovana ia Lolo Matalasi Moliga lana Kapeneta i le fonotaga sa faia i le vaiaso na te’a nei, ina ia mulimuli i le tulafono o lo o fa’atautaia ai galuega a le faigamalo.

 

Na mafua lea fautuaga mai le Ta’ita’i o le atunu’u, ona o ni isi o tulaga fa’aletonu ua maitauina i ni isi o Matagaluega a le malo.

 

O ni isi o ia tulaga fa’aletonu e aofia ai le soona fa’aaoga le tatau e tagata faigaluega o meatotino a le malo e aofia ai ta’avale, o le fa’a faigaluega o tagata faigaluega i auala e le tusa ma le tulafono, atoa ai ma le faia o aitalafu i le igoa o le malo e aunoa ma le silafia e le malo.

 

“O lou tiute, ia e iloa mea uma o loo tutupu i totonu o lau matagaluega. E le sa’o le tutupu o ni fa’aletonu i totonu o lau matagaluega ae e te le o silafia. Aua le tu’u tia’iina lau matagaluega e ta’ita’i e le isi tagata. O oe o le Fa’atonusili, o lou tiute o le ta’ita’i o le matagaluega i taimi uma,” o le saunoaga lea a Lolo i lana Kapeneta.

 

Na fa’atumulia le potu fono a le Ofisa o Fa’atoaga a le malo i Tafuna i le aso Faraile na te’a nei, o afioga i Fa’atonusili o matagaluega eseese, Pulesili o Ofisa Tumaoti a le malo, atoa ai ma sui o ofisa eseese na auai atu e auai i le fonotaga ma le kovana, mo le fa’amautuina o ni isi o fuafuaga mo le manuia o le malo.

 

O le afioga i le ali’i kovana ia Lolo ma le lutena kovana ia Lemanu Peleti Mauga, o i laua ia sa ta’ita’ia le fonotaga.

 

I tulaga o tagata faigaluega, na taua ai e Lolo se tasi o fa’afitauli ua maitauina i le taimi nei, o le taumafai lea o ni isi o matagaluega e filifili atu lava e i latou a latou tagata galuega e galulue i avanoa faigaluega o lo o i ai, e aunoa ma le manatu e filifilia mai e le Matagaluega o Tagata Faigaluega (DHR).

 

Na faailoa e le ali’i kovana i lana kapeneta e fa’apea, afai e i ai ni avanoa faigaluega o lo o i ai i totonu o latou matagaluega, e sili pe a tuu le avanoa i le Ofisa o Tagata Faigaluega latou te faia le filifiliga, ae le o le faia o auala fa’a alatua.

 

“E le sa’o le mea lea o lo o maitauina i le taimi nei o lo o faia e ni isi o matagaluega,” o le saunoaga lea a Lolo. “E lelei ona tatou mulimuli i le tulafono, a i ai ni avanoa faigaluega o loo i ai i lou ofisa, ui ala o le tulafono, fa’asalalau le avanoa ona filifili lea o le tagata ua talafeagai ma agava’a.”

 

“O le fa’afitauli lea ua maitauina, ua nonofo lava isi matagaluega ma la’u a latou tagata i le DHR e fa’a faigaluega. E le sa’o lena gaioiga o lo o faia. E le o ni avanoa faigaluega a lau matagaluega, tu’u le avanoa e fa’atino ai e le DHR le tulafono, ina ia taofia ai le faitioina o tatou e le atunu’u,” o le saunoaga lea a Lolo.

 

O le isi fa’afitauli e pei ona taua e le ali’i kovana, o le tele o pisinisi o lo o faitio atu i le malo, i le tuai lea ona totogi o aitalafu a le malo. Ae iloa mulimuli ane, o aitalafu o lo o tuai na totogi, o aitalafu ia na faia e tagata faigaluega e aunoa ma le iloa e le malo.

 

Mo se fa’ata’ita’iga e pei ona saunoa Lolo, o le tele o aitalafu e o lava tagata faigaluega fai, e ala i le fa’atau mai o ni oloa mai pisinisi, e aunoa ma le uia o ala o le tulafono ina ia silafia ai e le malo.

 

“O lea ua fautuaina pisinisi uma i le atunu’u, soo se aitalafu e fai lava e tagata faigaluega e aunoa ma le silafia e le malo, e le toe totogia e le malo aitalafu ia, ae totogi lava e le tagata faigaluega sa ia faia,” o le saunoaga lea a Lolo.

 

E 2 vaiaso lea ua fa’amoemoe e toesea ai le afioga i le ali’i kovana mai le atunu’u, ona o fonotaga ma isi ta’ita’i o teritori ma setete ua fa’amoeoe e faia i le laumua i Uosigitone i le masina fou.

 

O le fa’aiuga o le masina fou o Novema lea ua fa’atulaga e toe valaauina ai le isi fonotaga a le Kapeneta.