Ads by Google Ads by Google

Fautua Kovana i le Teutupe ma le Paketi auala fa’asao ai tupe malo

ausage@samoanews.com

O le taumafai ina ia fa’asao nai tupe fa’asili o lo o mafai e le malo ona maua mai ina ia fesoasoani ai i le fa’atupeina o ni isi o atina’e a le malo mo le isi 4 tausaga, o se tasi lea o fuafuaga ua aga’i atu le faigamalo a Lolo ma Lemanu e fa’atinoina, e pei ona fa’ailoa e le afioga i le ali’i kovana ia Lolo Matalasi Moliga i le fonotaga a le kapeneta na mavae atu nei.

 

I le fa’aauau ai pea ona fetaia’i o le malo ma fa’afitauli tau tupe i tausaga ta’itasi, na taua ai e Lolo i lana Kapeneta le tatau lea i le malo ona vaavaai toto’a i auala e fa’asao ai nai seleni o lo o maua, ina ia fesoasoani ai i le fa’atupeina o atina’e i totonu o le atunu’u e pei o auala ma faleaoga, e fa’afetaui ai lu’itau i le tuai lea ona maua mai o tupe mai le feterale lea o le a fetaia’i nei ma le malo i le tausaga fou.

 

“E o o mai lava i le taimi nei e le o mafai lava e le malo ona totogi ana aitalafu i le taimi e tatau ona totogi ai, e o o lava fo’i i pili a le malo e tatau ona fa’amuta i le taimi tatau, e le o mafai lava ona tatou fa’atinoina lea tulaga, e mafua mai ona o fa’afitauli tau tupe o lo o fetaia’i pea ma le malo, o le mafua’aga lea e tatau ai ona fa’atonutonu tulaga o tupe fa’aalu a le malo, ina ia mautinoa e mafai ona fa’asao ni isi o seleni laiti o loo maua mai e fa’atupe ai atina’e i le lumana’i”, o le saunoaga lea a Lolo i luma o lana kapeneta.

 

Sa ia toe fautuaina fo’i afioga i Fa’atonusili o Ofisa eseese uma a le malo e aofia ai ma Vaega Tumaoti, ina ia silasila toto’a i le fa’atonutonuina lea o a latou tupe fa’aaoga, ina ia mautinoa e na o manaoga taua lava ma le aoga e ave i ai le fa’amuamua, ae o isi manaoga uma e tatau lava ona fa’atonutonu le fa’atinoina.

 

“E i ai ni isi o Ofisa e le o mana’omia le auai o le aufaigaluega i fonotaga o lo o faia i fafo, o le fautuaga, se’i vagana lava fonotaga taua ma le aoga e tatau ona malaga i ai sui o le ofisa, ae o isi fonotaga e mana’omia tele le malaga atu i ai o le aufaigaluega, e tatau ona taofia malaga ia ae fa’asaosao a tatou tupe e fa’aagaga mo isi manaoga a le malo”, o le fautuaga lea a le ali’i kovana.

 

Na taua e le sui o le Kolisi Tu’ufa’atasi sa fai ma sui o le Pulega atoa le taofia uma o isi malaga a le Kolisi i le Kuata muamua o le tausaga fou tupe lenei ua amata, ona o le naunau ina ia fa’asao le tele o vaega o a latou tupe e fesoasoani ai i le fa’atinoina o isi manaoga i totonu o le Kolisi.

 

“Ua mae’a ona tu’uina atu le fautuaga i matagaluega ta’itasi uma lava i totonu o le Kolisi ina ia taofia le toe fa’a faigaluegaina o ni isi tagata faigaluega fou, e le toe i ai ni malaga e taliaina i le taimi nei e aofia ai malaga e fa’atupe e tupe lotoifale, e le toe i ai fo’i ni si’itaga o totogi o lo o fa’atupe mai i tupe lotoifale e toe taliaina i le taimi nei, ae o le a ave le fa’amuamua i le taumafai lea e totogi aitalafu a le Kolisi ma fa’atino ai isi ana tautua taua”, o le saunoaga lea a le sui o le Kolisi i luma o le Kapeneta.

 

Na taua atili e le sui o le Kolisi e faapea, o ni isi o auala ua vaavaai i ai le Pulega a le Kolisi i le taimi nei, e taumafai e saili auala uma e fa’aulufale atu ai isi fanau aoga fou i totonu, aua o le isi lea auala e maua ai tupe fou mo le Kolisi.

 

“Ua mae’a ona taoto ni isi o fautuaga ua fuafua le pulega a le Kolisi e tu’u atu i le Ofisa o le ali’i kovana, mo ni auala se 3 ua matou filifili e mafai ona maua mai ai ni isi o alagatupe fa’aopoopo mo le Kolisi”, o le saunoaga lea a le faletua sa fai ma sui o le Kolisi i le fonotaga a le Kapeneta, atoa ai ma lona fa’ailoa aloaia i le Kapeneta le sauni o le Komiti Fa’afoe o Aoga Maualuluga e filifili se tasi e avea ma Peresetene fou o le Kolisi i le aoauli o le aso lava lea na fono ai le Kapeneta.

 

E pei ona silafia, o le faletua ia Dr. Rosevonne Makaiwi Pato lea ua tofia nei e avea ma Peresetene fou o le Kolisi Tu’ufa’atasi a Amerika Samoa.

 

Na fa’afetaia e le ali’i kovana fuafuaga fa’ataoto a le Kolisi atoa ai ma le naunau e saili auala uma e fa’asao ai ana tupe fa’aalu, ae fa’aaoga e fa’atino ai isi auaunaga mo fanau a le atunu’u.

 

Saunoa atili Lolo e faapea, e le mafai e le malo ona taumafai e foia na o ia fa’afitauli tau tupe o lo o tutupu mai i Ofisa ta’itasi uma ma vaega eseese o le malo i le taimi nei, se’i vagana ua tula’i mai Ofisa ta’itasi ma tagata uma e fa’atino la latou pito laau, ona fa’atoa mafai lea ona tula’i mai se malo i se tulaga manuia i le lumana’i.