“...o le ala o lo’u tula’i i lenei taeao lau afioga i le Fofoga Fetalai, ona o le tala lea sa sau i le pepa ananafi, e fa’atatau i le iloiloga a le komiti sa faia, ma taua ai fai mai ua a’oa’i e le sui fofoga fetalai le sui lenei o Vaifanua, o se mea e fia fa’asa’o i le ripoti a le fai nusipepa, e le a’oa’ia e se Faipule le sui lenei o Vaifanua, e le mafai ona a’oa’ia e le isi sui faipule le isi sui faipule, o lo’u lena talitonuga ua ala ai ona ou tula’i e fa’asoa so’u lagona”, o le saunoaga lea a le afioga i le ali’i faipule ia Fatulegae’e Palepoi Mauga mai le itumalo o Vaifanua, ina ua maua lona avanoa e tulei saunoa ai i taimi o folafolaga a le maota o sui i le taeao ananafi.

Na saunoa le afioga i le Fofoga Fetalai o le maota o sui, tofa i le Tau Tootoo ia Savali Talavou Ale ma saunoa e lagolago le finagalo o Fatulegae’e, aemaise ai lona talitonuga fa’ata’ita’i, e le ta’ita’ia e tala e tusia i nusipepa galuega a le maota o sui filifilia o itumalo ta’itasi o le atunu’u.

Saunoa Savali e fa’apea, e tele ma anoanoa’i tala o lo o tusia i le nusipepa e le o taitai tutusa ma mataupu o lo o talanoaina i totonu o le maota.

“O le mafua’aga lena e talanoa atu ai ia te outou le aufai nusipepa, fa’afetai o lea e maua le avanoa tou te o mai ai ona o tulaga o fa’asalalauga, a ia tautuana fo’i ma outou, e le avea le sa’olotoga ua outou maua ma auala tou te soona tusia ai mea e le tau ma uiga o mataupu o lo o talanoaina i totonu o le fono, tele naua a outou fa’asalalauga o lo o faia e le taitai tutusa ma fa’aiuga o lo o faia e afioga i faipule ma le fono”, o le saunoaga lea a Savali e aunoa ma lona fa’ailoaina o le igoa o le nusipepa, atoa ai ma ripoti o lo o tu’uaia e le o talafeagai ma fa’aiuga o lo o faia e le fono i le tele o taimi e faia ai ana galuega.

I le mataupu e pei ona fa’asea ai le afioga i le ali’i faipule ia Fatulegae’e, na saunoa ai le Fofoga Fetalai e fa’apea, e leai se tulaga fa’apena e tula’i mai i totonu o le maota, e fa’apea e a’oa’i ai e le isi sui mamalu le isi sui mamalu.

“O la tatou galuega e fai fa’atasi, o a outou finagalo e fa’aalia i soo se taimi, e fa’aali lava i luga o mataupu, ae leai se agaga fa’apena e a’oa’i atu le isi sui i le isi sui mamalu, e oo fo’i ia te a’u, ou te fa’aeteete i soo se taimi ou te talanoa atu ai, ona e maualuga lo tatou va nonofo”, o le saunoaga lea a Savali.

I le fa’aiuga o le saunoaga a Savali, sa ia toe fautuaina ai le “aufai nusipepa” ina ia tautuana a latou ripoti o lo o fa’asalalau, ona e tele mataupu sa talanoaina i le paketi, e le o tutusa ma ripoti sa lomia ma fa’asalalau.

E ui e lei fa’ailoa e le afioga i le fofoga fetalai, fa’apea ai le afioga ia Fatulegae’e le igoa o le nusipepa o lo o fa’atatau i ai a laua saunoaga, peita’i i le lomiga a le Samoa News i le vaiaso nei, na lomia ai se tala i le vaega o le Le Lali e fa’aulutalaina e fa’apea, “A’OA’I SUI FOFOGA FETALAI IA FATULEGAE’E E TAUSISI I LE TULAFONO A LE MALO”.

A o le i tula’i Fatulegae’e e fa’aleo lona finagalo i luma o le maota o sui, sa ia mua’i fa’ailoa i le Samoa News lona le fiafia i lenei ripoti sa tusia i le nusipepa, ma ia taua ai e le i a’oa’ia o ia e se sui fofoga fetalai.

“...ua e le mafaufau tele ma lau tala sa fai i le pepa, e sa i se isi faipule ona a’oa’i i le isi faipule, aua nei e toe pueina so’u ata pe toe fai fo’i sau tala e fa’atatau ia te a’u”, o le saunoaga lea a Fatulegae’e i le Samoa News i fafo o lona Ofisa.

Na fa’ailoa e le Samoa News i le afioga i le ali’i faipule, o upu sa fa’aaoga e le sui fofoga fetalai ia Fetui Fetui Jr i le aso o le iloiloga, na atagia mai ai le a’oa’i o ia ina ia mulimuli ma tausisi i tulafono a le maota, peita’i na saunoa le afioga i le ali’i faipule, “e le i a’oa’ia a’u e le ‘vice’ sa ia fautua mai ia te a’u”.

E tumau pea le Samoa News i lana ripoti sa tusia, o upu sa fa’aaoga e le sui fofoga fetalai i le taimi o lana saunoaga, o le malosi o lona si’ufofoga atoa ai ma ona foliga fa’aalia i lea aso, na atagia mai ai, sa ia a’oa’ia le afioga i le ali’i faipule ia Fatulegae’e e tusa ai o le fa’aletonu sa tula’i mai, lea na mafua ai ona tuai atu molimau mo le iloiloga.

E o o fo’i i le saunoaga a le Fofoga Fetalai e fa’atatau i le ese o ripoti sa lomia i le Samoa News ma fa’aiuga sa talanoaina e le maota o sui aemaise ai iloiloga o le paketi, e tumau fo’i le talitonuga a le Samoa News, o ripoti uma sa lomia ma fa’asalalau, sa fa’avae mai lea i fa’aiuga uma ma felafolafoaiga sa talanoaina i luma o le Fono Faitulafono.