Falepuipui ta’ita’i o le au talepe faleaoga mo le 28 masina

ausage@samoanews.com

O le ali’i e 19 tausaga le matua lea o loo fa’aigoaina e le malo o ia lea o le “ta’ita’i” o le vaega e to’atolu sa latou osofaia ma talepe le Ofisa o le aoga maualuga a Tafuna i le tausaga na te’a nei, ua poloaina e le fa’amasinoga maualuga le taofia o ia i le toese i Tafuna mo le umi e 28 masina, o se tasi lea o tuutuuga o lana nofovaavaaia e 7 tausaga ua tu’uina atu e le fa’amasinoga, ina ua ta’usala o ia i le moliaga mamafa o le gaoi.

 

O le masina o Novema o le tausaga na te’a nei na fa’atulaga e tu’u mai ai le fa’asalaga a le fa’amasinoga maualuga fa’asaga ia Matthew Barja, i le mae’a ai lea ona talia e le fa’amasinoga o se maliliega na sainia e le ua molia ma le itu a le malo, ae talu ai sa fia maua e le fa’amasinoga se fa’amatalaga e uiga i ali’i talavou e to’alua ia sa auai ma Barja i le fa’atinoina o lenei solitulafono pe ua molia e le malo, na mafua ai loa ona toe tolopo fa’atolu le tu’uina mai o se fa’asalaga a le fa’amasinoga e uiga i lenei mataupu.

 

Ae o se itu e fa’anoanoa ai e pei ona taua e le loia a le ua molia ia Mark Ude, ona e oo mai lava i le aso Faraile na te’a nei ina ua lau le fa’asalaga a Barja, e le o manino mai lava i le itu a le malo pe ua faila ni a latou moliaga fa’asaga i ali’i talavou e to’alua sa auai i le fa’atinoina o lenei solitulafono.

 

E 6 moliaga mamafa na ulua’i tu’uaia ai e le malo ia Barja, lea e aofia ai moliaga e tolu o le talepe fale i le tulaga muamua fa’apea ai ma moliaga e 3 o le gaoi, e mafua mai i le fa’alavelave lea na latou osofaia ai ma ni ali’i talavou se to’alua le aoga i Tafuna, i le po o le aso 30 Novema, po o le aso 7 & 8 o Tesema 2015, atoa ai ma le po o le aso 1 & 2 Ianuari 2016, ae i lalo o se maliliega na sainia e le ua molia ma talia e le fa’amasinoga, na tali ioe ai le ua molia i le moliaga mamafa o le gaoi, ae solofua ai loa e le fa’amasinoga isi moliaga na totoe ai i le pepa o tagi sa fa’aulu e le malo.

 

I le tali ioe ai o Barja i le moliaga e pei ona ta’usala ai o ia, sa ia ta’utino ai i le fa’amasinoga e fa’apea, i aso e pei ona taua i le latou maliliega ma le malo, sa latou osofaia ai ma ni ali’i talavou se to’alua le Ofisa o le aoga maualuga a Tafuna ma ulufale fa’amalosi ai i totonu, ma le fa’a e fa’atino ai le solitulafono o le gaoi.

 

A o latou i ai i totonu o le Ofisa o le aoga maualuga, sa ia gaoia ai meatotino e pei o se ato sa i ai iPads e 45, fa’apea ai ma se laptop na ia gaoia mai i totonu o le Ofisa o le polokalame o le JROTC a le aoga. Na ta’utino fo’i le ua molia, sa ia alu ma ave le isi iPad e silia i le $100 lona tau, ma le fa’amoemoe ina ia le mafai ai e le aoga a Tafuna ona latou toe maua lea meatotino.

 

Na fa’atoese le ua molia i luma o le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i lona aiga e fa’aauau lana aoga ma saili ai se isi lumana’i lelei mo ia. Na taua e Barja e fa’apea, o masina e 5 lea na taofia ai o ia i totonu o le falepuipui, ua ia a’oa’oina mai ai se lesona taua ma le aoga mo lona olaga, e le aoga lea ituaiga nofoaga mo ia.

 

Na finau le loia a Barja ia Ude i le fa’amasinoga mo se fa’asalaga fa’anofovaavaaia, ina ia maua ai le avanoa e alu ai le ua molia e lesitala lona igoa i le Kolisi Tu’ufa’atasi mo le fa’aauauina o lana aoga, lea fo’i na lagolagoina e le loia a le malo ia Bob Pickett.

 

A o lei aga’i atu ali’i fa’amasino mo le iloiloina o se fa’asalaga mo Barja, na maua le avanoa latou te iloiloina ai meatotino sa gaoia mai e le ua molia mai le aoga a Tafuna, lea na teuina e Leoleo i le potu e teu ai a latou mea molimau, lea e aofia ai iPads e 6, 2 laptops lapopo’a, 2 laptops laiti, fa’apea ai ma uae’a mo masini uma sa gaoia.

 

E ui na taua e Barja i luma o le fa’amasinoga e 7 iPads sa ia toe fa’afo’i i Leoleo i le taimi na pu’e fa’apagota ai o ia, peita’i na tumau pea le finau a Pickett i luma o le fa’amasinoga ina ua fesiligia poo fea ua ave i ai le isi iPad, e na o le 6 lava iPads na mafai ona teu ma taofi e Leoleo.

 

Saunoa le afioga i le ali’i fa’amasino ia Michael Kruse e fa’apea, o se sipika a se tamaititi aoga na gaoia mai i le taimi o le osofaiga, na mafua ai ona maua e Leoleo fa’amatalaga e fa’atatau i le au talepe fale, ina ua maua e le tamaititi e ana le sipika se tasi o tamaititi o loo ia te ia lana sipika, ma ia logo ai loa Leoleo e uiga i lenei mataupu, ma o se itu e sili ona lelei ai, o le tele o meatotino sa gaoia na mafai ona toe maua.

 

O ni isi o poloaiga o le nofovaavaaia a Barja mo le 7 tausaga ua tu’uina atu e le fa’amasinoga, o lona totogi lea o le salatupe e $1,000, totogi le tupe mo mea sa fa’aleagaina i le aofa’i e $2,210, aua ne’i ona toe solia se tulafono, ma ia tuli fo’i masina e 28 i le toese i Tafuna, peita’i o le taimi lava e fa’amaonia mai ai le mae’a lea ona lesitalaina o ia i le Kolisi Tu’ufa’atasi ma aoga ai, ona tatala loa lea o ia i tua e alu e aoga, ae fa’amalumalu isi masina o loo totoe o lana fa’asalaga fa’a falepuipui.

Comment Here