Ads by Google Ads by Google

Falepuipui se alii ina ua fa’ao’olima i lona Tama

ausage@samoanews.com

E 45 aso lea ua fa’asala ai e le fa’amasinoga fa’aitumalo le ali’i o Sarasopa Sianini e taofia ai i le toese i Tafuna, ina ua fa’amaonia e le fa’amasinoga le moliaga mama o le fa’ao’olima i le tulaga tolu na tu’uaia ai o ia e le malo, e mafua mai i se vevesi na tula’i mai i le va o ia ma lona Tama i le masina o Tesema na te’a nei, ma i’u i lona fa’ao’olima ai i lona Tama.

 

I lalo o se maliliega na sainia e itu e lua ma talia fo’i e le fa’amasinoga, na malie ai Sianini e tali ioe i le moliaga mama o le fa’ao’olima i le tulaga tolu, ae solofua le isi moliaga mama o lo o totoe ai i le pepa o tagi sa fa’aulu e le malo, le moliaga mama o le fa’atupu vevesi i nofoaga faitele.

 

Na talosaga le itu a le malo i le fa’amasinoga ina ia fa’anofovaavaaia Sianini mo le 12 masina, e aofia ai le fa’aaoga o aso e 22 lea ua mae’a ona ia tuliina i le toese e fai ma ana fa’asalaga i lenei mataupu.

 

Na fa’atoese le ua molia i luma o le fa’amasinoga e tusa ai o lana solitulafono sa faia, ma ia talosagaina ai loa se isi avanoa mo ia se’i toe fo’i atu ai i tua i lona aiga. Sa finau fo’i lana loia fautua ia Kate Hannaher ina ia talia le talosaga a le malo mo se fa’asalaga mama e tu’uina atu ia Sianini.

 

O se tasi o itu na fesiligia e le afioga i le ali’i fa’amasino ia Sunia, o le fia malamalama lea o le fa’amasinoga i le mafua’aga e ala ai ona fai ma masani a loia lo latou finau i le fa’amasinoga ina ia avea le umi lea ua mae’a ona tuli e se tagata ua nofosala e fai ma ana fa’asalaga i se solitulafono ua ta’usala ai o ia, e pei o le mataupu a le ua molia.

 

Mai le to’atele o tagata e molia ma fa’asala e le Fa’amasinoga a Amerika Samoa i moliaga o le fa’ao’olima, e seasea i ai ni mataupu fa’apenei e alia’e mai i totonu o le atunu’u, o se tagata e molia i lona fa’ao’olima i sona matua na soifua mai ai i lenei olaga.

 

E lei nofo lelei i le finagalo o le afioga i le ali’i fa’amasino le mataupu e pei ona toe ta’usala ai le ua molia e le fa’amasinoga, aemaise lava le tulaga lea o le a’afia ai o lona Tama.

 

Saunoa Sunia e fa’apea, o le masina o Novema i le tausaga na te’a nei, na ta’usala ai fo’i e le fa’amasinoga ia Sianini i le moliaga o le fa’atupu vevesi i totonu o lona aiga, e mafua mai ina ua tula’i mai se taugaupu i le va o ia ma lona Tama, ae manatu alofa le fa’amasinoga ina ia tu’u i ai se avanoa e fa’anofovaavaaia ai o ia.

 

“E na o le lua masina talu ona fa’anofovaavaaia oe, a o lea ua toe tula’i mai fo’i le mataupu lava lea e tasi, i lou fa’atupuina lea o le vevesi i totonu o lou aiga, e aofia ai ma lona fa’ao’olima lea i lou Tama, ma ua manatu ai le fa’amasinoga, ua le toe i ai se isi avanoa e tatau ona tu’uina atu mo oe”, o le saunoaga lea a Sunia.

 

“O le a le fa’afitauli lea o lo o tula’i mai ia te oe, aisea ua e faia sooa ai lenei mea leaga i lou Tama”, o le fesili fia malamalama lea a Sunia ia Sianini, ae na tali le ua molia, “E mafua mai ona tupu soo le vevesi i le va o a’u ma lo’u Tama, ona e a’afia lo’u Tama i le fa’afitauli o le ita”.

 

E lei uma lelei atu le tali a Sianini ae taotao tua atu i ai ma le isi saunoaga a le ali’i Fa’amasino, “A e fa’afefea oe, e te le a’afia fo’i i le fa’afitauli o le ita, o le a e falepuipui mo le 45 aso”, o le saunoaga fa’ai’u lea a le afioga a Sunia.

 

O le fa’asalaga fa’a falepuipui a Sianini e 45 aso le umi, o le a aofia ai ma aso e 22 lea ua mae’a ona ia tuliina i le toese i Tafuna, talu ona taofia mai o ia i le fa’aiuga o le masina o Tesema na te’a nei, lona uiga, toe 23 aso o lo o totoe o lana fa’asalaga e tuli i le toese i Tafuna.