O le ali’i e 30 tausaga le matua lea e fai to’alua ma le fanau, lea na ta’usala e le fa’amasinoga i lona faia o uiga mataga fa’afeusuaiga i se teineititi e 14 tausaga le matua, ua poloaina e le fa’amasinoga maualuga le fa’asala o ia i le toese i Tafuna mo le umi e 7 tausaga.

E 4 moliaga na ulua’i tu’uaia ai e le malo le ua molia, o ia moliaga e aofia ai moliaga mamafa e 3, e pei o le fai aiga fa’amalosi ma se teineititi laititi, faia o uiga mataga fa’afeusuaiga, fa’apea ai ma lona tagofia o itutinosa o se teineititi e laititi i lalo o le tulafono, atoa ai ma le moliaga mama o lona tu’u atu o le ‘ava malosi i se tagata e laititi i lalo o le tulafono.

Ae i lalo o se maliliega na sainia e le ua molia ma le malo, lea fo’i ua talia e le fa’amasinoga, ua tali ioe ai Sione Ah Chong i le moliaga o lona faia o uiga mataga fa’afeusuaiga i se teineititi, ae solofua ai e le fa’amasinoga isi moliaga o lo o totoe ai i le pepa o tagi sa fa’aulu e le malo.

E pei ona taua i fa’amaumauga a le fa’amasinoga, e to’alua ali’i sa laua faia uiga mataga i le teineititi na a’afia, o le ali’i o Ah Chong, ma le ali’i o Lalopua Lopa, 19 tausaga le matua, lea fo’i ua fa’asala e le fa’amasinoga e taofia i le toese i Tafuna mo le umi e 20 masina.

O le fa’alavelave na tula’i mai i le masina o Tesema 2015, ina ua ave e Ah Chong le teineititi na a’afia i lona fale la te eva ma tafafao ai, ma ia tu’u atu ai loa pia i le teineititi e inu ai ina ia ‘ona, ma ina ua ‘ona le teineititi na ‘aafia, sa faia ai loa e le ua molia uiga mataga fa’afeusuaiga ia te ia.

O lo o taua fo’i i fa’amaumauga a le fa’amasinoga le faia e Lopa o uiga lava fo’i ia e tasi i le teineititi na a’afia, ina ua alu atu o ia i le fale o Ah Chong ma ia vaaia ai le teineititi na a’afia ua ‘ona, ona ia faia lea i ai o uiga mataga fa’afeusuaiga. E pei ona taua i fa’amaumauga a le fa’amasinoga, e fa’atolu ona faia e Lopa uiga mataga i le teineitiiti na a’afia.

Na fa’atoese Ah Chong i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia. Sa ia fa’atoese fo’i i le aiga o le teineititi na a’afia aemaise ai ona matua, ina ia alolofa ma fa’amagalo o ia.

Na maua fo’i le avanoa e molimau ai le to’alua a Ah Chong i luma o le fa’amasinoga, lea na ia talosagaina ai se avanoa e mafai ai ona fa’ataga lona to’alua e faigaluega a o tuli ai lona fa’asalaga, ina ia maua ai se tupe e fesoasoani i le tausiga o ia ma le la fanau.

Na finau le loia a Ah Chong ia Michael White i le fa’amasinoga mo se fa’asalaga mama mo le ua molia, e ui i le matuia o le solitulafono sa ia faia, peita’i i lona talitonuga, atonu ua avea le fa’alavelave ua tupu e mafai ai ona toe a’oaina lona mafaufau i se isi aoaoga fou, peita’i na tete’e le loia a le malo ia Jerard Murphy mo se fa’asalaga mama.

Na taua e Murphy e fa’apea, e matuia tele le gaioiga sa faia e Ah Chong, e le gata i lona ofo atu o le ‘ava malosi i le teineititi e na o le 14 tausaga le matua, ae sa ia toe faia fo’i i ai uiga mataga fa’afeusuaiga, ma ua avea ai lea ma auala e a’afia ai le olaga laititi o lenei teineititi.

E lei umi ona malolo le fa’amasinoga ae fofogaina loa e le afioga i le ali’i fa’amasino sili ia Michael Kruse le faaiuga a le fa’amasinoga, o le taofia lea o Ah Chong i le toese mo le umi e 7 tausaga, o le umi fo’i lea o lo o fa’atulaga mai i le tulafono e fa’asala ai i le falepuipui se tasi e fa’amaonia i lona faia o le moliaga o le faia o uiga mataga fa’afeusuaiga i fanau e laiti i lalo o le tulafono.