E 5 tausaga lea ua fa’asala ai e le fa’amasinoga maualuga le susuga a Lolani Tamalemai e taofia ai i le toese i Tafuna, ina ua ta’usala o ia e le fa’amasinoga i le moliaga mamafa o lona faia o gaioiga fa’afeusuaiga fa’asaga i se teineititi e 9 tausaga le matua i le masina o Aperila 2015.

Na ulua’i tu’uaia e le malo le ua molia i moliaga eseese e aofia ai moliaga mamafa e tolu e pei o lona tagofia o itutinosa o se teineititi e le i fa’aipoipo i ai (sexual abuse 1st degree), faia o amioga fa’asotoma (sodomy), atoa ai ma lona faia o uiga mataga fa’afeusiaiga (sexual assault), atoa ai ma le moliaga mama e tasi o lona faia lea o ni gaioiga e ono lamatia ai le saogalemu o fanau e laiti i lalo o le tulafono.

Ae i lalo o se maliliega na sainia e le ua molia ma le malo, lea fo’i na talia e le fa’amasinoga, na talosaga ai le malo ina ia tali ioe le ua molia i le moliaga o le faia o uiga mataga fa’afeusiaiga (sexual assault), ae solofua ai isi moliaga o lo o totoe i le pepa o tagi sa latou fa’aulu.

I le tali ioe ai o Tamalemai i le moliaga e pei ona ta’usala ai o ia e le fa’amasinoga maualuga, sa ia ta’utino ai e fa’apea, i se taimi o le tausaga e 2015 i Amerika Samoa, sa ia faia ai ni uiga mataga fa’afeusuaiga i le teineititi e 9 tausaga le matua na a’afia, ona o le manatu ina ia fa’amalieina ai lagona tu’inanau sa ia te ia. Sa ia ta’utino fo’i e fa’apea, o le gaioiga sa ia faia sa le tusa lea ma ala o le tulafono.

Ao le i tu’uina atu le fa’asalaga a le fa’amasinoga maualuga fa’asaga ia Tamalemai i le vaiaso na te’a nei, na maua le avanoa e fa’atoese ai o ia i luma o le fa’amasinoga e tusa ai o lana solitulafono sa faia. E le gata sa ia fa’atoese i le malo ma tagatanu’u o Amerika Samoa, ae sa ia fa’atoese fo’i i le aiga o le teineititi na a’afia, ina ia fa’amagalo lana solitulafono sa faia.

Sa ia ta’utino e fa’apea, o le umi lea na taofia ai o ia i le toese talu mai le masina o Aperila 2015, ua ia a’oa’oina ai se lesona taua mo lona olaga, ma ua ia manatu ai ua avea lea ma auala e mafai ai ona toe fuata’i lona mafaufau mai le mea sese sa ia faia.

I le fa’aiuga o lana fa’atoesega, sa ia talosagaina ai le fa’amasingoa mo se isi avanoa mo ia, se’i toe fo’i ai i tua e tautua le aiga, ekalesia ma le nu’u, lea fo’i na lagolagoina e lana loia ia Michael White i lana fa’afinauga mo se fa’asalaga fa’anofovaavaaia.

Na taua e White e fa’apea, e ui i le tulaga matuia o le moliaga e pei ona ta’usala ai Tamalemai, o lea ua manino i fa’amaumauga a le fa’amasinoga o lana ulua’i solitulafono lea i luma o le fa’amasinoga, ma ua lagona fo’i lona salamo moni e tusa ai o le mea sese sa ia faia.

Na finau White ina ia fa’asala le ua molia i se fa’asalaga fa’anofovaavaaia, ina ia mafai ai ona maua le avanoa e toe fo’i ai i tua i lona aiga e fa’aaoga aso o loo totoe o lona ola e fai ai se isi mea aoga mo lona olaga ma lona aiga.

E lei taliaina e le loia a le malo ia Jedidiah Bigelow le talosaga a le itu tete’e mo se fa’asalaga mama, ae sa ia finau i le fa’amasinoga ina ia fa’asala Tamalemai i le fa’asalaga pito sili ona maualuga o lo o fa’atulaga mai e le tulafono, ona o le matuia o le gaioiga sa ia faia.

Na taua e Bigelow e fa’apea, o le tele o gaioiga mataga sa faia e le ua molia aga’i i le teineititi na a’afia, e le gata ua a’afia ai lona mafaufau, ae o le a avea pea fo’i lea ma tulaga e le mafai ona toe galo i lona loto i aso uma o lona olaga.

Na taua atili e Bigelow e fa’apea, ina ua taumafai le latou Ofisa e fa’afeso’ota’i le teineititi na a’afia e tusa ai o lenei mataupu, sa atagia mai ai i lana fa’amatalaga le tele o se a’afiaga o lona mafaufau ua i ai, e mafua mai i uiga mataga ma gaioiga fa’afeusuaiga sa faia e le ua molia ia te ia.

I le fa’aiuga o le fa’afinauga a Bigelow, sa ia toe talosagaina ai ali’i fa’amasino ina ia fa’asala Tamalemai i le fa’asalaga pito sili ona mamafa e pei ona fa’atulaga mai e le tulafono, ina ia mafai ai ona ia a’oa’oina se lesona taua mai le matuia o lana gaioiga sa faia.

Na taua e le afioga i le ali’i fa’amasino ia Elvis P. Patea le matua fa’ateia o le fa’amasinoga ina ua latou iloiloina mau fa’amaonia o lenei mataupu, aemaise ai lava gaioiga mataga sa faia e le ua molia i le teineititi na a’afia.

I le fa’aiuga o le saunoaga a Patea, sa ia fa’asalaina ai loa Tamalemai ina ia taofia i le toese mo le umi e 5 tausaga, o le fa’asalaga pito maulauga lea o lo o fa’atulaga mai e le tulafono. Ua poloaina fo’i o ia ina ia lesitala lona igoa i le lisi o tagata ua ta’usala i le faia o uiga mataga i fanau tama’ita’i, ma ia faia se suega i lona tino ina ia iloa ai poo ia tauaveina le siama o le fa’ama’i o le HIV.