Falepuipui mo le 28 masina le ali’i na ia faia uiga mataga i se teineititi


[ata: archive]
ausage@samoanews.com

E 28 masina lea ua fa’asala ai i le toese i Tafuna e le fa’amasinoga maualuga se ali’i mai Samoa, lea na ta’usala i le moliaga mamafa o lona faia lea o uiga mataga i se teineititi e 15 tausaga le matua.

 

Na ulua’i tu’uaia e le malo le ali’i o Va’afuti Tevita i moliaga mamafa e 2 e aofia ai le moliaga pito sili ona mamafa o lona faiaiga fa’amalosi lea i se teineititi e talavou i lalo o le tulafono, lea e mafai ona fa’asala ai se tasi i le falepuipui mo le umi e amata atu i le 5 tausaga ae le silia i le 15 tausaga le umi, fa’apea ai ma le moliaga mamafa o lona tagofia lea o itutinosa o se teineititi laititi, o se solitulafono e mafai ona fa’asala ai se tasi i le toese mo le umi e le silia i le 5 tausaga.

 

Ae i lalo o se maliliega a Tevita ma le malo lea fo’i na talia e le fa’amasinoga, na malie ai le malo ina ia fa’alaititi le mamafa o le moliaga e tali ioe ai Tevita, ina ia sui le moliaga mamafa o le faiaiga fa’amalosi ma se teineititi laititi (statutory rape) i le moliaga o le faia lea o gaioiga fa’afeusuaiga (sexual assault), lea e mafai ona fa’asala ai se tasi i le toese mo le umi e le silia i le 7 tausaga.

 

I le tali ioe ai o Tevita i le moliaga e pei ona ta’usala ai o ia e le fa’amasinoga, sa ia ta’utino ai i luma o le fa’amasinoga e fa’apea, i se taimi o le masina o Oketopa o le tausaga na te’a nei, sa ia faia ai ni uiga mataga i se teineititi e talavou i lalo o le tulafono, e aofia ai ma lona fai’aiga ia te ia. Sa ia ta’utino atli e fa’apea, o le gaioiga sa ia faia sa le tusa lea ma ala o le tulafono,

 

Na fa’atoese le ua molia e tusa ai o lana solitulafono sa faia, ma ia talosagaina ai se isi avanoa mo ia. Sa ia taua fo’i e fa’apea, o le silia i le 7 masina lea na taofia ai o ia i le toese talu mai le tausaga na te’a nei, ua ia a’oa’oina ai se lesona taua i lona olaga, ma ua ia lagona ai le leaga o lana solitulafono sa faia.

 

Sa ia fa’atoese i le fa’amasinoga fa’apea ai le aiga o le teineititi na a’afia e tusa ai o lana solitulafono, ma ia talosagaina ai se fa’amagaloga mo ia.

 

Na talosaga le loia a Tevita ia Douglas Fiaui i le fa’amasinoga mo se fa’asalaga mama mo le ua molia, ina ia maua ai le avanoa e toe vave fo’i atu ai o ia i lona aiga i Samoa. Na taua e Fiaui e fa’apea, o le fa’anaunauga atoa na mafua ai ona malaga mai Tevita i le teritori, o le sailiina lea o sana galuega e tausi ai lona aiga, lea na galue ai loa o ia o se ave pasi, mulimuli ane tula’i mai le fa’alavelave e pei ona a’afia ai o ia.

 

Talu ai o tulaga fa’aletonu i pepa nofomau a Tevita, na ioe ai le malo ina ia toe fa’afo’i o ia i Samoa pe mae’a ona tuli sana fa’asalaga fa’a falepuipui e tu’uina atu e le malo.

 

Saunoa le afioga i le ali’i fa’amasino sili ia Michael Kruse e fa’apea, o le gaioiga sa faia e le ua molia, e le gata o se gaoiga e sili ona matuia ae o se gaioiga fo’i ua atagia mai ai le lamatia o le saogalemu o le teineititi na a’afia i lana solitulafono.

 

Na fa’ailoa e Kruse ia Tevita le matuia o lana solitulafono sa faia, ona o lea sa molia o ia e le malo i le taimi muamua i le moliaga pito sili ona mamafa o le faiaiga fa’amalosi ma se teineititi laititi, e ui o lea sa malie le malo e toe sui le moliaga e tali ioe ai o ia, peita’i i le silasila a le fa’amasinoga, o se gaioiga matuia sa ia faia.

 

E 7 tausaga na manatu le fa’amasinoga e taofia ai Tevita i le toese, atoa ai ma le totogi o le salatupe e $5,000, peita’i ua malie le fa’amasinoga e fa’amalumalu le fa’asalaga, ae o le a fa’anofovaavaaia o ia mo le 7 tausaga i lalo o tuutuuga e ao ona ia usita’i i ai.

 

O ni isi o ia tuutuuga e aofia ai le taofia o ia i le toese i Tafuna mo le umi e 28 masina, atoa ai ma lona totogiina o le salatupe e $150. Ua poloaina e le fa’amasinoga ia Tevita ina ia ona tuua le teritori ma toe fo’i atu i Samoa, pe afai ae mae’a ona tuli lana fa’asalaga fa’a falepuipui.

 

Afai ae le mafai e le ua molia ona totogi lana salatupe, ua poloaina e le fa’amasinoga le malo ina ia saili lana sponsor e totogi le salatupe.

Comment Here