O le ali’i e 24 tausaga le matua lea ua fa’amaonia e le fa’amasinoga maualuga lona le usitaia o tuutuuga o lana nofovaavaaia sa tuuina atu i le 2014, ua poloaina e le fa’amasinoga lona tuliina o fa’asalaga faa falepuipui sa fa’amalumalu e le fa’amasinoga.

O le vaiaso na te’a nei na tula’i ai Timothy Noa i luma o le fa’amasinoga maualuga, mo le tuuina atu o le fa’aiuga a le fa’amasinoga e tusa ai o lona le usitaia o tuutuuga o lana nofovaavaaia. O ni isi o ia tuutuuga e aofia ai le aua lea ne’i ona toe soli se tulafono, pe na te toe faia fo’i ni sau’aga fa’asaga i lona to’alua.

E le i mana’o le ua molia e fa’aleo sana fa’atoesega i le fa’amsinoga, ina ua tuuina atu le avanoa e fa’atoese ai. Na finau lana loia fautua ia Douglas Fiaui i le fa’amasinoga mo se isi avanoa mo Noa.

Na taua e Fiaui e fa’apea, o Noa o se ali’i talavou e i ai le fa’afitauli o le ita i totonu o le la mafutaga ma lona to’alua. O lona ita atoa ai ma lona le pulea o ana faaiuga fai, lea ua mafua ai ona pagatia lona olaga ma nofo pologa ai i le falepuipui.

Saunoa atili Fiaui i le fa’amasinoga e fa’apea, afai ae talia e le fa’amasinoga le fautuaga a le Ofisa Nofovaavaaia, o le fa’aleaoga lea o le nofovaavaaia ae tuli tausaga o loo faamalumalu e oo atu i le 27 tausaga le umi, o le a tele ni tausaga o le olaga o lenei ali’i o le a ma’imau i le falepuipui. Fai mai Fiaui, ua tele isi tausaga o le olaga o Noa ua mae’a ona ma’imau i le falepuipui, talu mai le taimi lea na loka ai o ia mo le silia i le 3 tausaga.

Sa ia talosaga i le fa’amasinoga, e aua ne’i fa’aleaogaina le nofovaavaaia a Noa, ae toe ave i ai se isi avanoa se tasi e fa’asala ai o ia i se fa’asalaga nofovaavaaia.

Na tete’e le loia a le malo ia Christy Dunn i le fa’afinauga a le itu tete’e, ma ia talosagaina ai loa le fa’amasinoga ina ia talia le fa’afinauga a le ofisa faanofovaavaaia, e ala i le fa’aleaoga o le nofovaavaaia a le ua molia, ae poloaina loa o ia e tuli tausaga e 27 o lo o fa’amalumalu.

E le i umi ona malolo le fa’amasinoga ae tuuina mai loa le fa’aiuga, e talia ai le fautuaga a le ofisa faanofovaavaaia, ina ia faaleaoga le nofovaavaaia ae poloaina loa le tuliina o tausaga o lo o faamalumalu lona tuliina, lea e oo atui le 27 tausaga le umi.

O le masina o Tesema 2012 na loka ai e leoleo ia Noa ma molia i moliaga mamafa eseese, e mafua mai i le fa’alavelave lea na ia faaoolima ai i lona to’alua. Na faailoa e le fafine i leoleo e fa’apea, na fasi mai lava o ia i le itula e 9:00 i le taeao seia oo atu lava i le po. Na ta tu’i e le ua molia ona foliga ma taofi o ia i totonu o le potu ina ia le mafai ai ona alu i fafo.

I le tausaga e 2014, na poloaina ai e le fa’amasinoga ia Noa na te tuliina masina e 28 i le falepuipui, o se tasi lea o tuutuuga o lana nofovaavaaia e 7 tausaga, ina ua ta’usala o ia i moliaga mamafa e 3 e aofia ai le talepe fale i le tulaga lua, taofia faapagota o se tagata, atoa ai ma le faaoolima i le tulaga lua, faapea ai ma le moliaga mama o le faaoolima i le tulaga tolu.

O ni isi o tuutuuga o lana nofovaavaaia sa tuuina atu i le 2014, ia aua ne’i ona toe solia se tulafono pe na te toe sauaina lona to’alua.

O le tausaga e 2016 na toe molia ai fo’i Noa i lona faaoolima i lona to’alua, ma poloaina ai e le Fa’amasinoga o Aiga, Fualaau Fa’asaina ma le ‘Ava malosi (FDA) o ia na te tuliina masina e 12 i le falepuipui, o se tasi lea o tuutuuga o lana nofovaavaaia e 5 tausaga ina ua ta’usala o ia i le moliaga o le fa’aoolima i le tulaga lua.

Talu ai le ta’usala o ia i le faalavelave na tulai mai i le 2016, na faila ai loa e le ofisa faanofovaavaaia le talosaga e faaleaoga ai le nofovaavaaia a Noa, lea sa tuuina atu i le 2014.