Ads by Google Ads by Google

Falepuipui le Tina na ia fa’aaoga fa’agaoi tupe a le ASPA i Aunu’u


[ata: foa'i]
ausage@samoanews.com

O le Tina lea sa galue i le lala o le Ofisa o le Pulega o le Eletise ma le Suavai (ASPA) i Aunu’u, ua fa’asalaina nei o ia i le falepuipui mo le umi e 7 tausaga, ina ua faamaonia e le Fa’amasinoga Maualuga le moliaga na tu’uaia ai o ia e le malo, o lona fa’aaoga fa’agaoi lea o tupe a le ASPA sa tu’uina atu i lalo o lana vaavaaiga i le aofaiga e silia i le $18,000.

 

O le fa’asalaga fa’a falepuipui ua tuuina atu ia Makerita Leituane, o le fa’asalaga e tuli atoa i le toese, e aunoa ma ni isi lava tuutuuga mo se nofovaavaaia, poo se poloaiga na te toe totogiina ai tupe sa ia gaoia mai i le galuega na galue muamua ai.

 

Na ulua’i tuuaia e le malo ia Leituane i moliaga mamafa e 2, le moliaga o le gaoi faapea ai ma le moliaga o lona fa’aaoga fa’agaoi o tupe sa tu’uina atu na te tausi ma vaavaai, ae i lalo o le maliliega na sainia e le ua molia ma le malo, lea fo’i na talia e le fa’amasinoga, na ia tali ioe ai i le moliaga o le ave faagaoi o tupe sa tuuina atu na te vaaia, ae solofua e le fa’amasinoga le moliaga o le gaoi sa totoe ai i le pepa o le tagi.

 

O le moliaga o le ave fa’agaoi o tupe sa tuuina atu i lalo o lana vaavaaiga, o se solitulafono C i le fa’atulagaina o solitulafono mamafa, lea e mafai ona fa’asala ai se tasi i le falepuipui mo le umi e le sili atui  le 7 tausaga, pe faasala i le salatupe e le sili atu i le $5,000, poo le fa’asala fo’i i fa’asalaga uma ia e lua.

 

A o le i tu’uina atu le fa’aiuga a le fa’amasinoga mo Leituane, na fa’ailoa ai e le afioga i le fa’amasino sili ia Michael Kruse, i le loia fautua ia Douglas Fiaui sa tula’i mo le ua molia e fa’apea, e le malamalama le fa’amasinoga i le to’atele o Tina talavou e pei fo’i o Leituane, e fiafia e o e gaoi tupe mai fale faigaluega sa galulue ai, mulimuli ane ona o atu lea ma fetagisi atu i le fa’amasinoga, mo se avanoa e fo’i ai i aiga e tausi ta’ito’alua ma fanau.

 

Na taua e Kruse lona toe manatuaina o se mataupu e foliga tutusa lelei ma le mataupu a Leituane, lea na tula’i mai i Manu’a i ni tausaga ua mavae, lea na mafua ai ona ta’usala se Tina talavou i le moliaga o le ave fa’agaoi o tupe, e mafua mai i lona ave fa’agaoi o le silia i le $90,000 mai le faletupe, ma faia ai loa e le pulega a le ANZ le fa’aiuga e tapunia le latou lala lea, lea ua mafua ai ona le toe i ai se auaunaga tau faletupe i Manu’a i le taimi nei.

 

Saunoa Kruse e fa’apea, o le fa’aiuga na faia e le ANZ i le latou lala i Manu’a, o le fa’aiuga fo’i lena e ono faia e le ASPA i le latou Ofisa i Aunu’u, i le mae’a ai lea o le solitulafono sa faia e le ua molia, ma ua tau vaavaai nei le ASPA i se auala e ao mai ai tupe mai le mamalu o le atunu’u o lo o alala ma nonofo i Aunu’u.

 

A o le i tu’uina atu le talosaga a le ua molia mo se isi avanoa mo ia, na muamua tula’i lona to’alua ma talosaga i le fa’amasinoga mo se avanoa e toe fo’i atu ai le Tina o le aiga i tua, e tausi le la fanau faapea ai le latou Tina matua o lo o fa’amuli mai i le latou fale i Aunu’u.

 

Na taua e le Tama o le aiga i le fa’amasinoga, tulaga faigata na oo i ai le aiga talu mai le 6 masina lea na taofia ai lona to’alua i le falepuipui, ma o ia tulaga faigata ua ia talitonu ai, a leai se Tina i le aiga, e le gata e le maua se fiafia e le fanau ma le Tama ae ua leai fo’i se fa’amoemoega mo le lumana’i.

 

Na taumafai e le Tama ona gagana i se upu i le mafatia o lona loto, a o ia fa’aleo lana talosaga mo se avanoa e toe tatala atu ai lona to’alua i tua.

 

Ina ua maua le avanoa o Leituane e fa’aleo ai lana talosaga, sa muamua fa’atoese i le fa’amasinoga e tusa ai o lona soli o le tulafono, sosoo ai ma lana faatoesega i le Pulega a le ASPA faapea ai le Pulesili ia Utu Abe Malae, ina ia fa’amagalo o ia le tagata faigaluega le fa’amaoni.

 

“Ou te ta’utino atu ua ou lagona le salamo moni e tusa ai o la’u solitulafono sa faia, ou te le toe faia fo’i se isi solitulafono faapenei i le lumana’i. O lo’u taimi muamua lenei i luma o le fa’amasinoga, o lo’u taimi mulimuli fo’i lenei ou te toe tula’i ai i se isi lava solitulafono. Ae ou te talosaga atu ma le loto maualalo fa’amolemole, se avanoa se tasi mo a’u se’i o’u fo’i ai i lo’u aiga e tausi lo’u Tina matua, ma fesoasoani i le aveina o la’u fanau i le aoga e saili ai so latou lumana’i manuia, atoa ai ma le sailiina lea o sa’u galuega e totogi ai la’u sala,” o le talosaga lea a le Tina i le fa’amasinoga.

 

Na talosaga lana loia faitua ia Fiaui mo se fa’asalaga fa’a nofovaavaaia, e aofia ai ma le poloaiga e toe totogi ai le tupe sa ia fa’aaoga fa’asolitulafono mai le ASPA. Saunoa atili Fiaui e fa’apea, afai e tuuina atu se poloaiga e toe totogi ai e le ua molia tupe i le ASPA, ia lava na o le aofaiga e $3,369, pau lea o le aofaiga na ta’utino Leituane i le Ofisa Faanofovaavaaia ma le fa’amasinoga i le taimi o lana maliliega ma le malo sa ia fa’aaoga fa’asolitulafono.

 

Na finau le loia a le malo ia Robert Morris i le fa’amasinoga, ina ia poloa’i le ua molia e totogi atoa le tupe sa ia ave fa’agaoi, le aofaiga e $18,050.

 

O le mataupu lenei na tofu atu i le Ofisa o Leoleo, ina ua fiu le ASPA e fa’atali ni ripoti o tupe ma fa’amaumauga o galuega mai le ofisa i Aunu’u, ma mafua ai loa ona faia se suesuega faapitoa i lenei mataupu.

 

Na faailoa e le ua molia i Leoleo ina ua fesiligia o ia, na talepe e tagata le ofisa i Aunuu ae ave faagaoi meatotino sa i ai e aofia ai ma le tinoitupe e $18,050. Mulimuli ane toe suia le tala a le ua molia i Leoleo ma ia fa’ailoa i ai, sa ia fa’aaoga se vaega o le tupe mo ia lava, ae ua ia sauni fo’i e toe totogi.

 

E leai ma ni fa’amaumauga mai le Ofisa i Aunu’u na maua e le ASPA, e aofia ai fa’amaumauga mo pili sa totogi atu e tagata i a latou pili.