Ads by Google Ads by Google

Falepuipui le Pule o “Le Aute Sports Bar” mo le 90 aso


[ata: archive]
ausage@samoanews.com

I le lata ai i le 2 tausaga o fa’agasolo i luma o le fa’amasinoga maualuga taualumaga o le mataupu sa molia ai e le malo o Amerika Samoa, le Pule o le pisinisi o le “Le Aute Sports Bar” ma ni isi sa taofia fa’atasi mai e Leoleo i le amataga o le 2015, ina ua osofa’i e Leoleo lea nofoaga ma maua i ai fana, pulufana, fualaau fa’asaina, atoa ai ma le anoanoa’i o vaega e umia ma fa’aaoga e tagata latou te tulei ma fa’atau atu fualaau fa’asaina, o le aso Faraile na te’a nei na poloaina ai e le fa’amasinoga le taofia o le pule o lea pisinisi i le toese i Tafuna mo le umi e na o le 90 aso, ina ua ta’usala o ia i le moliaga o le umia fa’asolitulafono o pulufana.

 

Na tumu luma o le laulau a afioga i Fa’amasino i mea na aveese mai e Leoleo mai le nofoaga o le Le Aute, lea na taofia e le malo ma le fa’amoemoe e fesoasoani ai i le fa’amautuina o le latou tagi fa’asaga ia Tumuatasi Lefatia, poo Mama fo’i e pei ona iloa ai e le to’atele, ae talu ai o lea ua talia e le fa’amasinoga le maliliega sa sainia e itu e lua ma le fa’amoemoe e fa’amuta aloaia ai loa lenei mataupu, na poloaina ai loa e le afioga i le ali’i fa’amasino sili ia Michael Kruse le Masela a le fa’amasinoga i le vaiaso na te’a nei, ina ia fa’aleaoga loa mea molimau sa taofia e Leoleo, ina ia tusa ai ma le fautuaga a le tulafono, se’i vagana ai le vaega tupe o le a tu’uina atu i le fa’amasinoga.

 

O mea sa tuuina atu e le malo e aofia ai fana, pulufana, pepa iila ma straw e fa’aaoga e utu ai le pauta o le aisa, o fua e fa’aaoga e fua ai le mamafa o le pauta, atoa ai ma isi lava mea e umia e i latou e tagofia fualaau fa’asaina.

 

I lalo o le maliliega na sainia e Lefatia ma le malo ma talia e le fa’amasinoga, na tali ioe ai le ua molia i lona umia fa’asolitulafono o pulufana o le ituaiga fana o le .22, ma, i le taliina ai e le fa’amasinoga o le maliliega, na talosaga ai loa le malo ina ia solofua moliaga sa totoe ai i le pepa o tagi sa latou fa’aulu, lea e aofia ai ma le moliaga mamafa o le umia fa’asolitulafono o vaega o le pauta fa’asaina o le aisa.

 

A o le i tu’uina atu e le fa’amasinoga lana fa’asalaga fa’asaga ia Lefatia, na fa’ailoa e Kruse i le loia a le malo ia Bob Pickett e fa’apea, o le uiga moni o le upu “umia fa’asolitulafono o fualaau fa’asaina”, e le gata o le tagata sa maua i ai fualaau fa’asaina e ana ia fualaau, ae o ia fo’i sa pulea ma vaavaaia (control) ia fualaau fa’asaina.

 

“E talitonu le fa’amasinoga e le o oe le loia lea na amataina maia lenei mataupu, ae o se tasi lena o vaega e tatau ona silasila toto’a i ai le malo, ona e matua maofa lava i matou i le tele o mea molimau ia ua faulala’i i o matou luma, e foliga mai o se nofoaga autu lea e aga’i i ai tagata e tagofia fualaau fa’asaina (drug den).”

 

E tasi le tausaga i le falepuipui ma le salatupe e $1,000 na manatu le fa’amasinoga e fa’asala ai Lefatia, ae i le mae’a ai ona iloilo e ali’i fa’amasino fa’afinauga a loia atoa ai ma le talosaga a le ua molia, na talia ai loa e le fa’amasinoga le fautuaga a le Ofisa Fa’anofovaavaaia, ina ia fa’amalumalu le tuliina e le ua molia o le fa’asalaga fa’a falepuipui e tasi tausaga i le toese, ae o le a fa’anofovaavaaia o ia mo le 2 tausaga i lalo o poloaiga e ao ona ia usita’i i ai.

 

O ni isi o ia poloaiga e aofia ai lona tuliina o aso e 90 i le toese i Tafuna, amata i le aso Faraile na te’a nei, totogi le salatupe e $1,000, fa’asa ona ia toe soli se tulafono a le malo, fa’asa ona ia toe tagofia fualaau fa’asaina, fana poo isi lava mea e feso’ota’i ma le umia fa’asolitulafono o fualaau fa’asaina, a ia avea o ia ma tagatanu’u e tausisi i tulafono a le malo.

 

O le a mafai fo’i ona su’e e Leoleo poo le Ofisa Fa’anofovaavaaia lona tino ma ana meatotino e aofia ai lona fale, ta’avale ma isi uma meatotino o loo i lalo o lana vaavaaiga, ina ia fa’amaonia na te le o toe tagofia fualaau fa’asaina.

 

O le tama’ita’i loia ia Sharron Rancourt na tula’i mo Lefatia, ae o afioga i ali’i fa’amasino ia Mamea Sala Jr ma Muasau Tasina Tofili na fesoasoani i le fa’amasino sili i le iloiloina o se fa’aiuga o lenei mataupu.