Ads by Google Ads by Google

Falepuipui le isi sui o le “Aute Sports Bar” mo le 20 tausaga


[ata: archive]
ausage@samoanews.com

E 20 tausaga lea ua fa’asala ai e le Fa’amasinoga Maualuga le isi sui o le pisinisi o “Le Aute Sports Bar” i le vaiaso na te’a nei, ina ua fa’amaonia e le fa’amasinoga moliaga sa tu’uaia ai o ia e le malo i ni mataupu eseese se lua

 

I le mataupu numera “HCC 21-15” e pei ona ta’usala ai le ali’i o Mosegi Solia Jr i le moliaga o lona umia fa’asolitulafono o vaega o le fualaau fa’asaina o le aisa, e mafua mai i le mataupu lea na tula’i mai i le tausaga e 2015 ina ua maua e Leoleo ia te ia se pepa iila laititi o lo o i ai vaega o le pauta fa’asaina o le aisa, e 5 tausaga lea ua poloaina e taofia ai o ia i le toese, o le a faitau ai ma masina e 22 lea na taofia mai ai o ia i le toese e fa’atalitali ai se fa’aiuga o lenei mataupu.

 

Ae i le mataupu “HCC 20-10” lea ua ta’usala ai o ia e le fa’amasinoga i lona le usitaia o tuutuuga o lana nofovaavaaia sa tu’uina atu i le 2010, e mafua mai ina ua ta’usala o ia i le moliaga mamafa o lona umia fa’asolitulafono o vaega o le pauta o le aisa ma le fa’amoemoe e tulei ma fa’atau atu i isi tagata, ua poloaina nei e le fa’amasinoga maualuga lona tuliina o tausaga e 15 sa fa’amalumalu o lana nofovaavaaia, o le a faitau ai ma masina e 30 lea sa a taofia ai o ia i le falepuipui i le 2010.

 

Na tau le mafai ona tautala Solia Jr i le taimi na fa’aleo ai lana fa’atoesega i le maligi o ona loimata, ao ia taumafai e fa’amaonia i afioga i ali’i fa’amasino lona matua salamo moni e tusa ai o lana solitulafono sa faia.

 

Na ta’utino ma loimata Solia Jr e fa’apea, i le lata ai i le 22 masina talu ona taofia o ia i totonu o le falepuipui, ua ia a’oa’oina mai ai le tele o lesona aoga e mafai ona fesoasoani i le suiga o lona olaga.

 

Sa ia fa’atoese i le fa’amasinoga e tusa ai o lona le usita’i i le tulafono a le malo, ma ia talosagaina ai loa ali’i fa’amasino mo se fesoasoani i se auala e foia ai le fa’afitauli o loo feagai ma ia, o le a’afia lea i tulaga o fualaau fa’asaina, peita’i na saunoa le afioga i le ali’i fa’amasino ia Elvis P. Patea e fa’apea, na pau le fesoasoani e mafai ona tu’u atu e le fa’amasinoga e fesoasoani ai i le fa’afitauli o loo a’afia ai o ia i fualaau fa’asaina, o le taofia lea o ia i le toese mo se taimi umi ina ia mautinoa e le toe latalata o ia i tagata ma nofoaga o loo fa’atau ma tele ai fualaau fa’asaina.

 

E tasi le molimau na valaau e le ali’i o Solia Jr ma lana loia ia Douglas Fiaui e tau fesoasoani mo se fa’asalaga mama mo le ua molia, o le uncle lea a le ali’i ua molia, lea sa ia fa’ailoa i le fa’amasinoga e fa’apea, talu mai aso a’o laititi Solia Jr, sa ia iloaina ai o ia mai lona aiga, o ia o se tamaititi lelei, usita’i i ona matua toe fa’amoemoeina i soo se mea e fai i totonu o le aiga, peita’i na te lei iloaina mai lea taimi umi, o loo i ai le Tiapolo o loo nofo i totonu ia te ia, lea ua mafua ai ona ia faia solitulafono e pei ona ta’usala ai o ia e le fa’amasinoga.

 

Na fa’ailoa e le uncle i lana molimau e fa’apea, afai ae tafa le finagalo o le faamasinoga e toe tu’u se avanoa ia Solia Jr, o le a ia sauni e ofo atu lana fesoasoani mo ia, ina ia mautinoa e le toe a’afia o ia i fualaau fa’asaina.

 

Na tutu fa’atasi le loia a Solia Jr ia Fiaui ma le loia a le malo ia Gerald Murphy e talosaga i le fa’amasinoga mo se fa’asalaga fa’a nofovaavaaia, peita’i i le tuana’i ai o le silia i le 15 minute o iloilo e ali’i fa’amasino se fa’aiuga, na latou tu’uina mai ai loa le fa’aiuga e sili atu ona mamafa mo le ua molia.

 

Na fa’ailoa e Patea ia Solia Jr e fa’apea, e le o ia o se tamaitiiti laititi e ala ai ona moomia le tau vaavaai o ia e lona uncle, ua matua lona mafaufau na te faia ai filifiliga tonu ma sa’o.

 

Saunoa atili Patea i le ali’i ua molia e fa’apea, sa avatu e le fa’amasinoga ia te ia le avanoa tele ina ua ta’usala o ia i le mataupu muamua, o le umia fa’asolitulafono o vaega o fualaau fa’asaina ma le fa’amoemoe e tulei ma fa’atau atu i isi tagata, ina ua fa’amalumalu lona tuliina o le 15 tausaga i le toese, sei vagana ai masina e 30 na poloaina o ia e tuli, ae talu ai o lea ua toe ta’usala fo’i o ia i le ituaiga solitulafono lava lenei, ua manatu ai le fa’amasinoga ua tatau ona fai se a’oa’iga mo ia.

 

O le fa’asalaga la lea ua tu’uina atu ia Solia Jr, o le a tuli fa’amae’a muamua le umi o loo totoe mai lana fa’asalaga fa’a falepuipui e 15 tausaga, a mae’a, ona fa’atoa tuli loa lea o lana fa’asalaga fou e 5 tausaga.

 

O afioga i ali’i fa’amasino ia Mamea Sala Jr ma Muasau Tasina Tofili na lagolago ia Patea i le iloiloina o le fa’aiuga o lenei mataupu.