Ads by Google Ads by Google

Falepuipui le ali’i talavou i le faia o uiga mataga i se teineititi


[ata: SN]
ausage@samoanews.com

E 28 masina lea ua poloaina e le Fa’amasinoga Maualuga e taofia ai se ali’i talavou i le toese i Tafuna, ina ua ta’usala o ia i le moliaga o le faia o uiga mataga ma le talepe fale i le tulaga lua, e mafua mai i le fa’alavelave lea na ia ulufale fa’amalosi ai i totonu o se fale a se aiga ma le fa’amoemoe na te faia ni uiga mataga i se teineititi e 13 tausaga le matua.

 

E ui e le i fa’atinoina e Rene Finau, 22 tausaga le matua, ni gaioiga mataga fa’asaga i le teineititi na a’afia, peita’i o le si’osi’omaga o le gaioiga sa ia faia, e aofia ai lona ulufale fa’amalosi i totonu o le fale i le po a o fa’asua’ava o ia, ua atagia mai ai le matuia o le gaioiga sa faia.

 

Na fa’atoese Finau i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i lona aiga e tausi ona matua, tautua le Ekalesia fa’apea lona nu’u.

 

Na ia fa’ailoa i ali’i fa’amasino e fa’apea, o masina na taofia ai o ia i le falepuipui, ua ia a’oa’oina mai ai se lesona e sili ona taua mo lona olaga, ma ua ia iloa ai, e le tatau ona ia toe faia lava se isi gaioiga e soli ai soo se tulafono a le malo.

 

Na finau lana loia fautua ia Michael White i le fa’amasinoga, mo se fa’asalaga fa’a nofovaavaaia, ina ia mafai ai ona toe fo’i atu le ua molia i tua i lona aiga e saili sana galuega e tausi ai ona matua, ma fa’atualga se isi suiga fou i lona olaga. Na taua e White le a’afia o Finau i le fa’afitauli o le ‘ava malosi, o le isi lea mafua’aga na ala ai ona ia fa’atinoina le solitulafono e pei ona ta’usala ai o ia i le po na tula’i mai ai le fa’alavelave.

 

E le i tete’e le loia a le malo ia Robert Morris i le fa’afinauga a White mo se fa’asalaga fa’anofovaavaaia mo Finau. Na taua e Morris e fa’apea, e ui e agava’a le ua molia mo se fa’asalaga fa’anofovaavaaia, ae i ai faamatalaga moni lava e fa’atatau i le fa’alavelave sa tupu e ao ona silafia e le fa’amasinoga.

 

Na taua e Morris e fa’apea, sa matua ‘ona lava Finau i le po na tula’i mai ai le fa’alavelave, ina ua ulufale faamalosi i totonu o le fale o le aiga na a’afia, ma aga’i sa’o atu ai i le potu o lo o moe ai le teineititi e 13 tausaga na a’afia ma le fa’amoemoe e faia ai ni uiga mataga ia te ia.

 

Sa ia taua fo’i le i ai o isi tamaiti laiti i totonu o le potu na moe ai le teineititi na a’afia, i le taimi na ulufale fa’asolitulafono atu ai Finau i totonu ma fa’atino le solitulafono. Na avea le pa’i atu o le ua molia i le tino o le teineititi ma itu na ala a’e ai o ia i luga ma ee, ma mafua ai loa ona alu i le atoa le ua molia i fafo.

 

Saunoa le afioga i le ali’i fa’amasino ia Elvis P. Patea e fa’apea, e ui sa ‘ona le ua molia i le taimi na ia fa’atinoina ai le solitulafono, ae le avea lea ma auala e fai ma alofaga i le solitulafono ua fa’atinoina.

 

Na faailoa atili e Patea ia Finau e faapea, e le tatau ona ia toe tagofia le ‘ava malosi poo fualaau fa’asaina i le taimi o lana nofovaavaaia, ae tatau ona saili sana galuega ma fai se suiga i lona olaga mo le lumana’i.

 

Mo le moliaga mamafa o le talepe fale i le tulaga lua, e 7 tausaga lea ua faasala ai Finau i le falepuipui, ae mo le solitulafono mama o le tagofia o itutinosa o se teineititi i le tulaga tolu, e tasi le tausaga lea ua faasala ai o ia i le falepuipui.

 

O le fa’ataunu’uina o lea fa’asalaga o le a fa’amalumalu, ae o le a faanofovaavaaia o ia mo le 7 tausaga i lalo o poloaiga e ao ona ia usita’i i ai. O ni isi o ia tuutuuga e aofia ai lona tuliina o masina e 28 i le toese, aua nei ona toe tagofia le ‘ava malosi poo fualaau faasaina, ma ia aua fo’i ne’i ona toe taumafai e fa’afesootai le teineititi na aafia poo lona aiga i soo se taimi.

 

Ua poloaina fo’i o ia ina ia lesitala lona igoa i le lisi o i latou ua ta’usala i le faia o uiga mataga i fanau laiti, ma ia faia se suega i lona tino e siaki ai poo ia tauaveina le siama o le fa’ama’i o le HIV, e pei ona faatulafonoina i le Tulafono Toe Teuteu a Amerika Samoa.