Ads by Google Ads by Google

Falepuipui le ali’i sa galue Ofisa o Tiute i le 20 masina


[ata: SN]
ausage@samoanews.com

E 20 masina lea ua fa’asala ai e le Fa’amasinoga Maualuga le ali’i sa galue i le Ofisa o Tiute a le malo, o se tasi lea o poloaiga o lana Fa’anofovaavaaia e 5 tausaga, ina ua fa’amaonia le moliaga o lona aumaia fa’asolitulafono i le teritori o vaega o fualaau fa’asaina o le mariuana.

 

Na faatoese le susuga a Titifalaula Siaumau i le Fa’amasinoga Maualuga e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i lona aiga e tausi ona matua aemaise lana fanau. Sa ia taua lona matua salamo e tusa ai o lana solitulafono, lea na mafua ai ona taofia o ia i le falepuipui e fa’atali ai le aso e lau ai lana fa’asalaga.

 

E 2 isi molimau na valaau e le itu a Siaumau mo le tuuina atu o ni fa’amatalaga fa’aopoopo e fa’atatau i le soifua galue o lenei ali’i talavou, ina ia fesoasoani ai i le tau fa’amamaina o se fa’asalaga mo ia.

 

O ia molimau e aofia ai le Tina o lona Tina fa’apea ai lana Faifeau. Na taua e ia molimau i luma o le Fa’amasinoga e fa’apea, o Siaumau o se ali’i na te le tagofia le ‘ava malosi pe ulaula fo’i, o ia fo’i o se ali’i e fiafia e fa’atasi atu i mafutaga a le Ekalesia aemaise ai le Autalavou.

 

Na taua e le Tina o le Tina a le ua molia e fa’apea, e usita’i ma fa’alogo Siaumau i totonu o le aiga, ae atonu o le mafuta atu i ana uo lea ua mafua ai ona a’afia o ia i lenei solitulafono. Na naunau le afioga i le ali’i Fa’amasino Sili ia Michael Kruse e fia iloa atili mai le Tina o le Tina a Siaumau, poo ai uo ia sa ia taua ua mafua ai ona suia le olaga o lana tama ina ua mafuta atu i ai, peita’i na tali fuaitau le Tina, na te le iloaina poo ai uo e masani ona mafuta atu i ai lana tama.

 

Ae na taua e Kruse e fa’apea, o se tasi o itu o lo o matua atugalu ai le Fa’amasinoga, o le vaega lea o lo o taua i totonu o le Ripoti a le Ofisa Faanofovaavaaia. E le i taua e Kruse poo le a lea vaega o loo i totonu o le ripoti. Ae na taua e se molimau fa’atuatuaina i le Samoa News e fa’apea, o lo o aofia ai i totonu o le ripoti le tagata e ana fualaau fa’asaina lea ua mafua ai ona ta’usala Siaumau i lenei solitulafono.

 

O fualaau fa’asaina e pei ona ta’usala ai Siaumau, na aumai fa’anana i totonu o se sipika na aumai i le malaga a le va’alele o le Hawaiian Air i le masina o  Mati 2017, lea e tusa ma le 5 pauna lona mamafa.

 

O ia mariuana o lo o i ai pea lea i le potu suesue a le Vaega Suesue a le Feterale i Amerika (DEA), ma ua fa’amoemoe e tatau ona toe fa’afo’i mai i le atunu’u ona fa’atoa mafai lea ona fa’atamaia ina ia tusa ai ma le tulafono.

 

O le sipika na aumai faanana ai i totonu mariuana, na fa’atuatusi mai lea i le igoa o Felix Penerosa, o se ali’i e faigaluega i le Kamupani La’uuta o le CSL Cargo Service. Na loka e Leoleo ia Penerosa ina ua fa’atoa alia’e lenei mataupu, peita’i mulimuli ane toe tatala i tua ina ua ta’u e Penerosa i Leoleo, e le o ia e ana le sipika, o Siaumau.

 

Na taua atili fo’i e Penerosa i Leoleo e fa’apea, na alu atu Siaumau ma talosaga atu ia te ia mo sana fesoasoani, i lana sipikia mai se tasi o lona aiga i Amerika o lo o fia aumai i le atunu’u. Na faailoa atili e Penerosa i Leoleo, e lei ioe ia Siaumau e fa’atuatusi mai le afifi ia te ia, ae na fa’ateia o ia ina ua faafesootai atu o ia e Leoleo e uiga i lenei mataupu.

 

O isi tuutuuga o le nofovaavaaia a Siaumau, o le totogi lea o le salatupe e $5,000, aua ne’i ona toe solia se tulafono, aua foi nei ona toe tagofia le ava malosi poo fualaau fa’asaina. O le a mafai fo’i ona suesueina lona tino i soo se taimi ina ia iloa ai na te le o tagofia fualaau fa’asaina.

 

O le a matai fo’i e le fa’amasinoga ona iloilo se talosaga e faaulu e lana loia, pe afai e faamaonia ua maua sana galuega e galue tumau ai, i le mae’a ai lea ona ia tuliina o le ulua’i 6 masina o lana fa’asalaga fa’a falepuipui.