Falepuipui le ali’i na ia gaoia silia $1,000 mai lona stepmother

ausage@samoanews.com

O le ali’i talavou lea na ta’usala e le fa’amasinoga maualuga i le moliaga mamafa o le gaoi, e mafua mai i le fa’alavelave lea na ia gaioia ai le silia i le $1,000 mai le teugatupe a lona stepmother, ua poloaina le taofia o ia i le toese mo le umi e 28 masina, o se tasi lea o tuutuuga o lana nofovaavaaia e 7 tausaga.

 

A o le i tu’uina atu le fa’asalaga a le fa’amasinoga maualuga fa’asaga ia Tua Jarret Leilua, na maua le avanoa e fa’atoese ai o ia i luma o le fa’amasinoga e tusa ai o lana solitulafono sa faia, ma ia talosagaina ai se isi avanoa se tasi mo ia, se’i toe fo’i atu ai i tua e saili sana galuega e tausi ai ona matua ua matutua.

 

Sa fa’atoese fa’apitoa fo’i Leilua i ona matua e tusa ai o lona gaoia o la meatotino ma fa’ama’imau solo lo la malosi.

 

“Mom, Dad, aumai se isi avanoa se tasi mo a’u ou te toe fo’i atu ai i lo tatou aiga, saili sa’u galuega ma tausi ai oulua, ma ofo atu lo’u ola o lo o totoe e tautua ai le aiga, nu’u ma le Ekalesia”, o le talosaga lea a Leilua i le fa’amasinoga, a o fa’afofoga mai ai fo’i ona matua sa i totonu o le potu fa’amasino i le taimi na lau ai lana fa’asalaga.

 

Na talosaga le loia a Leilua ia Douglas Fiaui i le fa’amasinoga mo se avanoa e fa’asala ai le ua molia i se fa’asalaga fa’anofovaavaaia, ina ia maua ai le avanoa e toe fo’i atu ai o ia i tua e saili sana galuega e tausi ai lona aiga, ma fa’ailoa suiga o le a ia faia i lona olaga.

 

Na taua atili e Fiaui le salamo fa’amaoni o Leilua mai lana solitulafono sa faia, e atagia mai lea i le tele o taimi la te talatalanoa ai, na te fa’asoa atu ai lava ia te ia ona lagona salamo mai le mea sese sa ia faia i ona matua.

 

E le i tete’e le loia a le malo ia Gerald Murphy i le fa’afinauga a le loia a Leilua, mo se fa’asalaga fa’anofovaavaaia mo le ua molia, atoa ai ma le avanoa e tu’uina atu ia te ia e fo’i atu ai i lona aiga e saili sana galuega e tausi ai ona matua.

 

Na finau atili le ali’i loia ia Murphy e fa’apea, o le taua o le tu’uina atu o se isi avanoa mo Leilua, o le a mafai ai ona toe maua se auala e fa’aleleia ai lona olaga ma alu ese mai ai i totonu o le toese o lo o taofia ai o ia, e le o se nofoaga lelei lea mo lona olaga talavou.

 

A o le i tu’uina mai le fa’asalaga a le fa’amasinoga fa’asaga ia Leilua, na fa’ailoa e le afioga i le Faamasino Sili ia Michael Kruse e faapea, o le mataupu e pei ona ta’usala ai Leilua e le fa’amasinoga, na afua mai ina ua ia gaoia se vaega tupe e tusa ma le $1,500 mai le vaega sa teu ai le teugatupe a lona stepmother, ona fa’aaoga lea e fa’atau ai ona lavalava ma mea’ai.

 

O se tasi o tuutuuga o le maliliega na sainia e Leilua ma le malo lea fo’i na talia e le fa’amasinoga maualuga, o le tali ioe lea o le ua molia i le moliaga mamafa o le gaoi, ae solofua moliaga o le talepe fale ma le tu fua i le fanua poo le fale o le isi aiga, o tu’uaiga e afua mai i le fa’alavelave na tu’uaia ai fo’i o ia i lona osofaia lea o le lotoa ma le maota o le Ekalesia a le Au Paia i Peva’ia’i.

 

O se tasi o itu taua na taua e Kruse e fa’atatau i le mataupu a Leilua, ona o le tele o tagata o lo o molia i le gaoi, e mafua mai i le naunau lea e fa’aaoga tupe e fa’atau ai fualaau fa’asaina, peita’i i le mataupu a le ua molia, e le o taua ai se lagona fa’apena i lenei ali’i talavou, ae sa ia fa’aalu tupe na ia gaoia mai lona stepmother e fa’atau ai ona lavalava atoa ai ma isi mea aoga mo ia lava ma ana uo.

 

E 7 tausaga na manatu le fa’amasinoga e taofia ai Leilua i le falepuipui, peita’i ua fa’amalumalu lona tuliina o lea fa’asalaga, ae ua faanofovaavaaia ai o ia mo le 7 tausaga i lalo o poloaiga e ao ona ia usitaia.

 

O ni isi o ia poloaiga e aofia ai lona toe totogi o le tupe a lona stepmother sa ia gaioia e $1,500, e ala i le saili lea o sana galuega e toe totogi atoa ai lea vaega tupe, ae totogi atu i le Failautusi o le Fa’amasinoga, ona tapena lea e le Failautusi o le siaki e ave i lona stepmother.

 

E 28 masina na te tuliina i le falepuipui, peita’i ua poloaina lona tuliina muamua o le 6 masina, e aofia ai ma le umi na taofia ai o ia i le toese a o fa’agasolo taualumaga o lana mataupu e tusa ma le 4 masina, ona tatala loa lea o ia i tua e alu e saili sana galuega e tausi ai lona aiga ma totogi ai le tupe a lona stepmother.

 

O le aso 15 o le masina lenei o Aokuso e atoa ai le 6 masina, ona tatala ai loa lea o Leilua i tua e alu e saili sana galuega, ae afai e mae’a aso e 60 e le i maua sana galuega, ona ia toe fo’i loa lea i totonu o le toese mo le tuliina fa’amae’a o lana fa’asalaga fa’a falepuipui e 28 masina o lo o totoe.

Comment Here