Falepuipui le ali’i na fa’aoolima i lona tuafafine


[ata: foa'i]
ausage@samoanews.com

E 45 aso lea ua poloaina e le Faamasinoga Faaitumalo e taofia ai le ali’i o Afu Suiaunoa i le toese i Tafuna, e mafua mai i le faalavelave lea na ia faaoolima ai i lona tuafafine, ma mafua ai loa ona faamaonia tuuaiga o lona le usitaia lea o tuutuuga o lana nofovaavaaia sa tuuina atu e le fa’amasinoga.

 

Na faailoa e le afioga i le ali’i Fa’amasino ia Fiti Sunia ia Suiaunoa e faapea, o tuutuuga o lana nofovaavaaia e 24 masina le umi na tuuina atu i le tausaga na te’a nei, ina ua ta’usala o ia i le moliaga mama o le faaoolima i le tulaga tolu, o le fa’asa lea ona ia toe soli se tulafono pe na te toe tagofia fo’i le ‘ava malosi.

 

E 5 masina talu ona amata lana nofovaavaaia ae taofia e leoleo o ia i le masina o Tesema o le tausaga na te’a nei ma tu’uaia i le moliaga o le fa’atupu vevesi i totonu o lona aiga. O lea moliaga na mafua mai ina ua ‘ona atu le ua molia i le latou fale ma ia lu’iina ai lona Tama la te fufusu.

 

Na tatala e le fa’amasinoa ia Suiaunoa ina ua mae’a lana ulua’i iloiloga ia Tesema, ma toe fautuaina ai o ia e aua ne’i ona toe solia se tulafono.

 

E tasi le masina na va ai le faalavelave na ia lu’iina ai lona Tama, ae toe loka fo’i Suiaunia e leoleo i le masina o Fepuari o le tausaga nei lava, ina ua ‘ona atu i le fale ma vevesi ma lona tuafafine, ma i’u ina la fufusu ai e pei ona taua i faamaumauga a le fa’amasinoga.

 

Na taua e le loia a le malo ia Bianca Lherisson i le fa’amasinoga e fa’apea, o le fusuaga na tula’i mai i le va o Suiaunoa ma lona tuafafine, na mafua ai ona manu’a foliga o lona tuafafine ina ua ta tu’i e le ua molia.

 

I le mataupu e pei ona tulai mai i le masina o Tesema o le tausaga na te’a nei, na molia ai Suiaunoa i le moliaga o le faatupu vevesi i totonu o lona aiga, o le moliaga fo’i lea na ia tali ioe ai i luma o le fa’amasinoga i le vaiaso nei.

 

I le mataupu na tula’i mai i le masina o Fepuari o le tausaga nei fo’i, na molia ai Suiaunoa i le moliaga mama o le faaoolima i le tulaga tolu, o le moliaga fo’i lea sa ia tali ioe ai i luma o le fa’amasinoga i le vaiaso nei, i lalo o se maliliega na latou sainia ma le malo ma talia fo’i i le fa’amasinoga.

 

Na faatoese le ua molia i luma o le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia e mafuta atu ai i lona aiga. Sa ia taua e fa’apea, o le sese o lana faaiuga sa faia ua mafua ai ona saisaitia lona olaga. E le i fa’atoese o ia i lona Tama ma lona tuafafine na a’afia i ana gaioiga sa faia.

 

Talu mai le fa’alavelave na tulai mai i le masina o Fepuari, e lei toe tatalaina lava le ua molia i tua, ae na fa’aauau pea ona taofia o ia seia oo mai i le vaiaso nei ina ua lau lana fa’asalaga, ma ua atoa i ai aso e 42 talu ona taofia o ia i le toese.

 

Na talosaga le loia a le ua molia ia Douglas Fiaui ina ia fa’asala le ua molia i se fa’asalaga faanofovaavaaia, e aofia ai ma le umi lea na taofia ai o ia i le toese e avea ma ana faasalaga. Na lagolago ai fo’i le loia a le malo ia Lherisson.

 

E 45 aso lea na poloai e le fa’amasinoga e taofia ai Suiaunoa i le toese i Tafuna, ma o lea fa’asalaga e aofia ai ma aso e 42 na tofia ai o ia. O le itula e 10:00 i le taeao nei, aso Faraile, 6 Aperila lea ua fa’amoemoe e magalo ai o ia.

 

Na faailoa e le afioga i le ali’i Fa’amasino ia Fiti Sunia ia Suiaunoa e fa’apea, o aso e 45 lea ua faasala ai o ia, e mafua mai i lona le usitaia o tuutuuga o lana nofovaavaia e 24 masina na tuuina atu i le 2017.

 

Ae mo le moliaga o le faaoolima i le tulaga tolu e pei ona tausala ai o ia, e 120 aso e loka ai o ia i le toese. O le moliaga o le faatupu vevesi i totonu o lona aiga, e 15 aso e loka ai o ia i le toese. O ia fa’asalaga e lua o le a fa’amalumalu lona tuliina, ae o le a faanofovaavaaia o ia mo le 24 masina i lalo o poloaiga e ao ona ia usita’i i ai.

 

O ni isi o ia poloaiga e aofia ai le fa’asa lea ona ia toe tagofia le ‘ava malosi, fa’asa ona ia toe faatupuina se vevesi i totonu o lona aiga, a ia avea o ia ma tagatanu’u lelei e tausisi i tulafono a le malo. Ua poloaina fo’i o ia na te totogi le salatupe e $100.

Comment Here