Falepuipui le ali’i gaoi mo le 6 masina


[ata: SN]
ausage@samoanews.com

O le ali’i lea na ta’usala e le Fa’amasinoga Fa’aitumalo i le moliaga mama o le gaoi, ua fa’asalaina nei o ia e taofia i le toese i Tafuna mo le 6 masina, o se tasi lea o tuutuuga o lana nofovaavaaia e 12 masina, ina ua faamaonia e le Fa’amasinoga le moliaga o le gaoi sa tu’uaia ai o ia e le malo.

 

E pei ona manino i fa’amaumauga a le Fa’amasinoga, e le o se taimi muamua lea ua tula’i ai Iakopo Siafolau i luma o le Fa’amasinoga, ona o tu’uaiga i solitulafono eseese sa ia fa’atinoina.

 

O le fa’a 5 ai lea ona molia o ia e le malo ma tula’i i luma o le Fa’amasinoga. E fa’a 3 ona molia ma ta’usala o ia i moliaga mama o le fa’atupu vevesi i nofoaga faitele, fa’atasi ona molia i le ave ta’avale ‘ona, ma moliaga o le gaoi e pei ona ta’usala ai o ia i le vaiaso nei.

 

“Na amata mai lava au solitulafono i mea laiti, na amata i le fa’atup misa, sosoo ai ma le fusu, ave ta’avale ‘ona, a o lea ua e fa’asolo atu i le gaoi. O ai na iloa e le o toe mamao ae toe molia mai fo’i oe i se isi solitulafono e sili atu ona mamafa,” o le saunoaga lea a Fiti Sunia ia Siafolau i le taimi na lau ai lana fa’asalaga ananafi.

 

I ulua’i mataupu e 4 a Siafolau ua mae’a ona iloiloina e le Fa’amasinoga, sa tuuina atu ai le poloaiga e auai i aoaoga fa’a faufautua ina ia fa’ailoa atu ai ia te ia le leaga o le ‘ava malosi. O ripoti ua tuuina atu e le Ofisa Faanofovaavaaia i le Fa’amasinoga, o lo o taua ai le mae’a lea ona auai o le ua molia i aoaoga faa faufautua e pei ona taua, ma ua mae’a fo’i ona fa’au’u mai ai o ia i aoaoga uma nei.

 

Na fa’ailoa e Sunia ia Siafolau e fa’apea, e foliga mai o lea ua mae’a ana aoaoga sa fa’atonu o ia e fa’ataunu’u, ma e foliga mai e le o i ai lava se suiga i le fa’afitauli o le ‘ava malosi o lo o a’afia ai o ia.

 

“O lea ua manino mai, e foliga mai e i ai lava le fa’afitauli o le ‘ava malosi ia te oe, ma ua le toe i ai se isi avanoa e te toe aoga ai i nei aoaoga, aua o lea ua uma ona e fa’au’u mai ai, ao lea lava e te a’afia i le fa’afitauli o le ‘ava malosi,” o le saunoaga lea a Sunia.

 

I le mataupu a le ua molia na fa’atoa mae’a atu i ni nai masina e le i mamao atu, na fa’anofovaavaaia ai o ia mo le 12 masina, i lalo o tuutuuga e ao ona ia tuliina aso e 60 i le toese. Peita’i na fa’amalumalu lona tuliina o aso e 60, fuafua lava i lona usitaia o poloaiga a le fa’amasinoga.

 

O lea la ua toe faamaonia le isi ana solitulafono, ma ua poloaina ai loa o ia na te tuliina aso e 60 ia sa fa’amalumalu i le toese, mai lana mataupu o lo o nofovaavaaia ai o ia, e aofia ai ma aso e 51 lea ua mae’a ona ia tuliina i le toese, a o fa’atalitali ai se faaiuga o lana mataupu. Lona uiga, e toe 9 aso o lo o totoe ona mae’a lea o lana 60 aso lea ua faatulaga e tuli.

 

Mo lana mataupu fou e pei ona ta’usala ai o ia i le gaoi, ua faanofovaavaaia fo’i o ia mo le 12 masina i lalo o tuutuuga, e ao ona ia tuliina aso e 120 i le toese i Tafuna. Ua manatu le fa’amasinoga, o le a fa’amalumalu le tuliina e le ua molia o isi aso e 60, ae ua lava aso e 60 na te tuliina i le toese.

 

O le fa’asalaga fou e 60 aso a Siafolau, e fa’atoa tuli pe a mae’a ona tuli lana 60 aso lea na fa’amalumalu mai lana mataupu tuai.

 

Afai ae magalo mai o ia i le tausaga fou, ua faatonu o ia e le fa’amasinoga e alu e saili sana galuega tumau e galue ai. Ua poloaina fo’i o ia e totogi le salatupe e $100 i totonu o le ulua’i 30 aso o lana nofovaavaaia.

Comment Here