O le Tina matua mai le afioaga o Afono lea na tu’uaia i lona fa’aaoga o se oga paipa uga (PVP), e fa’ao’o ai manu’a i le tino o lana granddaughter e 11 tausaga le matua, ua poloaina e le Fa’amasinoga Fa’aitumalo le taofia o ia i le toese mo le umi e 120 aso, o se tasi lea o tuutuuga o lana nofovaavaaia e 24 masina.

O le solitulafono o le fa’aoolima i le tulaga tolu, o se solitulafono A lea i le fa’atulagaina o le solitulafono mama, e mafai ona fa’asala ai se tasi i le toese mo le umi e le silia i le tasi le tausaga, pe fa’asala fo’i i le salatupe e le silia i le $1,000, pe fa’asala fo’i i fa’asalaga uma ia e lua.

I lalo o le maliliega na sainia e Upu Togia ma le malo lea fo’i na talia e le fa’amasinoga, e tali ioe o ia i le moliaga mama o le fa’ao’olima i le tulaga tolu, ae solofua le moliaga mama o le fa’atupu vevesi i totonu o lona aiga o lo o totoe ai i le pepa o le tagi sa fa’aulu e le malo.

O le fa’alavelave e pei ona ta’usala ai e le fa’amasinoga ia Togia, na tula’i mai i le aso 19 Iuni o le tausaga nei, ina ua ripoti e se aiga tuai i Leoleo manu’a sa a’afia ai le tino o le teineititi na a’afia, ma mafua ai loa ona tofu atu lenei mataupu i le Ofisa o Leoleo.

Na taua i fa’amaumauga a le fa’amasinoga le fa’aaoga e le ua molia o se fasi paipa uga ‘pvc’ e sasa ai le tino o lona granddaughter ma i’u ina o o ai manu’a i lona tino, e pei o le uga’oa o lona tino fa’apea ai ma se ta’e i lona ulu.

Na fa’ailoa e Togia i Leoleo le mafua’aga atoa na mafua ai ona ia fa’ao’olima i lona granddaughter, o lona taumafai lea e a’oa’o ma fa’atonu o ia ina ia usita’i ma fa’alogo.

Na talosaga loia a itu e lua i le fa’amasinoga mo se fa’asalaga fa’anofovaavaaia mo le ua molia, e aofia ai le auai o ia i aoga fa’a faufautua ina ia fesoasoani ai i le tulaga o le ita o lo o a’afia ai o ia.

Sa talosagina fo’i lana loia fautua ia Kate Hannaher mo se avanoa e fa’aaoga ai e le fa’amasinoga le umi lea na taofia ai Togia i le toese e fai ma ana fa’asalaga, ae aua ne’i toe tu’uina atu se isi fa’asalaga fa’a falepuipui faaopoopo mo ia.

A o le i tu’uina atu e le afioga i le ali’i Fa’amasino ia Fiti Sunia lana fa’aiuga faasaga ia Togia, e tele ni isi o vaega sa naunau le Fa’amasinoga e fiamalamalama i ai, e le gata o le aofa’i o tagata o lo o nonofo fa’atasi ma Togia i lona aiga, ae o le a fo’i le tulaga ua oo i le teineititi na a’afia i lenei fa’alavelave.

O le ripoti mai le Ofisa o Auaunaga ma Tautua Lautele a le malo, lea na fa’aleo e le loia a le malo i luma o le fa’amasinoga i le taeao ananafi, o lo o taua ai le tulaga lea, e to’a 6 isi tamaiti laiti o lo o i ai fa’atasi i le fale lea o lo o nonofo ai le ua molia ma lona aiga, ae o lona granddaughter na a’afia o lo o i ai pea o ia i lalo o le vaavaaiga a le Ofisa o Auaunaga ma Tautua Lautele, e fa’atali ai le taimi e malaga fa’atasi atu ai ma ona matua i Samoa e nonofo ma fa’amautu ai.

Na taua e Sunia le maofa o le fa’amasinoga i le tulaga sa i ai manu’a na a’afia ai le teineititi na a’afia, ona e atagia mai i ripoti ma fa’amaumauga ua maua e le fa’amasinoga, e le gata sa matua fasi lava e le ua molia o ia, ae o se gaioiga sa fa’aauau pea ona ia faia i se taimi umi.

I le mamao o le nofoaga e i ai le afioaga i Afono, e a’e i mauga ma mamao ese atu mai le vaega o lo o i ai le to’atele o tagata, e talitonu le fa’amasinoga o le isi lea mafua’aga e faigata ai ona iloa e Leoleo ma Ofisa a le malo o lo o fa’amalosia tulafono tulaga o mataupu fa’apenei e a’afia ai fanau laiti.

“Ona o ripoti e pei ona taua, e manatu ai le fa’amasinoga o le amio a le ua molia ua fa’atele ona tupu ae le i iloa lava e le malo”, o le saunoaga lea a Sunia.

“E leai ma se isi o tamaiti o lo o nonofo fa’atasi ma le ua molia na ia fa’ailoaina i Leoleo se fa’amatalaga e uiga i lenei mataupu, se’i vagana ai le aiga tuaoi na ia logoina Leoleo e uiga i manu’a na a’afia ai le teineititi na a’afia”.

“O lau gaioiga sa fai i lau granddaughter e le taliaina e le fa’amasinoga. E leai se tamaititi e tatau ona faia i ai nei ituaiga sauaga. Ua uma le vaitaimi o le salu lima, e le taliaina le fa’aaoga o le paipa PVP. E le o se a’oa’i lau gaioiga sa faia, ae sa matua e sasa lava ma fa’atigaina o ia”.

E 12 masina na manatu le fa’amasinoga e fa’asala ai Togia i le toese, peita’i ua fa’amalumalu lona tuliina o lea fa’asalaga, ae ua fa’anofovaavaaia o ia mo le 24 masina i lalo o poloaiga e ao ona ia usita’i i ai.

O ni isi o ia poloaiga e aofia ai lona tuliina o aso e 120 i le toese, e aofia ai aso e 51 lea na taofia ai o ia i le toese e fa’atali ai le aso e lau ai lana fa’asalaga. Fa’asa ona ia toe soli se tulafono a le malo, a ia avea o ia ma tagata e tausisi i tulafono uma.

Ua poloaina lona auai i ni aoaoga e fesoasoai ai i le ita, ua fa’asa fo’i ona ia tausia fanau a lana fanau i soo se taimi.

“Afai e te le usitaia se poloaiga o poloaiga uma ua tu’u atu e le fa’amasinoga, o le a poloaina loa oe e te tuliina masina o lo o totoe o lau fa’asalaga fa’a falepuipui e 12 masina o lo o fa’amalumalu e le fa’amasinoga”, o le lapataiga mulimuli lea a le fa’amasinoga mo Togia.