E 30 tausaga lea ua fa’asala ai e le Fa’amasinoga Maualuga le ali’i o David Fo’a, e mafua mai ina ua ta’usala o ia i le fa’alavelave lea na ia osofaia ai ma ave fa’agaoi meatotino mai totonu o faleoloa eseese e 9, e ala i lona fa’aaoga o ni a’upega e fa’afefe ai fa’atauoloa ma pule o ia faleoloa.

E 9 moliaga mamafa o le faomea i le tulaga muamua na ulua’i tu’uaia ai e le malo ia Fo’a, ae i lalo o le maliliega sa latou sainia ma le malo ma talia e le fa’ amasinoga, ma malie ai le malo o le a latou toe faia se teuteuga i le tagi sa latou fa’aulu fa’asaga i lenei ali’i.

O le teuteuga na faia e le malo, o le tali ioe lea o Fo’a i le moliaga mamafa e tasi o le faomea i le tulaga muamua, ae o le a suia le mamafa o moliaga e 8 o lo o totoe ai i le pepa o le tagi sa fa’aulu, mai le moliaga mamafa o le faomea i le tulaga i le tulaga muamua i le moliaga mama o le gaoi.

O le moliaga o le faomea i le tulaga muamua, e mafai ona fa’asala ai se tasi i le falepuipui mo le olaga atoa, poo le fa’asala i le isi fa’asalaga fa’a falepuipui, e le itiiti ifo i le 10 tausaga ae le sili atu i le 30 tausaga.

E pei ona taua e le malo i le fa’amatalaga o le tagi ua i luma o le fa’amasinoga, o le va o le aso 28 Novema e oo atu i le aso 4 Tesema 2016, na osofaia ai e Fo’a faleoloa eseese i le itu i Sisifo o le atunu’u, e aofia ai Iliili, Tafuna, Nu’uuli ma Malaeimi. O faleoloa uma na a’afia e pulea ma fa’atautaia e tagata mai Asia.

Na taua e le malo e fa’apea, e 8 faleoloa na fa’atino to’atasi ai lava e Fo’a lana osofaiga, e ala i lona fa’aaogaina o ma’a ma naifi e fa’afefe ai fa’atauoloa ma pule o ia faleoloa, ae fao fa’amalosi ai tupe ma ni isi o oloa e pei o sikaleti ma meaai.

O le faleoloa lona 9 na to’alua ai loa Fo’a ma lona tausoga o Fa’asi’i Auapaau, o se ali’i e 19 tausaga le matua. E sili atu le matuia o le gaioiga sa faia e Fo’a i le osofaiga mulimuli lea, ina ua ia fa’aaogaina se tama’i fana e tu’u i le ulu o le fa’atauoloa e fa’afefe ai o ia, ae fao fa’amalosi e Auapaau le masini tupe sa i ai le $260 i totonu ma la sosola loa ma laua.

E tele masina o pagatia tagata e ana pisinisi na a’afia, i le taumafai lea e saili ni fa’amatalaga e fa’atatau i le tagata poo tagata fo’i sa fa’atinoina lenei osofaiga, e o o lava fo’i i Leoleo, ua fiu i latou e tu’u fesilisili solo i tagata e fa’atatau i nei osofaiga, ae leai lava se isi na te mateia le tupua.

Ina tele ai o masina o tau saili pea ni fa’amatalaga e uiga i tagata sa fa’atinoina lenei osofaiga, na faia ai loa le fa’aiuga a le Ofisa o Leoleo, o le a fa’asalalau i luga o le KVZK-TV ata sa pu’eina mai masini pu’eata a se tasi o faleoloa, lea o lo o fa’ailoa mai ai gaioiga i le taimi o le osofaiga, atonu e mafai e se tasi o le atunu’u ona ia mateia le tagata o lo o i totonu o le ata.

O le taimi na fa’asalalau ai le ata i luga o le KVZK-TV, na matamata ai fo’i ma le ali’i o Auapaau lea sa to’alua ma Fo’a i se tas o osofaiga, ma ia manatu ai loa o le a ia talanoa i Leoleo e fa’ailoa i ai le tagata talepe fale o lo o latou sailia, ma mafua ai loa ona maua Fo’a.

Na fa’atoese le ua molia e tusa ai o lana solitulafono sa faia, ma ia talosagaina ai se isi avanoa e tu’uina atu mo ia, se’i toe fo’i ai i lona aiga e tautua lona Tina, ma fesoasoani i si ona tuafafine o lo o faigaluega e tausi le aiga.

Na taua e le ua molia le mana’omia o ia e lona Tina ina ia toe fo’i atu i tua e saili sana galuega e tausi ai le aiga, ona ua maliu lona Tama sa fa’amoemoe tasi i ai le lumana’i manuia o le aiga.

Na maua fo’i le avanoa o lona Tina ma lona Uncle e talosaga ai i le fa’amasinoga, mo se avanoa e toe fo’i atu ai Fo’a i tua latou te mafuta, ma se’i toe fonofono tulaga ua fa’aletonu o lona olaga.

Na taua e le Tina i lana molimau e fa’apea, sa lelei lava Fo’a i le taimi ao soifua mai le Tama o le aiga, ae o le taimi lava na amata ai ona ma’i le Tama o le aiga i le gasegase o le kanesa seia oo lava ina maliu, o iina na vaaia ai se suiga tele i le olaga o lana tama ulumatua, ma i’u i lona fa’atinoina ai o nei solitulafono matuia.

Na finau le loia a le malo ia Woodrow Pengelly ina ia fa’asalaga Fo’a i le fa’asalaga pito maualuga o lo o fa’atulaga mai e le tulafono, ae na talosaga le loia a Fo’a ia Douglas Fiaui, ua lava tausaga e 10 e loka ai le ua molia i le falepuipui, ae fa’anofovaavaaia o ia i tausaga e 20.

Na saunoa le Fa’amasino Sili ia Michael Kruse e fa’apea, ua maitauina i aso nei le to’atele o tupulaga ua na o le ola fa’asamasamanoa lava e leai se fa’anaunautaiga mo se lumana’i manuia. O le to’atele o nei tupulaga, a le o ni tupulaga mai fafo, o tupulaga fo’i e tupulaga mai i tagata mai fafo ua ulufale mai ma nonofo i le atunu’u.

O le fa’asalaga tuli sa’o e 30 tausaga i le toese e pei ona fa’asala ai e le fa’amasinoga ia Fo’a, ua tuu atu ai e le fa’amasinoga le matafaioi i le Komesina o Leoleo, ina ia fa’atino ona tiute e pei ona fai mai ai le tulafono, i le tausia lelei lea o le tagata pagota, atoa ai ma le tuuina atu o polokalame ma tautua e agava’a mo ia.

O afioga i ali’i fa’amasino lagolago ia Fa’amausili Pomele ma Muasau T. Tofili na lagolagosua i le afioga i le Fa’amasino Sili i le tu’uina atu o lenei fa’aiuga.