O le vaiaso na te’a nei na faila ai e le malo moliaga fa’asaga i ali’i pagota o lo o tu’uaia na sosola ese mai i le falepuipui i Tafuna i ulua’i masina e 2 ua mavae atu.

Mai le to’afa o pagota o loo tu’uaia na sosola i tua, e to’atolu pagota ua molia e le malo, ae o le isi to’atasi e le o manino poo afea e faila ai moliaga fa’asaga ia te ia.

O pagota e to’atolu ua molia e aofia ai Joe Togitogi, Joseph Iosefa Iakopo ma Ryan Pite. O le ali’i pagota e le i faila e le malo moliaga fa’asaga ia te ia o Timata Naea. O loo tu’uaia i latou nei e to’atolu i moliaga e aofia ai le sosola i tua mai le toese i Tafuna, atoa ai ma moliaga o le talepe fale.

E pei ona taua e le malo i le latou tagi, o le moliaga o le sola ese mai i le toese, na afua mai i le taimi lea o loo tuuaia ai i latou na o latou sosola ese mai ai i le falepuipui ao i lalo o le vaavaaiga a le malo. O moliaga o le talepe fale o loo afua mai i ni gaioiga sa tutupu i le taimi ao sosola ese ai i tua, lea e finau mai le malo sa o latou osofaia ai ni fale o ni aiga e ala i le ulufale fa’amalosi i totonu e aunoa ma se fa’atanaga fa’aletulafono.

O le aso Tofi o le vaiaso nei lea ua fa’atulaga e toe tutula’i ai i latou e to’atolu mo a latou ulua’i iloiloga, e iloilo ai e le afioga i le ali’i Fa’amasino ia Fiti Sunia pe lava mau a le malo e lagolago ai moliaga ua faia fa’asaga ia tei latou.

Afai e lava mau a le malo, ona tuuina atu loa lea o a latou mataupu i luma o le Fa’amasinoga Maualuga e fa’aauau ai a latou iloiloga ma le malo.

E pei ona taua i le tagi a le malo, e 2 solaaga eseese o loo tuuaia na auai alii pagota e to’atolu ua molia nei.

O le solaaga muamua na tula’i mai i le aso 13 Ianuari 2018, lea na aofia uma ai i latou e to’atolu ua molia faapea ai ma le alii pagota o Naea. E pei ona taua e le malo, o le ali’i o Naea na muamua lava maua e Leoleo, sosoo ai Togitogi ma Pite na maua i luga o le mauga i Leloaloa, ae o le ali’i o Iakopo na fa’atoa maua i Nuuuli.

O le solaaga lona lua na tula’i mai i le aso 5 Fepuari, lea na sosola ai i tua na o Togitogi ma Iakopo, e ala i lo la ootiina o fa’amalama u’amea o le potu na taofia ai i laua ma sosola ai i tua.

Na tau fai galulue uma se vaega e to’atele o Leoleo i le tau sailiina o alii pagota ia e to’alua, e ala i le faia o poloka i nofoaga eseese o le atunu’u, atoa ai ma le fa’atutu o ta’avale i soo se maga’ala e le gata i Satala, o Fagatogo ae faapea ai fo’i ma Nu’uuli.

O se fa’amatalaga na maua mai e Leoleo mai se tasi o molimau fa’atuatuaina, e fa’apea sa vaaia Iakopo i se vaega o Tualauta, na mafua ai loa ona aga’i atu i ai le sailiga a Leoleo, ma i’u ina maua ai Iakopo ma Togitogi i Fagaima.

O le vaiaso na te’a nei na faatoa tauaao atu ai ia Togitogi, Iakopo ma Pite kopi o a latou tusi saisai mai le Fa’amasinoga e aloaia ai le pu’e fa’apagota o i latou ma molia loa.

E le o se taimi muamua lea ua a’afia ai i latou nei e to’atolu i ni solaaga i totonu o le toese i Tafuna.

O le amataga o le masina nei na fa’asala ai e le Fa’amasinoga Maualuga ia Togitogi na te tuliina le umi e 3 tausaga i le toese, ina ua ta’usala o ia i le moliaga mamafa o le sola ese mai le falepuipui, e mafua mai i le fa’alavelave lea na tula’i mai i le 2016, lea na ia sola ese ai mai le toese i Tafuna ao tuli ai sana fa’asalaga.

O Pite ma Iakopo sa auai fo’i i laua i ni isi o solaaga ua mavae, lea e aofia ai le sola’aga na osofaia ai le lala o le Faletupe o Hawaii i Tafuna, sosoo atu ai ma le fale’aiga o le KFC ma le Pizza Hut i Tafuna lava.