Faila moliaga fa’asaga i le tama’ita’i sa galue Falemeli


[ata: archive]
ausage@samoanews.com

O le vaiaso na te’a nei na fa’atoa faila ai e le malo le moliaga mama e tasi fa’asaga i le tama’ita’i faigaluega o le Ofisa o Tiute lea na tu’uaia i fualaau fa’asaina lea na aumai fa’anana i totonu o se pusameli i le amataga o le tausaga nei, i le silia ai lea i le 4 masina talu ona tula’i mai lenei fa’alavelave i le atunu’u.

 

O le aso Faraile na te’a nei na tula’i ai le tama’ita’i ia Chevonne Lafaele i luma o le fa’amasinoga fa’aitumalo ma ia teena le moliaga mama e tasi o le fesoasoani lea i se si tagata i le umiaina o fualaau fa’asaina o le aisa, e mafua mai i le fa’alavelave lea na tula’i mai i le aso 10 Ianuari 2017, lea na la malilie ai ma se isi tagata na te taliaina se afifi mai le pusa meli o le Falemeli a le malo i le atunu’u, i le mae’a ai lea ona ia iloaina o lo o i ai i totonu o le afifi vaega o le pauta fa’asaina o le aisa, ma o le solitulafono o le vaega D lea i le fa’atulagaina o solitulafono mamafa, ae fa’asalaina i se fa’asalaga mama i le umi e le silia i le tasi le tausaga i le toetse, pe fa’asala i le salatupe e le silia i le $1,000, i lalo o le Ulutala 46.3411 (4) o le Tulafono Toe Teuteuina a Amerika Samoa.

 

O le mataupu lenei na tofu atu i le Vaega e Su’esu’eina Fualaau Fa’asaina a le Ofisa o Leoleo, ina ua logo e sui o le Ofisa o Tiute se mataupu e fa’atatau i se afifi sa aumai i le pusa meli sa i ai ni tama’i tagata pepa se 4 i totonu o lo o i ai vaega o fualaau fa’asaina, lea na masalomia o le tama’ita’i faigaluega o le Ofisa o Tiute ia Lafaele na ia alu atu ma aveese lea afifi mai le vaega sa tu’u fa’apitoa i ai e sui o le Ofisa o Tiute, ma tofia ai loa le ali’i Leoleo su’esu’e ia Det. Ioane Paselio na te su’esu’eina lenei mataupu.

 

Na taua i fa’amaumauga a le fa’amasinoga e fa’apea, a o fa’agasolo siaki masani a ali’i Ofisa o le Tiute i le nofoaga o lo o aumai ai uta fa’amomoli i le Falemeli i Fagatogo, sa fa’afuase’i ai ona fa’ailoa mai e le ta’ifau su’esu’e ia K-9 Critter se fa’ailoilo i ali’i Ofisa o le Tiute e iloa ai, e i ai le afifi ua masalomia le i ai o vaega o fualaau fa’asaina i totonu.

 

Na siaki e ali’i Ofisa o le Tiute le afifi ma iloa ai, o le afifi o lo o fa’atuatusi mai ia Chevonne Lafaele, Pusa Meli 6283 lea ua masalomia e le ta’ifau su’esu’e, ona latou tu’ueseina loa lea o le afifi lea i vaega fa’apitoa i totonu o le Falemeli e fa’atali ai le tagata e alu atu e piki le afifi.

 

Pe tusa o le tuana’i ai o le itula talu ona mae’a le taimi na maua ai le afifi ma tu’u ese, na fa’ateia ai ali’i Ofisa o le Tiute ina ua toe fo’i atu i totonu o le Falemai mai le silia ai i le itula o toesea, na iloa ai ua aveese e le tagata le afifi mai le vaega sa tu’u ai ae ave ua fa’ata’atia i le vaega o lo o i ai uta o fa’amomoli o lo o fa’atali le mamalu o le atunu’u mo le pikiina, o lea na logoina ai loa le Pulea o le Ofisa o le Falemeli ma fa’ailoa i ai, o le tama’ita’i faigaluega ia Lafaele lea ua ia avesea le afifi o lo o masalomia le i ai o fualaau fa’asaina i totonu ma tu’u i le isi itu o lo o i ai uta a le atunu’u lautele.

 

Ina ua tatala e Leoleo le afifi, sa maua i ai ni isi afifi laiti se 4 i totonu. O isi afifi e 2 o lo o i ai vaega o le pauta fa’asaina o le aisa, ae o isi afifi e 2 sa maua i ai lau mamago o le laau fa’asaina o le mariuana. Sa faia i ai su’ega ma fa’amaonia ai o aisa ma mariuana sa i totonu o le afifi lea na fa’atuatusi mai ia Lafaele.

 

Na fa’ailoa e Lafaele i Leoleo ina ua fesiligia o ia e uiga i le afifi sa fa’atuatusi mai i lona igoa e fa’apea, sa la feiloa’i ma se tagata e igoa ia “Lisa Lafaele” i luga o le “Facebook”, ma ia malie ai loa na te taliaina se afifi o le a lafo mai e le tagata lea i Amerika Samoa mo lana fanau. Na taua atili e Lafaele i Leoleo e fa’apea, na te le iloaina ia Lisa Lafaele, ae sa mafai lava ona la fesootai i luga o le Facebook, o isi fo’i taimi la te talanoa ai i luga o le telefoni, ma o Lisa Lafaele e nofo i se vaega o Hawaii.

 

Ao fa’agasolo le talanoaga a Lafaele ma Leoleo mo le su’esu’eina o lenei mataupu, sa fa’afuase’i ona tatagi le telefoni a Lafaele, e atagia mai ai e i ai le feau lea ua lafo mai e le tagata i lana “Facebook”, ma fesili mai ai le tagata ia Lafaele poo lelei mea uma, ae sa tali atu i ai le Leoleo lea ua ia taulimaina le telefoni, “ioe”, ona fa’aauau ai lava lea o le talanoaga i le va o le tagata lea ma le Leoleo i luga o le Facebook a Lafaele.

 

Na fa’ailoa atili e le ua molia i Leoleo e fa’apea, o le tagata o loo fesoota’i mai, o ia tonu lea o loo fuafua na te momoli i ai le afifi sa lafo mai ia Lisa, ma faia ai loa le tonu o le a aga’i atu Leoleo ma le ua molia e feiloa’i ma le tagata lea i se nofoaga i Tafuna mo le momoliina atu i ai o le afifi.

 

Na taunu’u le ua molia ma Leoleo i le nofoaga sa fa’atulaga e feiloa’i ai ma le tagata mo le pikiina o le afifi, peita’i o fetusiaiga lava a le tagata lea ma Leoleo i luga o le Facebook a le ua molia, na i’u ai ina masalomia e le tagata lea ua i ai le fa’aletonu ua tupu, ma ia toe tusi mai ai loa i le Facebook a le ua molia ma fa’ailoa mai ai, la te toe feiloa’i i se isi taimi ona ua ese lona lagona e tusa ai o le la fuafuaga i le taimi lea, ma vaaia ai loa e Leoleo le toe aga’i ese atu o le ta’avale a le tagata lea sa paka i luma o le faleoloa lea sa paka ai fo’i le la ta’avale.

 

E lei mafai e Leoleo ona latou fa’ailoaina isi fa’amatalaga e fa’atatau i le tagata na fuafua na te pikiina le afifi, ona o puipuiga lava ia latou su’esu’ega o lo o fa’agasolo i lenei mataupu.

 

O le tuana’i ai o le vaiaso atoa talu ona tula’i mai le tulaga lea, na toe fesiligia ai loa e Leoleo ia Lafaele i le aso 17 Ianuari, pe sa toe taumafai se tasi e fa’afesoota’i atu o ia e tusa ai o le afifi, ae na tali le ua molia e leai.

 

O lo o tumau pea tuutuuga o lo o tatala ai Lafaele i tua e fa’atali ai le aso lea ua fa’atulaga e toe valaau ai lana mataupu. O le tama’ita’i loia ia Sharron Rancourt o lo o tula’i mo Lafaele, ae o le ali’i loia ia Woodrow Pengelly o lo o tula’i mo le malo, ma le afioga i le ali’i fa’amasino ia Fiti Sunia o lo o ia fa’atautaia taualumaga o lenei mataupu.

Comment Here