Ads by Google Ads by Google

Faila le isi talosaga malo fa’asaga i le mataupu a Thomas Siaumau

ausage@samoanews.com

O le vaiaso na te’a nei na faila ai fo’i e le malo le isi a latou talosaga i luma o le fa’amasinoga maualuga, fa’asaga i le mataupu a le ali’i o  Thomas Siaumau, lea o lo o tu’uaia i le fa’alavelave lea na tafana ai se ta’avale a Leoleo i tua o le nofoaga o loo i ai le Malae Baseball i Tafuna i le masina o Tesema o le tausaga na te’a nei.

 

O le alii loia ia Woodrow Pengelly o lo o tula’i mo le malo i lenei mataupu, ae o le ali’i ia William Olson o loo tula’i mo Siaumau.

 

O le talosaga e pei ona finauina e le ali’i loia ia Pengelly i le vaiaso na te’a nei, o lo o talosagaina ai le fa’amasinoga mo sana poloaiga e fa’ateletelegese ai le vave fa’alauiloaina o igoa o molimau a le malo mo le mataupu a Siaumau, ona o puipuiga i lo latou saogalemu.

 

Na taua e Pengelly i lana fa’afinauga e fa’apea, o lo o i ai Tulafono ma Ta’iala e lima ta’ita’iina ai galuega tau fa’amasinoga, o lo o i ai fo’i tulafono e mafai ai ona puipuia le vave fa’alauiloaina o igoa o molimau a le malo.

 

E le i taua e Pengelly pe to’afia molimau a le malo ua fa’amoemoe e valaau i le taimi o le mataupu a Siaumau.

 

O le saogalemu o molimau a le malo, o le autu atoa lea o le talosaga a le malo. Na taua e Pengelly e fa’apea, afai ae vave fa’alauiloa igoa ma fa’amatalaga uma e uiga i molimau a le malo, e ono i ai se a’afiaga o i latou e tula’i mai.

 

Na taua e le loia a le malo e fa’apea, o le tiute o le malo o le puipui lea o a latou molimau ina ia mautinoa e malupuipuia lo latou saogalemu.

 

E le i nofo lelei i le afioga i le Fa’amasino Sili le talosaga a le malo. Saunoa Michael Kruse e faapea, e le tatau i le malo le na ona faila o a latou talosaga e fa’avae i luga o manatu le mautonu, poo le popole fo’i ina ne’i finau le loia a le itu tete’e ina ia vave fa’alauiloa fa’amatalaga e fa’atatau i a latou molimau.

 

“E le tatau ona fa’avaeina la outou talosaga i luga o lagona le mautonu, ae tatau ona aumai ni manatu ‘anoa ma le taua ina ia faigofie ai ona sufi lagona o le fa’amasinoga ma ua’i atu o matou loto i la outou talosaga”, o le saunoaga lea a Kruse i le loia a le malo.

 

Na fa’ailoa e Kruse ia Pengelly e fa’apea, o se tasi o itu o lo o molimauina pea e le fa’amasinoga le fai ma masani a le malo, o le latou ave atoa lea o le faila o loo i ai fa’amaumauga fa’amaonia e fa’atatau i ni mataupu i le itu tete’e, e aunoa ma so latou toe manatunatu te isi i fa’amaumauga ua latou tuuina atu i ai.

 

“Aisea ua outou naunau mai ai ina ia puipuia fa’amatalaga uma e fa’atatau i molimau a le malo i lenei mataupu, ae ua fai ma a outou masani le maua loa o mau fa’amaonia o mataupu eseese ona outou ave atoa lea i le itu tete’e”, o le fesili lea a Kruse ia Pengelly. E le i tali le ali’i loia ae sa na ona nofo lava.

 

Sa toe fesili Kruse, “O fea tonu lava le itu lea e fa’avae mai ai le talosaga a le malo. O fa’avae i luga o ni itu ‘anoa poo fa’avae i luga o manatu foi lele, e popole ina ne’i fesili mai le itu tete’e ae sili ia le fa’ailoa atu loa i le taimi lenei”.

 

Na tali Pengelly e fa’apea, o le talosaga a le malo o loo fa’avae lea i luga o le talitonuga, o le tiute o le malo o le puipuia lea o le saogalemu o tagata o lo o molimau.

 

Na fautuaina e Kruse le loia a le malo ina ia toe fa’aupu lelei le talosaga, ma avatu ni manatu ‘anoa e lagolago ai. Sa ia taua atili fo’i e fa’apea, afai o le auala lea e fa’atupu atu ai le talosaga, e le o mautinoa la e le fa’amasinoga poo i ai se vaega latou te le o malamalama i ai.

 

O Siaumau o loo tuuaia e le malo i moliaga eseese e 9, lea e aofia ai moliaga mamafa e 6 e aofia ai le fa’aoolima ma le fa’aaoga fa’asolitulafono o se aupega. O lo o taofia pea o ia i le toese e aunoa ma se tupe e tatala ai i tua.