Ads by Google Ads by Google

Faila e le malo moliaga fa’asaga i ali’i Leoleo Sinia e to’alua


[ata: SN]
ausage@samoanews.com

O le aso Gafua o le vaiaso nei na faila ai e le malo o Amerika Samoa la latou tagi fa’asaga i ali’i Leoleo Sinia o le Matagaluega o le Puipuiga o le Saogalemu Lautele, e mafua mai i le mataupu lea na tu’uaia ai i laua i le faia o amioga e le talafeagai i ni tama’it’i Leoleo se toalua.

 

Ua molia nei e le malo ia Lt. Siaosi Aiono ma Emanuele Lito i le moliaga o le faaoolima i le tulaga tolu, o se moliaga mama e mafai ona fa’asala ai se tasi i le toese mo le umi e le silia i le 15 aso, pe faasala i le salatupe e le silia i le $300.

 

O le itula e 9:00 i le taeao o le aso 25 Me, lea ua fa’atulaga e le Fa’amasinoga Fa’aitumalo e tatau ona tutula’i ai Aiono ma Lito i luma o le Fa’amasinoga, e pei ona taua i le poloaiga e afua mai i le tusi samania ua mae’a ona sainia e le aifoga i le ali’i fa’amasino ia Fiti Sunia.

 

O le mae’a ai ona faila e le malo o le latou tagi fa’asaga ia Aiono ma Lito, na aga’i atu ai loa ali’i Leoleo sa latou suesueina lenei mataupu ma tauaao atu le kopi o le tagi tusitusia a le malo ia Lito.

 

E le i mafai ona tauaoina atu se kopi o le tagi tusitusia a le malo ia Aiono, ona o le aso Sa na te’a nei na tuua ai e ia le atunu’u ae malaga atu i Ausetalia. O le vaiaso fo’i na te’a nei na fa’amaonia mai ai e le Ofisa o Leoleo, le fa’amavae aloaia lea o Aiono mai lana galuega Fa’a Leoleo ua tele tausaga o galue ai o ia.

 

O moliaga ua faia fa’asaga ia Aiono ma Lito, na afua mai i mataupu e pei ona vavao ai le to’atele, ona o tu’uaiga i le faia o ni gaioiga le talafeagai fa’asaga i ni tama’ita’i Leoleo.

 

O le mataupu fa’asaga ia Aiono na tula’i mai i le masina o Aperila o le masina nei, ae o le mataupu fa’asaga ia Lito na alia’e mai i le masina o Iuni o le tausaga na te’a nei.

 

Na maua le avanoa e fesiligia ai e le Samoa News ali’i Leoleo uma ia e to’alua e tusa ai o lenei mataupu i le masina o Aperila na te’a nei.

 

Na teena e Aiono tu’uaiga i lona faia o amioga le talafeagai i le tama’ita’i Leoleo, ae sa ia ioeina lona taumafai e taalo atu ia te ia.

 

“O le mea moni lava ia e leai se mea na tupu. O tulaga lava o ta’aloga ma ulaga ae leai lava se mea na tupu. O ta’aloga masani lava, atonu fo’i e te silafia mea faapea i le va o tagata faigaluega, mo ta’aloga lava e tutupu ae le o ni mea moni”, o le saunoaga lea a Aiono i le Samoa News.

 

Ina ua fesiligia Aiono, afai e le moni tu’uaiga fa’asaga ia te ia, lona uiga e le talafeagai le faaiuga a le Komesina ua faia fa’asaga ia te ia, na tali le Ta’ita’i leoleo, “o le fa’aiuga lava lena a le Komesina. O le a lava le mea ua oo i ai o le mea lava lena. O le a fo’i le faaiuga a le Komesina ua aumai mo a’u, ou te usita’i fo’i i le tulaga ua taoto ai le finagalo o le Komesina”.

 

E le o se taimi muamua lea ua aafia ai Aiono i le Tulafono. I ni tausaga ua mavae, na ta’usala ai e le afioga i le ali’i Fa’amasino ia John L. Ward II ia Aiono i le moliaga o le faaoolima i le tulaga tolu, ma poloaina ai le taofia o ia i le falepuipui mo le 30 aso, o se tasi lea o tuutuuga o lana nofovaavaaia e tasi le tausaga.

 

Na ta’usala e le fa’amasinoga Aiono i lona faaoolima i se ali’i ave pasi i luma o le StarKist Samoa i Atuu ao faia lana toniga Leoleo.

 

MATAUPU FA’ASAGA IA LITO

 

Ina ua fesiligia e le Samoa News ia Lito e uiga i lenei mataupu, sa ia teena ai lona faia o ni uiga le talafeagai fa’asaga i le tama’ita’i leoleo, ae sa ia ioeina lona taumafai e taalo atu ia te ia.

 

Na taua e Lito i le Samoa News e fa’apea, ua uma ona ia faatoese i le tama’ita’i leoleo na a’afia, o ona matua, atoa ai fo’i ma le Komesina e tusa ai o le mataupu na tula’i mai, ma ua latou taliaina fo’i lana fa’atoesega.

 

Ina ua fesiligia o ia pe moni sa ia tagofia itutinosa o le tama’ita’i leoleo, sa ia taua ai e faapea, sa ia pa’i atu i le tauau ae le o mea sa mafaufauina. Sa ia taua atili fo’i e fa’apea, sa ia taalo lava i le tama’ita’i leoleo e pei lava o tulaga masani i galuega.

 

Sa ia ta’utino e fa’apea, ua lagona lona popole ina ne’i alia’e lenei mataupu ona ta’uvalea ai lea o lona to’alua ma lana fanau.

 

Na taua e ni isi o Leoleo sinia i le Samoa News e fa’apea, ua tatau i le Koemesina ona faia sana fa’aiuga atamai e tusa ai o mataupu ua alia’e mai i le matagaluega i lalo o lana ta’ita’iga.