E ese lava le soifuaga o loo soifua ma ola ai tagatanu’u o Manu’a i le taimi nei, ma le soifuaga lea o lo o soifua ma ola ai tagata i le motu o Tutuila i le taimi nei, e pei ona fa’aalia e le to’atele o tagata Manu’a i le Samoa News i le aso na malaga atu ai ta’ita’i o le malo e tatala ni isi o galuega tetele ma atina’e ua mae’a ona fausia i le Faleluanu’u i Ofu ma Olosega/Sili i le vaiaso nei.

Na maua le avanoa o le Samoa News e fesiligia ai ma fa’atalatalanoa ni isi o tagata o Manu’a i le aso na tatala ai galuega tetele a le malo i Ofu, e pei o le “solar system” a le Ofisa o Pulega o le Eletise ma le Suavai (ASPA) ma le Ofisa tutotonu fou a le malo, le EOB i le tulaga o lo o i ai le soifuaga o tagata i Manu’a atoa ai ma le soifuaga o loo ola ma soifua ai tagata i Tutuila nei i aso fai soo.

Na taua e se tasi o Tama matua pe a ma le 65 tausaga o lona soifua le tele o le eseesega o le olaga i Manu’a ma le olaga i Tutuila.

“O le faigofie ia o le olaga o loo soifua ma ola ai tagata Manu’a i le taimi nei, e le taitai tutusa ma le olaga o loo ola ai tagata i Tutuila, ua masani lava tagata Manu’a i le olaga tautua, e fa’amuamua le aganu’u, e le mativa i se mea e tasi, ae ola fiafia ma sa’oloto le mafaufau mai le tele o fa’alavelave ma suiga eseese ua vaaia i Tutuila i le taimi nei”, o le saunoaga lea a lea Tama.

Ina ua fesiligia e le Samoa News e fa’amanino le uiga o lana saunoaga e le mativa i se mea e tasi, e ola fiafia fo’i ma sa’oloto le mafaufau, na saunoa ai lea Tama matua e fa’apea, “O e silasila atu ea i ni Faleoloa, poo ni pasi la’u pasese, poo ni faleoloa tetele e tumu tumu i ai tagata fa’atau i aso ta’itasi, o le taimi e leai, e le masani ai lava Manu’a i le ituaiga olaga tele vave lena ma le pisi vale e pei ona molimauina i Tutuila.”

“A leai se tupe i lau taga e te le popole fua lava i se mea e tasi, aua e leai ni faleoloa e te tau mana’omia ai se tupe e fa’atau mai ai ni oloa, a fia ‘ai e te alu i le fale o lou aiga tuaoi poo o isi tagata o lou aiga e te ‘ai ai, a le o lena fo’i, alu sina faiva e su’e mai se i’a mo le afiafi, e leai ni mea se tele e ono tutupu ai ni fa’ama’i eseese i Manu’a e pei ona a’afia ai Tutuila i le tele o gasegase pipisi e aofia ai siama o loo feavea’i e namu, aua e le gata e mama le atu falega o Manu’a, ae toaaga fo’i tagata e galulue e fa’amama le laufanua ina ia matagofie i le silasila a tagata o le motu faapea ai tagata e malaga asiasi atu i Manu’a”.

E leai se eseesega o le saunoaga a le Tama matua ma molimau e tele sa mafai ona fa’asoa mai e isi o le itumalo i le Samoa News e aofia ai le susuga ia Junior Tauanu’u i le Samoa News.

“E faigofie lava le soifuaga i Manu’a, e ui sa ou aoga ma fa’au’u mai i se aoga maualuga i Tutuila, ae ua ou filifili ou te nofo i lo’u aiga i Manu’a nei, e le gata ua ou masani ai i le olaga faigofie, e le mana’omia fo’i se tupe e tu’u i lau taga, aua o loo foa’i mai lava e le Atua fa’amanuiaga e tele e tausi ai oe ma lou aiga”, o le saunoaga lea a Tauanu’u.

“I le olaga o le tautua aiga ma le fa’amamaluina o le aganu’u, o se tasi lea o olaga ua ou fiafia i ai, a oo i le taimi o taligamalo e molimauina le o mai fa’atasi o tagata Manu’a e fa’atino la latou faiva alofilima o le fai mea sili mo ta’ita’i o le atunu’u pe malaga mai, e le pisi pe vevesi vale, ae fa’alogo uma lava i le leo e tasi, o le leo lea o le tagata o loo ta’ita’i i fuafuaga fa’ataoto o lea aso, e fealofani tagata uma, e faigofie le olaga”.

O se tasi o tulaga ua maitauina i Manu’a i le taimi nei, e le gata ua tele naua ta’avale a Ofisa eseese a le malo ua i ai i Manu’a, ae ua to’atele fo’i aiga Manu’a ua la’u atu a latou ta’avale i le itumalo.

“O le soifuaga i Manu’a, e le fa’ailogaina poo le ta’avale lea a ai ao ta’avale lea a ai, soo se taimi lava e te mana’omia ai se fesoasoani, e te maua le tali. O ta’avale a le malo e fesoasoani i le fela’ua’ina o tagata i manaoga o aso ta’itasi, e fa’apena fo’i ona felagolagoma’i aiga o le itumalo e fesoasoani atu i isi aiga”, o le saunoaga lea a se tasi o matai faiupu o le afioaga i Ofu.

E ese mai i le tulaga faigofie o loo i ai le soifuaga i Manu’a, fa’apea ai le leai o se mea e fa’apopoleina ai le mafaufau, ae oo lava fo’i i le va nonofo ai o matai ma le aumaga, matua ma fanau, aemaise ai tuagane i tuafafine, o lo o fa’aauau pea le malosi o ia sootaga i aso fai soo i totonu o Manu’a.

“E mamalu tele pulega a matai i totonu o Manu’a, ua iloa uma fo’i e tagata o latou tulaga i totonu o nu’u ma soo se mea e fai, o le va tausi lea i aso fai soo o loo mafua ai ona malosi ma mautu fuafuaga fa’atino i totonu o afioaga ma le itumalo”, o le saunoaga lea a se tasi o Tina matua i totonu o le afioaga.

Sa ia taua atili fo’i i lana saunoaga e fa’apea, atonu o loo i ai lava ni isi o afioaga i Tutuila fa’apea ai le atu Samoa o loo fa’atinoina ai vaega o le aganu’u i ni isi o taimi, peita’i i Manu’a lava ia, e aso uma e ola ai ma e tama ma le teine Samoa i Manu’a, o aso uma fo’i ia e ola ai ma malamalama i tu ma agaifanua a le atunu’u.