Faiaoga Pi’i mai Kalefonia a’oina fanau a le atunu’u


O se va’aiga i sui e to’atolu o lo’o avea ma faia’oga i a’oga maualuluga i Kalefonia ua latou o mai e tufa mai le tomai i le fa’agatama o Pi’iga e fesoasoani i alo o le atunu’u mo avanoa sikolasipi mo a’oga i Kolisi ma Iunivesite i fafo. [ata: Leua Aiono Frost]

O se va’aiga i le ituaiga pi’i ua a’oa’o i ai fanau o lo’o aofia i vasega i le DYWA i Pago Pago. [ata: Leua Aiono Frost]

Ua i ai nei i Amerika Samoa nisi o alo o le atunu’u e tele so latou agava’a i le Ta’aloga o le Pi’i ma ua oo mai ina ia fesoasoani i lenei fo’i vaega o tu’uaga a’oga mo alo o le atunu’u, ina ia fa’aleleia atili lo latou iloa ma le agava’a i Pi’iga, e sailia ai nisi ala e malaga atu ai i fafo e ao’oga ae totogia latou aoga e ni sikolasipi mai lea fa’agatama.

 

O le susuga Tiloi Tuitama, o se tasi e tupuga mai le Aiga Sa Savea Aupiu Tuitogamaatoe o Pavaiai, ma lona atali’i, Kerisimasi Tuitama ma le ali’i o Alex Ramirez mai Oxnard, Kalefonia e fa’aoo mai lea fesoasoani mo tatou fanau ua fiafia i lea fa’agatama.

 

Ua fa’afetaia e le Matagaluega o Tupulaga Talavou ma Tina lea avanoa lelei, sa mua’i feutaga’i i latou ma ua fa’afiafiaina ai i latou nei ina ia o’o mai, e fa’atino lea fa’amoemoe ma le fiafia. Ua tu’ufa’atasia e le Matagaluega le vasega o fanau e tusa ma le 70 i latou, ina ia a’oa’oina i le ta’aloga o le Pi’i, pe toe fa’aleleia atili fo’i o latou tomai i lea lava fa’agatama, ina ia saili avanoa ai fa’asikolasipi pe a mae’a aoa’oga maualuluga iinei.

 

Sa faailoa mai e Tuitama e faapea, “O la’u a’oga atoa sa totogia e le sikolasipi mai le Pi’iga, sa ou aoga ma tauva ai lava i lo’u aoga i le Kolisi i Ventura Junior College, ma soso’o ai ma le isi fo’i 2 tausaga i le Arizona State University.”

 

Ua le gata ai ia Tuitama lea avanoa, ma ua fa’apea fo’i ona soloa’i ane ia Kerisimasi, ma maua fo’i lana sikolasipi i le Pi’i ma ua i’u fo’i ua avea nei le ali’i talavou ma Faia’oga o le Football fa’atasi ma lona tama i Hueneme High School, Oxnard Kalefonia lava.

 

O le ali’i faiaoga ia Ramirez, o se tasi o tagatanu’u Amerika e tupuga mai Mexico ona matua, e leai ma sona pito Samoa, peita’i, o le to’atele o i latou na ta’a’alo fa’atasi ma ia o fanau a Samoa i lona a’oga mai se’ia oo nei ina avea ma faia’oga, e alofa ma fiafia tele o ia i fanau a Samoa i le a’oga a Canoga High i Kalefonia.

 

Ua atoa le ono tausaga o fai o ia ma faia’oga Pi’i i lea aoga, ae o lona tauva ai i lea fa’agatama ua atoa le 12 tausaga o lona soifua fa’ato’a 26 tausaga le matua, talu ona avea o ia ma tama pi’i.

 

“O lo’u o’o mai, ona ua ou iloa e matua tele lava le agava’a o fanau a Samoa i lenei fa’agatama. Ou te iloa i o latou tino lelei, e fai lava sina malolosi o tino o alo o Samoa, afai ae to’atele nisi e manana’o e avea le Pi’i ma ta’aloga e maua ai ni a latou sikolasipi, e fa’amanuiaina lava pe a o’o lava ina tu’u i ai o latou loto ia maua na avanoa,” o se tala lea a Ramirez.

 

“O le matou o’o mai o lo’o totogia lava e i matou pasese mo le malaga mai, na feutaga’i mai lava ia Ethan Lake ma maua ai lenei avanoa e faia ai nei a’oa’oga mo pi’iga i le fanau iinei. Fa’alogo lava i tala ‘ave e tele le manaomia ona fa’aa’oa’o lelei fanau a Samoa iinei i ta’aloga eseese, ma ua fiafia fo’i ua mafai ona fa’asoa mai se iloa i nei alo o le atunu’u, a taunu’u lelei latou taumafaiga i le lumana’i, sa i ai se sao fa’atauva’a na faia mo i latou,” o lana folasaga lea e tusa o lona o’o mai ma aoa’oina fanau i le faleta’alo i Pago Pago.

 

O le susuga a Tuitama e le na’o le pi’i e agava’a ai. Ina ua mae’a ana a’oga i le Iunivesite o Arizona State sa amata loa ona faigaluega i le avea ai ma ali’i Tinei Afi. Ua mae’a litaea mai fo’i la o ia i lana lea galuega i le 2012 ona amata ai loa ona toe avea ma Faia’oga i Mataupu Fa’asaeanisi ma faia’oga i le Pi’i ma le football i Hueneme High.

 

I lona olaga tauva ai i le pi’iga, sa ia fa’aalia e fa’alua ona maua e ia le siamupini o le Western State Conference, lea e aofia ai le a’oga sa ia a’oga ai, fa’atasi ai ma lona fa’ailoga na maua i lana a’oga, Most Outstanding Wrestler i lona tausaga.

 

Mai le Iunivesite sa a’oga ai, sa ia mauaina le fa’ailoga, “Finisher in Conference.” I sana fa’amatalaga, “O le pi’iga ua mafai ai ona ou maua mea e tele, o la’u galuega aua sa muamua a’oa’oina a’u i le Kolisi ma le Iunivesite i tupe na maua mai i lo’u ta’alo fa’atauva ai i le Pi’iga.”

 

O le umi o le latou auaunaga lenei ua amatalia talu mai le aso Lua ua te’a ma e atoa lelei le vaiaso. Ua va’aia le matagofie o a’oa’oga ma koleniga o lo’o fa’asinosino ai e i latou le fanau ua mae’a sainia latou pepa talosaga e fia a’oa’oina i le pi’i mo lenei tu’uaga o le a’oga.

 

Afai e le o i ai se mea e faia ma lou alo, ia fa’aulu ane lona igoa i le Ofisa Autu o Tupulaga Talavou ma Tina i Pago Pago mo se lesona aoga mo i latou, ua fa’atonutonu ai fo’i ma latou ‘aiga e ao ina tausami i aso ta’itasi, ina ia mautinoa o fesoasoani lea i le tulaga o koleniga e agava’a mo e pi’i. O lo’o talia uma tamaita’i ma ali’i i lenei lesitala.

Comment Here