O le molia ai o in ali’i se to’alua i le vaiaso na te’a nei i le faia o sauaga fa’asaga i o la ta’ito’alua, ua tula’i mai ai le to’a 7 o i latou ua taofia e Leoleo ma molia e le malo i le faia lea o sau’aga faasaga i Tina i totonu o le 2 vaiaso ua mavae atu.  O lea aofaiga e le o aofia ai le tele o isi mataupu i masina ua tuana’i atu e fa’atatau i le sauaina o Tina i totonu o aiga.

Na fa’aalia e le loia a le malo ia Jillian Sadler i luma o le Fa’amasinoga Fa’aitumalo i le vaiaso na te’a nei, ina ua tula’i se tasi o ali’i e 29 tausaga le matua ona o tu’uaiga i lona faia lea o sauaga i lona to’alua, e foliga mai o le fa’afitauli lea ua molimauina e le malo o lo o mafua ai nei solitulafono, e le gata o le ‘ava malosi ae o le taumafai o le Tama ina ia pulea i lona malosi le Tina ma i’u ai loa ina tutupu fa’alavelave fa’apenei.

O ali’i e to’alua ia na taofia ma molia e le malo i le vaiaso na te’a nei i le faia o sauaga fa’asaga i o la ta’ito’alua, o lo o taua i ripoti a Leoleo le a’afia uma ai o le ‘ava malosi o nei solitulafono.

O le mataupu muamua e fa’asaga i le ali’i e 29 tausaga le matua mai Otoville, lea o lo o tu’uaia i lona fa’aoolima i lona to’alua e aofia ai lona toso o lona ulu ma taumafai e titina, ina ua maua atu e lona to’alua ni tagata se to’afa i totonu o le la potu moe. O ia tagata e toafa o ni tama’ita’i se to’alua ma ni ali’i se to’alua.

Na taua e le Tina i Leoleo e fa’apea, o laua ma lana pepe e 11 masina na momoe i le fale o lana uo, i le taeao na sosoo ai, sa ia manatu e alu e asi le latou fale. Na faateia o ia ina ua tatala atu le faitoto’a o le la potu moe ma lona to’alua, o loo tu’u mai ai tamaitai e to’alua ma ni ali’i se to’alua.

Na tutuli ese e le Tina i latou nei mai totonu o le la potu, ae na fa’afuase’i ona oso atu lona Toalua ma fa’ao’olima loa ia te ia.

O le isi mataupu na tula’i mai i Tafuna i le vaiaso fo’i na te’a nei, ina ua fa’ao’olima se ali’i e 35 tausaga le matua i lona to’alua, ina ua ‘ona atu i le fale e le o i ai le fafine ma lana fanau. Na iloa mulimuli ane e le ua molia, na alu atu le uso o lona to’alua ma piki mai lona to’alua ma le fanau ona latou ta’amilo lea mo sina ti’eti’ega i luga o le auala.

O le toe fo’i atu ai o le fafine ma lana fanau, na tula’i mai ai loa le vevesi. Na taua i ripoti a Leoleo, o le vevesi na amata i se tauga upu, sosoo ai lava ma le fa’ao’olima o le ua molia i lona to’alua ma manu’a ai vaega o lona tino.

O lo o molia uma i latou nei i moliaga mama ta’i 2 o le faatupu vevesi i totonu o le aiga atoa ai ma le fa’ao’olima i le tulaga tolu. O le faaiuga o le masina nei lea ua fa’atulaga e toe valaau ai mataupu a i laua nei i luma o le fa’amasinoga.

O le 2 vaiaso talu ai na faasala ai e le fa’amasinoga faaitumalo se ali’i e 38 tausaga le matua e nofovaavaaia mo le 12 masina, ina ua ta’usala o ia i le moliaga o le faaoolima i le tulaga tolu, e mafua mai i le fa’alavelave lea na ia fa’ao’olima ai i lona to’alua a o matamata i ai lana fanau e to’a 2.

O ni isi o tuutuuga o le nofovaavaaia a le ali’i lea, e le gata ua fa’asa ona ia toe taumafai e faafesootai lona to’alua, ae ua faasa fo’i ona ia toe faia i ai ni uiga e fa’amata’u ai le fafine ma lana fanau.

E pei ona manino i taualumaga o mataupu a i latou uma nei e to’atolu, ua mae’a ona faila e o latou ta’ito’alua talosaga i luma o le fa’amasinoga e aloaia ai le tete’e fa’aletulafono.