Faatulaga malo isi aiaiga faaopoopo mo tagata faigaluega konekarate


Fonotaga a le Kapeneta a le kovana i le vaiaso na te’a nei. [ata AF]
ausage@samoanews.com

O le masina na te’a nei na toe fa’atulaga ai e le Matagaluega o Tagata Faigaluega a le malo ni isi o ana ta’iala, mo le fa’amalosia lea o auala e fa’atautaia ai feuiaiga mo tagata faigaluega o lo o galulue i lalo o konekarate pupu’u a le malo (short term contract).

 

I se tusi sa tu’uina atu e le Fa’atonusili o le Matagaluega o Tagata Faigaluega a le malo (DHR) ia Eseneiaso J. Liu, o lo o ia talosagaina ai Faatonusili o Matagaluega ma Ofisa Tumaoti uma a le malo ina ia fa’autagia aiaiga fou e pei ona fa’atulaga, ina ia mafai ai ona aga’i i luma le fa’atulagaina mo le fa’afouina o avanoa faigaluega mo tagata o lo o galulue i lalo o nei ituaiga konekarate.

 

A o lei mae’a le taimi fa’atulaga mo se konekarate, e tatau ona tu’uina atu e le Fa’atonusili ni tusitusiga i le DHR i totonu o le 90 aso talu mai le aso e mae’a ai le konekarate, ina ia mafai ai ona iloilo e le DHR ma iloa ai le toe fa’afouina o lea konekarate pe leai fo’i.

 

“E taua tele le iloiloina muamua o tulaga uma e pei ona taua, ina ia fa’a faigofie ai ona faia le fa’aiuga i le toe fa’afouina lea o le konekarate pe leai fo’i”, o se vaega lea o le tusi a Liu i Fa’atonusili a le malo.

 

Sa ia talosagaina fo’i le tatau lea ona faia muamua se iloiloga i tulaga uma o le konekarate, ina ia mautinoa atoatoa ai le faia o le fa’aiuga e toe fa’afou poo le fa’amutaina loa fo’i e le toe fa’aauauina.

 

“Afai e mae’a ai lau iloiloga ae maua ane ai e le tatau ona toe fa’afouina lea konekarate, e talosagaina a outou afioga i Fa’atonusili fa’amolemole ina ia vave tu’uina mai se fa’aaliga e fa’ailoa mai ai le fa’amutaina aloaia o lea konekarate”, o se vaega lea o le tusi a Liu.

 

“Ina ia tusa ai ma ta’iala o lo o lima ta’ita’iina ai tagata faigaluega konekarate a le malo, e tatau ai ona mautinoa le fa’avae o le fa’aiuga i luga o le galuega fa’atino a le tagata faigaluega, ma iloa ai pe fa’amalieina le malo i lana tautua pe leai fo’i, ina ia faia ai le fa’aiuga e fa’amuta aloaia ai lana tautua i le taimi lava e mae’a ai lana konekarate”, o le saunoaga lea a Liu.

 

Ua talosagaina fo’i afioga i Fa’atonusili ina ia aofia atu i totonu o le latou ripoti e fa’atatau i le konekarate tulaga o le auaunaga ma galuega fa’atino mo le tagata o le a malolo, ina ia aofia ai se fautuaga i le toe sailiina mai lea o se isi tagata e fa’atumuina le avanoa, poo le fa’asalalauina lea o le avanoa ae saili mai ai se tagata e talafeagai ma agava’a mo le galuega, e aofia ai le filifili mai i fanau aoga e to’atele ia ua fa’au’u mai i Kolisi o lo o i ai le tomai ma le agava’a talafeagai e fa’atinoina ai le galuega.

 

O nei aiaiga uma ma suiga e pei ona taua i le tusi, o lo o fa’avae uma mai lea i le tulaga utiuti ma le taumafai e taofiofi le toe soona fa’aalu o tupe a le malo i le taimi nei.

Comment Here