Ads by Google Ads by Google

Faatali se faaiuga a le Fa’amasinoga talosaga a Thomas Siaumau

ausage@samoanews.com

Ua taoto atu nei i se fa’aiuga a le Fa’amasinoga Maualuga le talosaga na fa’aulu e le loia a Thomas Siaumau, susuga a William Olson, e talosaga ai le fa’amasinoga mo se avanoa e fa’atulaga ai se tupe e tatala ai Siaumau i tua mai le falepuipui, a o fa’atalitali ai taualumaga o le mataupu e pei ona tu’uaia ai o ia e le malo.

 

O lo o tu’uaia e le malo ia Siaumau i le fa’alavelave lea na tafana ai e se tagata se ta’avale a Leoleo i le masina o Tesema o le tausaga na te’a nei, i tua o le malae Baseball i Tafuna. O lo o matua tete’e malosi Siaumau i tu’uaiga a le malo.

 

O lo o molia e le malo lenei ali’i talavou i moliaga e aofia ai le taumafai e fa’aoo manu’a tuga i se tagata, atoa ai ma moliaga o le umia atoa ai ma le fa’aaoga fa’asolitulafono o ni fana e le fa’atagaina i le atunu’u. O lo o tete’e malosi fo’i le ua molia i nei moliaga uma.

 

Na taua e le ali’i loia ia Olson i lana fa’afinauga i le vaiaso na te’a nei e fa’apea, e mafai ona taofia se tagata i le falepuipui e aunoa ma se tupe e fa’atulaga e le fa’amasinoga e tatala ai, pe afai ua faamalieina le fa’amasinoga i mau ua tuuina atu e le malo i le ulua’i iloiloga (PX hearing).

 

Ae mo le mataupu a Siaumau, e leai se ulua’i iloiloga sa faia, e leai ai fo’i ni mau na tuuina atu e le malo i luma o le fa’amasinoga, ina ua fa’aagafua e le ua molia ona aia tatau uma, ae manatu e tuu sa’o atu loa lana mataupu i luma o le fa’amasinoga maualuga e fa’agasolo ai taualumaga masani.

 

Na talosaga Olson ina ia fa’atulaga se vaega tupe e gafatia ona totogi e le ua molia, mo se fa’ata’ita’iga o le $250,000 poo se isi fo’i aofaiga lava e manatu le fa’amasinoga e talafeagai.

 

Na tete’e malosi le loia a le malo ia Woodrow Pengelly i le talosaga a le itu tete’e, ma ia talosagaina ai le fa’amasinoga ina ia teena le talosaga a Olson.

 

Na taua e Pengelly e fa’apea, e matua matuia lava le mataupu o lo o molia ai Siaumau, e le gata o lo o aofia ai le fa’aaogaina o a’upega mata’utia, ae aofia ai fo’i ma le taumafai e fa’aoo manu’a i leoleo.

 

Na faailoa atili e Pengelly i le fa’amasinoga e fa’apea, o lo o i ai le faila a Siaumau i le fa’amasinoga fa’aitumalo, e pei ona ta’usala ai i le moliaga o le faaoolima, tete’e atu i leoleo, atoa ai moliaga mamafa o le faaoolima ma le faaleaga meatotino e pei ona ta’usala ai o ia i le 2009.

 

Ae i le tausaga e 2010, na ta’usala ai fo’i le ua molia i le setete o Hawaii, o le mafua’aga lena o le poloaiga lea ua sainia e le fa’amasinoga mai Hawaii e pu’e fa’apagota ai le ua molia, ona o lea ua tuua e ia le motu o Oahu e aunoa ma se fa’atanaga a le fa’amasinoga, ae o lo o faanofovaavaaia o ia i luma o le fa’amasinoga i Hawaii.

 

Na taua atili e le loia a le malo e fa’apea, afai e manatu le faamasinoga o le setete a Hawaii e tuuina mai sana poloaiga e avatu faanatinati atu ai loa Siaumau mo le faia o lana iloiloga i lona le usitaia o tuutuuga o lana nofovaavaaia, lona uiga o le tulaga lava lena o le a oo i ai lana mataupu.

 

O lo o tumau pea le taofia o Siaumau i le toese e aunoa ma se tupe e tatala ai o ia, ae ua taoto atu nei i se fa’aiuga a le fa’amasinoga lana talosaga.