Ads by Google Ads by Google

Fa'atalanoa, Fa'ailoa ma Taofia Sauaga Fa'aleituaiga


O le taimi na fa'atautaia ai le sauniga e taualoa ai galuega tima'i, galuega fa'alauiloa o'oo'oga o Sauaga i totonu o Aiga, ae maise o galuega e tineia ai le sauga fa'aleituaiga i totonu o le atunu’u. O lo'o sasao i le talaluma o lea fonotaga le pa'ia maualuga i le afioga le Ma'oputasi Mauga T Asuega, le Faletua o le Kovana Sili Cynthia Moliga, ma Kovana fa'aitumalo. [ata: Leua Aiono Frost]

O le taeao o le aso Gafua, na fa'atautaia ai le sauniga e tutu ai moliga'o, e manatua ai e le vasega o Tama o le Atunu'u o lo'o tautua i le Ofisa o Mataupu Tau Samoa le taua o le mau o lo'o taumafai ona fa'aofi atu e le "Mau E Fa'amalosia Aiga" ina ia soifua fiafia ma malutia fanauiti ma tina i o latou aiga.

 

I lea sauniga na masi'i atu ai le Tina o le atunu'u, faletua o Cynthia Moliga ma le susuga fo'i i totino o le Komiti Fa'afoe a le Alliance to Strengthen Families, e aofia ai ma le susuga le Fa'afeagaiga Rev Elder Pati Vaeao mo le si'itia o le fa'afetai i le Atua ma talosia fo'i le fa'amoemoe ua amatalia nei galuega fa'ailo, gaiuega tima'i, galuega fesoasoani fa'atasi ai ma galuega fa'apa'aga ua toe fa'amalosia atoatoa, ina ia soloia sauaga o so'o se ituaiga i totonu o Aiga o le atunu'u atoa.

 

Na tima'ia e Rev. Vaeao le olaga fa'atama talavou sa ia saili i mea e tele ina ia fa'afiafiaina ai lona loto.

 

“Ua mae'a fa'amanuia le Atua ia te ia i le atamai silisili, e leai se tusa ma ia i lenei olaga, ae peita'i e le'i fa'amalieina ai i le tele o le oa ma le mamalu ae na toe saili e fia maua le loto malie i le tuinanau. Solomona, sa to'ele i ona o ona lagona e fia fa'amalieina, 700 to'alua fa'aipoipo ma le 300 palake sa ia te ia, ae na emo ane le ata mulimuli o lona soifuaga i le tele o mea sa ia toe fa'atepa tagata uma e faitau i ana tusitusiga i le Tusi Pa'ia, ‘Fa'auta o 'ai o le matagi mea uma lava’.”

 

"O uiga na o le olaga e le fou, ae tasi le tagata e fou, o le tagata ua suia lona olaga i le olaga o mana'omia e lou Fa'aola ona e savali ai. Afai o tau matele i lena ituaiga olaga i tatou o tama o aiga, tama faigaluega ma tausi o tatou aiga, ia tatou suia i le lelei mea uma, ia le manumalo le leaga i le lelei, ae ia manumalo le lelei i le leaga."

 

"Tama o le ulu o le aiga, o tina o le fesoasoani i le Tama, ia usiusita'i i le ulu o le aiga, outou fanau fo'i ia outou fa'alogo ma usiusita'i i o outou matua i le ali'i. O le faatulagaga lena a le Atua, peita'i ua tele mea ua suia, ae o le fa'avae mautu lena o le nofo lelei ma ola saogalemu ua mae'a fa'ailoa mai ia i tatou uma. Peita'i ua lutia o tatou lotoifale i le leaga aua ua sauaina fanau, e le gata ina sauaina nisi ae ua fa'ataumaoia fa'aleituaiga fo'i. Ua lepetia pa o le nofo tapuia i totonu o le saogalemu o le lotoifale sa tatau ona sili ona mausali. Aisea, ua o'o i ai le lagona leaga o le tuinanau le fa'amalieina!"

 

O le saunoaga a le ali'i Faipule Sam Meleisea sa soso'o ai, o ia fo'i o le Totino o le Komiti Fa'afoe o le Alliance Against Domestic & Sexual Violence. Sa ia toe fa'amalosia mai le agaga tonu o lenei masina atoa - e fa’atauaina ai le tete’e atu i sauaga eseese.

 

"O lenei galuega e faia fa'apa'aga, ina ia o'oo'o le fe'au i tuluiga o maota ma laoa uma i totonu o le atunu'u. Lea fo'i ua matou folasia i muamea le fa'amoemoe i lenei pa'aga ua fa'amautuina nei, Le Ofisa o mataupu Tau Samoa, ina ia tatala atu i tua i nu'u ma afioaga ta'itasi o le atunu'u lenei tagi o le alofa, ‘Taofi le sauaina o Tina ma Fanau i totonu o aiga’, po'o le  fa'ataumao'ia fo'i o i latou fa'aleituaiga."

 

"O outou ua fa'amoemoe atu i ai le tima'iga ma se fa'ailo, ina ia tatou galulue fa'atasi e fa'ao'o atu se fesoasoani i le ua pagatia fa'aleituaiga po'o sauaga fo'i o le tino. O fanau ua na'o ni alualutoto i latou, e mo'omia e i latou ona tausia i le alofa ma ia latou lagona le saogalemu i le malu o latou aiga i aso uma,” o se toe augani lea a le ali’i faipule.

 

Na faia fo'i le sao o le pa'aga e sili ona vavalalata a latou galuega fa'afaufautua, atoa ai ma le tausiga lelei a le Malo mo i latou ua afaina i sauaga, le Matagaluega o Tautua ma Alamanuia mo le Lautele, DHSS, Dr Celestine Faumuina Nix, Sui Fa'atonu o Tautua mo Fanau & Aiga.

 

"O le lautele lea ma le loloto ua o'o i ai le naunau o le Malo ina ia tineia le tele o sauaga o a'afia ai fanau ma tina po'o tama fo'i i totonu o latou aiga. E le gata i lea ua i ai ona sui faufautua, e galulue malosi ina ia le o'o le aiga i se tulaga tete'a, ae o lo'o i ai fanau e ao ina tausia fa'atasi e matua."

 

O le faitauina o le Poloaiga Fa'alaua'itele a le Kovana Sili, Lolo Matalasi Moliga, sa faitauina lea e le tama'ita'i o Judy Mata'utia, ma sa fa'amanino atili ai le finagalo sapaia o le ta'ita'i o le tatou Malo, e tusa o lenei mau e fa'atutu i le "Tineia o Sauaga Fa'aleituaiga i totonu o Aiga."

 

O le avanoa na soso'o ai sa faia ai se molimau a se tina, na tele omiga na o'o ia te ia, ina ua amata mai ona sauaina o ia fa'aleituaiga i totonu o lona aiga i le 12 o ona tausaga. Na fa'aauau lea tulaga se'ia o'o ina 17 ona tausaga. Peita'i, o lona malaga mai i Amerika Samoa nei, ua avea ma ala, ua ia mauaina ai se tasi e mafai ona fa'alogologo toto'a i ona mafatiaga, ma ua ia maua ai se mapusaga ua ia fa'ailo, "E aumai ia Ieova lea!"

 

O lea tina o Elizabeth Mailo, ma sa ia fa'ailoa, o le sa ia sauaina o ia, o se tasi lava o lona aiga a'o ola a'e o ia i Amerika. Ua o'o lona tagata i le taumafai e pule i lona ola, ina ua tautala atu ina ia maua se fesaosoani, ae atili ai ona upuia o ia, ma otegia ma lalau mai lona teine leaga, leai se aoga, tautalaitiiti, ma le anoanoa'i o nisi mau igoa sa lalafo atu ia te ia e lona aiga.

 

Na alu ese ma ia nofo to'atasi, e le'i toe mana'o e iloa o ia e se tasi, peita'i o nei, ua fiafia o ia i lona aiga, ma ana uo ua latou talatalanoa ma fefaasoa'i i lagona sa o'otia ai, o tiga sa mafatia ai, ma ua ia iloa fo'i, o ia lava o se ma'ataua i a'ao o lona fa'aola!

 

Saunoa le afioga le Ma'oputasi Mauga Tasi Asuega mo se fa'amalosi i Pulenu'u ma Leoleonu’u, ma sa sapaia e ia le tima'iga.

 

"Ia fai lo outou faiva ua vala'auina ai oe, aua e fa'amasinoina fo'i oe i lou faiva sa tatau ona fa'ataunu'u, pe ete aiga i lea tagata ua solituina le va tapuia o le ola ma le nonofo fa'atasi ai o se aiga, e tatau lava ona e lipotia mai, e fa'ailoa ai lou fa'amaoni o lou tofi o e tau'avea nei."

 

"O outou o mata ma taliga o le Malo i o outou afio'aga, ina ia mautu le mau ua vala'auina ai i tatou e tausia, le saogalemu o aiga i o latou afio'aga, ma e ao ona tofusia uma ai fanauiti ma tina i le ola saogalemu ma le fiafia lea e mo'omia ona ausia.”

 

I le taeao o le aso ananafi sa tutula'i ai fo'i le mamalu o sui o le "Mau ia Fa'amalosia Aiga" i o latou muafale ina ia talotalo i ta'avale ma e feoa'i, e fa'ailoa, "Aperila o le Masina e Taualoa ai galuega tima'i ia taofia Sauaga o so'o se ituaiga i totonu o Aiga ma so'o se nofoaga o lo'o a'afia ai tina ma fanauiti.