Ads by Google Ads by Google

Faasala falepuipui mo le 5 tausaga le ali’i o Suauupaia Amituana’i


[ata: SN]
ausage@samoanews.com

E 5 tausaga lea ua faasala ai e le Fa’amasinoga Maualuga le ali’i o Suauupaia Amituana’i e taofia ai i le falepuipui i Tafuna, ina ua fa’amaonia e le Fa’amasinoga moliaga sa tu’uaia ai o ia e le malo.

 

O moliaga mamafa e 2 ua ta’usala ai e le Fa’amasinoga ia Amituana’i e aofia ai lona faia o fa’amaumauga tau fa’asese ma le gaoi, e mafua mai i le fa’alavelave lea na ia gaoia ai le siaki mai se faleoloa ae saini faamalosi le igoa o le Pule, ona alu lea ua tala le siaki ae fa’aaoga le tupe.

 

E ese mai i moliaga e lua e pei ona ta’usala ai Amituana’i e le Fa’amasinoga, ua ta’usala fo’i o ia i lona le usitaia lea o tuutuuga o lana nofovaavaaia sa tuuina atu i le 2014.

 

Na faatoese le ua molia i luma o le Fa’amasinoga e tusa ai o lana solitulafono sa faia, ma ia talosagaina ai se avanoa e toe fo’i atu ai i tua e tausi lana fanau e to’a 6.

 

Na taua e le ua molia e fa’apea, o se tulaga fa’anoanoa le motusia o le mafutaga ma lana fanau, ma ua ia lagonaina fo’i le leaga o se aiga e nonofo na o le fanau i le fale e leai se Tama. Na taua fo’i e Amituana’i lona alofa faamaoni i lona aiga, e naunau fo’i ina ia fa’aaoga aso o lona olaga e tausi ai lona to’alua ma lana fanau.

 

Na taua e le ali’i loia ia Michael White i le Fa’amasinoga e fa’apea, talosia ua aoaoina e Amituana’i se lesona aoga mai le taimi na taofia ai o ia i le falepuipui e faatali ai se faaiuga o lana fa’amasinoga.

 

Na taua e le loia a le malo ia Woodrow Pengelly e fa’apea, e le talitonu le malo i le talosaga a le ua molia fai mai e alofa i lona aiga, ae o lana gaioiga lea sa faia i le aso na tula’i mai ai le fa’alavelave, na ia tuuina atu ai ola o lona aiga i se tulaga e lamatia ai.

 

Na taua e le loia a le malo le aga’i atu o le ua molia i le ofisa o Taavale Afi i Tafuna ma le fa’amoemoe e sui faagaoi le lesitala o se tasi o ta’avale, ae fa’atali atu lona to’alua i totonu o le ta’avale.

 

O se taimi lava o le aso lea na maua ai loa e Leoleo le ua molia ma fai ai loa a latou tuliga i luga o le alatele, a o i ai pea lava lona to’alua. Na taua e le malo e fa’apea, e laki e lei i ai se faalavelave na tula’i mai i lea aso, se manu e aafia atu ai ma le ola o le to’alua a le ua mola. Na faaiu le faafinauga a Pengelly i lona talosagaina lea o le Fa’amasinoga ina ia fa’asala Amituana’i i le toese mo le 5 tausaga.

 

Saunoa le afioga i le ali’i Fa’amasino ia Elvis P. Patea e fa’apea, i fa’amaumauga a le fa’amasinoga o lo o manino mai ai le tulaga lea, e le o se taimi muamua lenei ua ta’usala ai Amituana’i i ni solitulafono, e le o se taimi muamua fo’i lea ua fa’anofovaavaaia ai o ia e le Fa’amasinoga.

 

E tusa ai ma fa’amaumauga a le Fa’amasinoga, e fa’a 5 ona fa’anofovaavaaia Amituana’i i luma o le Fa’amasinoga, e fa’a 3 i le Fa’amasinoga Fa’aitumalo ae fa’a 2 i le Fa’amasinoga Maualuga.

 

Saunoa Patea e fa’apea, foliga mai i fa’amaumauga a le fa’amasinoga, e le i aafia lava Amituana’i i ni solitulafono i le taimi o lona talavou, ae ina ua avea o ia ma tagata matua, ua fa’aipoipo ma ua fai fo’i lana fanau, o le taimi lea na fa’atoa mau ai loa lona igoa i fa’amaumauga a le Fa’amasinoga.

 

E talitonu le Fa’amasinoga, e tatau lava ona tu’uina atu se fa’asalaga talafeagai mo Amituana’i, ina ia a’oa’oina ai lona mafaufau mai le fa’afitauli o le solitulafono so’o.

 

Mo le mataupu e pei ona fa’amaonia ai lona le usitaia o poloaiga o lana nofovaavaaia, ua poloaina e le fa’amasinoga le tuliina loa e Amituana’i o le tausaga e 1 lea o lo o fa’amalumalu mai lana mataupu o le 2014.

 

Mo le solitulafono o le faia o fa’amaumauga tau fa’asese, e 5 tausaga lea ua fa’asala ai o ia i le toese i Tafuna. Mo le moliaga o le gaoi, e 5 tausaga e fa’asala ai o ia i le toese i Tafuna. O ia fa’asalaga uma e tolu e tuli fa’atasi, lona uiga e na o le 5 tausaga lea o le a taofia ai o ia i le falepuipui.