O le ali’i mai Upolu e 24 tausaga le matua lea na tu’uaia e le malo i lona faia o uiga mataga i se alualutoto e 5 tausaga le matua i le fa’aiuga o le tausaga na te’a nei, ua ia ta’utino i le fa’amasinoga maualuga e fa’amaonia tu’uaiga fa’asaga ia te ia.

E 5 moliaga na ulua’i tu’uaia ai e le malo le ali’i o Muaiga Siatiu poo Povi fo’i e pei ona iloa ai o ia e le to’atele. O ia moliaga e lima e aofia ai moliaga mamafa o le faia o uiga mataga i se teineititi e i lalo o le 12 tausaga le matua (child molesting), faia o uiga mataga fa’asotoma (sodomy), faia o uiga mataga fa’afeusuaiga (deviate sexual assault), tagofia o itutinosa o se teineititi e talavou i lalo o le tulafono (sexual abuse 1st degree), ma le moliaga mama o lona faia o ni gaioiga se ono lamatia ai le saogalemu o fanau laiti.

Ae i lalo o le maliliega lea ua sainia e Povi ma ua talia fo’i e le fa’amasinoga, ua ia malie ai e tali ioe i le moliaga lona lua, le solitulafono o lona faia o uiga mataga fa’asotoma.

I le tali ioe ai o Povi i le solitulafono e pei ona ta’usala ai o ia, sa ia ta’utino ai i luma o le fa’amasinoga maualuga e fa’apea, i se taimi o le aso 10 Tesema 2016 i Amerika Samoa, sa ia faia ai ni uiga mataga fa’asotoma i se teineititi e 5 tausaga le matua, e ala lea i lona tagofia o lona itutinosa.

Na ta’utino atili Povi e fa’apea, a o i ai i le fale o le teineititi na a’afia mo se tafaoga pu’upu’u, sa ia tagofia ai lona itutinosa i se auala mataga, ona o le manatu e fa’amalie ai lagona tu’inanau sa ia te ia, ma o le gaioiga sa ia faia sa le tusa lea ma ala o le tulafono.

Ae pei ona manino i fa’amaumauga a le fa’amasinoga, o le aso e pei ona taua na tula’i mai ai le fa’alavelave, na malaga ai Povi ma le uncle o le teineititi na a’afia e tafafao i le fale o le teineititi i le itu i Sasa’e o le atunu’u.

Na taua e le malo e fa’apea, sa nofo Povi i le fale o le uncle o le teineititi i se vaega o Tutuila, ma sa malaga i laua e tafafao i le fale o le tuafafine o le ali’i lea ma lona aiga, ae alia’e mai ai loa le fa’alavelave e pei ona ta’usala ai le ua molia.

A o fa’agasolo le tafaoga, sa tagofia ai e le ua molia le ‘ava malosi, ma o se taimi o le aoauli na tula’i mai ai loa le fa’alavelave e pei ona ta’usala ai le ua molia ina ua ia faia uiga mataga i le teineititi na a’afia.

Ina ua tuua e Povi ma le uncle o le teineititi le fale ma toe aga’i ese mai, o le taimi lea na fa’atoa ta’u ai loa e le teineititi na a’afia i lona Tina gaioiga mataga sa faia e le ua molia ia te ia, ma logo ai loa e le Tina le Ofisa o Leoleo, ma auina atu ai loa le teineititi i le falema’i mo le faia i ai o ni isi o siaki a foma’i.

O le masina o Oketopa 2016 na fa’atoa taunu’u mai ai Povi i Amerika Samoa, ma e lei atoa se 2 masina talu ona i ai o ia i le atunu’u ae alia’e mai ai loa le fa’alavelave e pei ona ta’usala ai o ia.

I le talia ai e le fa’amasinoga maualuga o le maliliega a le malo ma le ali’i ua molia, na talosaga ai loa le malo i le fa’amasinoga ina ia solofua loa moliaga uma o lo o totoe ai i le pepa o le tagi sa latou fa’aulu fa’asaga ia Povi, lea fo’i ua talia e le fa’amasinoga.

O lo o taofia pea le ua molia i le toese i Tafuna e fa’atali ai le aso 4 Aukuso lea ua fa’atulaga e lau ai lana fa’asalaga.

O le moliaga o le faia o uiga mataga fa’asotoma, o se solitulafono B lea i le fa’atulagaina o solitulafono mamafa, lea e mafai ona fa’asala ai se tasi i le toese i Tafuna e amata mai i le 5 tausaga ae le silia i le 15 tausaga.