Ads by Google Ads by Google

Faamanino Ofisa Femalagaaiga mataupu fa’atatau pemita 7 aso


[ata: foa'i]
ausage@samoanews.com

I le fiamalamalama ai o le Fa’amasinoga Maualuga po o ai o lo o i ai le malosi e sainia ai le pemita e 7 aso mo tagata mai fafo, o le taeao ananafi na manino ai, o le Loia Sili o lo o i ai le malosi e sainia ai le pemita e 7 aso, lea o lo o mafai ona malaga mai ai au malaga to’atele e fa’afiafia i le fu’a a le atunu’u tausaga ta’itasi.

 

Na taua e le susuga Paelo Puni, o le Ta’ita’i lea o le Vaega e Su’esu’eina mataupu i le Ofisa o Femalagaaiga e fa’apea, o lo o fa’aauau pea i le taimi nei ona fa’aaoga le pemita e 7 aso e malaga mai ai au malaga tete’e mai Samoa e fa’afiafia i aso o le fu’a a le atunu’u.

 

“O le pemita e 7 aso e pei ona fesiligia, o le isi lea igoa o le pemita lea e taua o le ‘block permit’, e fa’apitoa mo au malaga to’atele mai Samoa pe a malaga mai e fa’afiafia i aso fa’amanatu a le atunu’u e pei o le fu’a ia Aperila o tausaga ta’itasi”, o le saunoaga lea a Puni.

 

Na fa’amanino atili e Puni e fa’apea, o tagata uma lava e malaga mai i le pemita 7 aso, e tatau ona toe fo’i uma i latou i le taimi e tasi e toe taliu atu ai le au malaga i Samoa, e le tatau ona nofo se isi i le atunu’u, o le mafua’aga fo’i lena e ao uma ai a latou tusi folau ma fa’aputu fa’atasi e le Ofisa, ina ia mautinoa e toe malaga fa’atasi uma i latou i totonu o le 7 aso o lo o malaga mai ai.

 

“E na o Samoa lava o lo o mafai ona malaga mai i le ituaiga pemita lea, e fa’apitoa lava mo au malaga to’atele ae le mafai ona malaga mai ai se tagata ma le fa’amoemoe e saili ai sana galuega poo le nofomau i le teritori”, o le isi lea saunoaga a Puni.

 

Na fesiligia e le Samoa News ia Puni po o i ai ni tagata na malaga mai i pemita ta’i 7 aso o lo o fa’aauau pea ona i ai i le atunu’u, ae na tali le molimau, “E le mafai ona ou tali atu i lena tulaga, ae o le mea moni lava, e le tatau ona i ai se isi e nofo iinei pe afai ae mae’a le 7 aso na malaga mai ai, ae afai sa i ai se mataupu fa’apena i luma o le fa’amasinoga, ou te le malamalama lava i le mafua’aga na tula’i mai ai lena mataupu”.

 

O le mataupu e fa’atatau i le pemita e 7 aso na alia’e mai i luma o le fa’amasinoga maualuga i le aso Faraile o le vaiaso na te’a nei, ina ua tu’uina atu e le fa’amasinoga lana fa’aiuga fa’asaga ia Loimata Mika, o se ali’i e 28 tausaga le matua na ulufale mai i le atunu’u i le pemita e 7 aso i le masina o Aperila 2016, ma le fa’amoemoe e sau e saili sana galuega i le teritori, ae fa’afuase’i ai ona a’afia o ia i le tulafono ma fa’asala ai loa i le falepuipui i le vaiaso na te’a nei.

 

Saunoa le afioga i le Faamasino Sili Michael Kruse e fa’apea, pau lea o le tulaga e alia’e mai pe afai ae ova aso e nofo ai se tasi mai fafo i le atunu’u, o le a’afia lea o ia i faiga fa’asolitulafono e pei o Mika, lea na ia ulufale fa’amalosi i totonu o le fale o se aiga i le po ma ia tago atu ai i le ogavao o se tama’ita’i o loo moe i luga o lona moega i totonu o lona potu moe, i le silia ai lea i le 3 masina talu ona nofo fa’asolitulafono o ia i le atunu’u.

 

Na taua e le fa’amasinoga le tatau lea i le malo ona taga’i toto’a i le mataupu o tagata mai fafo e ulufale mai ma nonofo fa’asolitulafono i le atunu’u, ona o le to’atele o i latou nei o lo o tumu ai le falepuipui i Tafuna.

 

Na taua e le ali’i fa’amasino sili i se tasi o ana saunoaga, o le to’atele o tagata mai fafo o loo ulufale mai i le atunuu ma nonofo faasolitulafono ai lava, e emo ane lava le ata ua a’afia i latou i solitulafono eseese, ae maise lava i solitulafono e fa’atatau i le faia o uiga mataga i fanau laiti.

 

A o taumafai malosi ai pea le faigamalo e fa’amalosia tulafono tau femalagaaiga, na taua e le loia sili a le malo ia Talauega Eleasalo Ale le i ai pea lea o tagata ua ova aso i totonu o le atunu’u, ma o lo o taumafai malosi fo’i lona Ofisa e saili auala uma e mafai ai ona toe fa’afo’i i latou i o latou atunuu.

 

Ae na taua e le Ta’ita’ifono a le Komiti Fa’afoe o Femalagaaiga ia Fanene Edda Wyberski i le Samoa News e fa’apea, ua i ai nei se fuafuaga a le Komiti Fa’afoe e tu’uina atu sana talosaga i le Loia Sili ma le Ofisa o Femalagaaiga, mo se avanoa e tu’u mai ai le sainia atoa ai ma le fa’amalosia o tulafono e fa’atatau i le pemita e 30 aso o lo o ulufale mai ai tagata mai fafo i le atunu’u, ina ia mafai ai ona latou fesoasoani i le tau foiaina o le fa’afitauli.

 

O le fa’afitauli o lo o maitauina i le taim inei e pei ona saunoa Fanene, e le mafai e le loia sili i lona tulaga pisi o lo o i ai ona fa’atinoina uma galuega e tatau ona moomia i le tulaga o le sainia o pemita, toe fa’atino fo’i ona tiute fa’a loia sili a le malo, ae tatau lava ona i ai se isi vaega e lagolago atu ia te ia i le fa’atinoina o ona tiute.

 

E le gata i taumafaiga a le Komiti Fa’afoe e fesoasoani i auala e fa’amalosia ai le tulafono o le pemita mo tagata mai fafo, ae ua latou fa’amalosia fo’i le vaega o le tulafono lea e fa’aaoga e pisinisi e aumai ai tagata mai fafo e galulue i le atunu’u.

 

Na taua e Fanene le tele o talosaga mai ni isi o pisinisi mo tagata mai fafo e fia aumai e galulue i le atunu’u ua latou teena, ona e atagia mai i talosaga sa tu’uina atu i luma o le Komiti, e le o mulimulita’i pisinisi nei i le mafua’aga na ala ai ona fa’avae lea vaega faapitoa o le tulafono, o le aumai lea o tagata mai fafo e i ai le tomai faapitoa e galulue i le atunu’u, pe afai e le maua iinei le tomai ma le agava’a o loo moomia.

 

“O lea taumafaiga ua faia e le Komiti Fa’afoe, o se auala e fesoasoani ai i le tau fa’aitiitia o le to’atele o tagata Asia ua molimauina le lolofi mai i Amerika Samoa”, o le saunoaga lea a Fanene.