Ads by Google Ads by Google

Faamanino malo ni isi o mataupu o loo fa’asea ai le atunu’u


[ata: SN]
ausage@samoanews.com

I le to’atele ai o ni isi o le atunu’u o lo o fa’asea i le auala na fa’atinoina ai e le malo asiasiga o a latou meatotino sa fa’aleagaina i le ‘afa o Gita i le masina na te’a nei, o le vaiaso nei na maua ai le avanoa o le afioga i le Lutena Kovana ia Lemanu Sialega Palepoi Mauga e fa’amanino ai tulaga uma e fa’atatau i fa’asea mai le mamalu o le atunu’u.

 

Saunoa le afioga a Lemanu, o ia fo’i lea ua tofia e fai ma sui o le Kovana i fesootaiga ma le Feterala i mataupu e fa’atatau i meatotino a fa’aleagina (GAR), o le ulua’i asiasiga sa fa’atinoina e le malo ina ua fa’atoa mae’a le ‘afa o Gita, sa fa’apitoa mo afioga ma aiga na matua sili ona fa’aleagaina maota ma laoa, poo se isi faaupuga, o aiga ua pauu i lalo fale ma ua le toe i ai lava se isi fale e toe nonofo ai.

 

Na faamanino e Lemanu e fa’apea, o le asiasiga muamua sa fa’anatinati lona faatinoina, ona o le manatu ia mafai ona vave tuufaatasi se ripoti ma tuuina atu e silasila i ai le afioga i le ali’i kovana ia Lolo Matalasi Moliga, ina ia mafai ai loa ona faia sana talosaga e tuuina atu i le Peresetene o Amerika, e fa’amatu’u mai ai loa fesoasoani uma e moomia mo Amerika Samoa, ona o le tulaga pagatia ua i ai i lenei fa’alavelave.

 

Ua mae’a ona sainia e Lolo le ripoti mo meatotino sa faaleagaina atoa ai ma lana tusi i le Peresetene o Amerika, ma o lo o fa’atali se tuuina mai aloaia o se tali a le ali’i Peretene ia Donald Trump.

 

O lea la ua mae’a le ulua’i asiasiga mo aiga na mafatia, ma ua sauni loa le malo e aga’i atu i tua mo le fa’atinoina o le asiasiga lona lua.

 

O le asiasiga lona lua lea sa amata i le aso Lulu, e toe savalia uma ai nuu uma ma aiga i Tutuila, Aunu’u ma Manu’a, o le a asiasia atoa ai loa vaega uma o meatotino sa fa’aleagaina, e le gata i maota ma laoa, ae o le a aofia ai fo’i pisinisi, aoga tumaoti faapea ai ma Ekalesia.

 

Saunoa Lemanu e fa’apea, o le agaga o le ali’i kovana, ia maua fo’i ni fesoasoani mo vaega eseese uma e pei ona taua e tusa ai o mea sa faaleagaina.

 

Mo meaalofa sa tufatufaina atu e le Koluse Mumu mo aiga na mafatia i le vaiaso nei ma le vaiaso na te’a nei, na maua ai fo’i le avanoa o Lemanu e fa’amanino ai lea tulaga.

 

O le to’atele o tagata ua fa’asea i le le maua o ni a latou fale ie mai le FEMA, peita’i na fa’amanino e Lemanu e fa’apea, e le o aiga uma e maua fale ie mai le FEMA, se’i vagana ai aiga ua matua fa’aleagaina lava maota ma laoa, ma ua leai se isi nofoaga e mafai ona sulufa’i i ai.

 

E pei ona fa’amanino e le Lutena Kovana e fa’apea, e 3 vaega sa fa’atautaia i ai le asiasiga mo maota ma laoa i aiga i le atunu’u. O le vaega muamua o i latou ua taua ua fa’aleagaina fale pe ua pauu i lalo (destroy), o le vaega lona lua o i latou ua tele vaega o fale ua faaleagaina ae o loo tutu pea fale (major damage), ma le vaega lona tolu o aiga e laiti vaega sa faaleagaina o maota ma laoa (minimum damage).

 

“E talosaga atu i le atunu’u ina ia lava pea le onosa’i ma fa’atalitali mai i le asiasiga lona lua a le malo lea ua toe amata fa’ataamilo atu, mo le fa’amae’aina o le vaega mulimuli o faamaumauga a le malo. E faailoa atu i le atunu’u, e leai se isi e misi i lenei asiasiga lona lua, e tatau fo’i ona tatou galulue fa’atasi ma Alii Mautofi ma Pulenu’u i le tu’ufa’atasiga o fa’amaumauga e mana’omia i lenei asiasiga”, o le saunoaga lea a Lemanu.