Ads by Google Ads by Google

Faamanino Kovana le mafua’aga o le fa’aiuga a le malo

ausage@samoanews.com

Na fa’aaoga e le afioga i le ali’i kovana ia Lolo Matalasi Moliga le fonotaga a lana Kapeneta i le vaiaso na te’a nei, e fa’amanino ai le mafua’aga o le fa’aiuga a le malo ua faia, e tu’u atu ai le fausiaina o galuega tetele o lo o fa’agasolo a le malo i le taimi nei i le Matagaluega o Galuega Lautele a le malo.

 

O galuega tetele ia e lua e aofia ai le fausiaina o le Fale Fou mo Mata’aga a Amerika Samoa, atoa ai ma le toe fa’afouina o le Ofisa autu o Leoleo i Fagatogo, lea na fa’atamaia i le afi i le masina na te’a nei.

 

Saunoa Lolo e fa’apea, talu ai e le i fuafuaina i le tala fa’atatau o tupe fa’aalu a le malo le fa’atupeina o galuega tetele e lua e pei ona taua, o le mafua’aga lea ua tu’u atu ai le fausiaina o ia galuega tele i le Ofisa o Galuega a le malo, latou te fesoasoani mai ai i le tau fa’amamaina o le galuega.

 

E ui e le i fa’atulagaina ni tupe e fausia ai nei galuega tetele, peita’i na taua e Lolo le taua tele o galuega nei, o ni galuega foi ua leva na tatau ona fausia.

 

“Aua tatou te fefefe i le leai o ni tupe e fa’atino ai galuega nei, o ni galuega taua ua leva na tatau ona fausia, ma ua tatau fo’i ona tatou galulue e saili ni tupe e fa’amae’a ai,” o le saunoaga lea a Lolo i lana Kapeneta.

 

I le fonotaga a le kovana ma lana Kapeneta i le masina o Oketopa ua mavae atu, sa ia lu’iina ai Fa’atonusili ina ia tofu le Ofisa ma le sao i le fa’amae’aina o galuega e lua e pei ona taua.

 

Saunoa le ali’i kovana e fa’apea, o le galuega i le Fale Mata’aga e pei ona tatalaina i lalo ma le fa’amoemoe e toe fausia se fale fou, o se galuega ua leva na tatau ona fausiaina. Sa ia taua i le aoga tele o lenei Fale, lea o lo o teu malu ai measina e fa’atatau i le soifuaga ma le olaga moni sa ola mai ai Samoa i aso ua mavae.

 

Saunoa Lolo e fa’apea, e le mafai ona iloa e tupulaga ma tagata le taua o lenei Fale, pe afai e le gaioi le malo e fausia ma amataina loa se galuega fou.

 

O le galuega mo le toe fa’afouina o le Ofisa o Leoleo na fa’atamaia i le afi, e le o se galuega sa fuafuaina mo le tausaga tupe lenei e pei ona saunoa le ali’i Kovana. Ae ui e le i fuafuaina, na taua e Lolo le tatau lea ona vaai toto’a le malo i le fa’atinoina lea o lenei galuega, ona o le isi lenei Ofisa e sili ona taua lona sao i le tautuaina o le atunu’u, aemaise lava i le suesueina o mataupu tau solitulafono.

 

E i le va o le $3 i le $4 miliona le tupe na taua e le ali’i kovana e tatau ona fa’atupe ai le toe fa’afouina o le ofisa o Leoleo.

 

O le galuega e 3 i ai galuega tetele a le malo o lo o fa’agasolo i le taimi nei, o le galuega mo le maota fono fou, lea o lo o fa’atali le fa’amaeaina o le ata o le fale, ona amata aloaia loa lea o le galuega.

 

Na fa’amanino e le ali’i kovana i le fonotaga ma lana Kapeneta ia Oketopa, le mae’a lea ona i ai o le vaega tupe e amata ai le galuega o le maota fono fou a le atunu’u, lea e maua mai i le tupe o le aitalafu o le Pone, atoa ai ma le isi vaega tupe o lo o fa’amatu’u mai e le Initeria, ae o le vaega o le tau o le galuega e totoe ai, o le vaega tupe lena e saili mai lava e le Fono Faitulafono e fa’amae’a ai le galuega.

 

Saunoa le ali’i Kovana e fa’apea, ua leva na tatau ona i ai se maota fono fou a le atunu’u, e tua i ai tulaga o ana upu fai fa’avaomalo.