Ads by Google Ads by Google

Faamanino Komesina mataupu o loo faasea ai to’atele o Leoleo


Le komesina o Leoleo ia Le’i S. Thompson i le taimi na asia ai le tula’i fa’aaloalo a ali’i ma tamaitai leoleo, i le aso na fa’ataua ai le tautua a Leoleo i le atunu’u i le amataga o le tausaga nei. [ata AF]
ausage@samoanews.com

Ua fa’amanino e le afioga i le ali’i Komesina o Leoleo ia Le’i S. Thompson i le Samoa News e fa’apea, e le sa’o le mataupu o lo o fa’asea i ai ni isi o Leoleo a le Matagaluega, i le auala na fa’atautaia ai suega e sii ai tulaga o Leoleo mo le fa’atinoina o a latou galuega.

 

Na taua e le Komesina e fa’apea, sa sa’o lava le auala na faia ai le suega, e le i faia fa’alilolilo ona o se taumafaiga ina ia pasi na o se vaega o Leoleo, pe na faia fo’i i se auala e taofia ai se isi vaega o Leoleo mai lo latou pasia o le suega.

 

Na taua e Leoleo na fa’asea le fa’ateia o i latou i le maua atu o le fa’aaliga, o le aso e sosoo ai ua fa’atulaga e faia ai le suega e si’i ai tulaga i totonu o le Matagaluega, e aunoa ma le logoina atu muamua o i latou ina ia lava ai le taimi e sauniuni ai mo le seuga.

 

E i ai fo’i lo latou talitonuga sa tatau ona tofia ni isi Matagaluega a le malo latou te fa’atautaia le suega, po o ni tagata fa’apitoa fo’i mai fafo, nai lo le toe fa’atulaga lava e sui sinia o le Ofisa o Leoleo o le suega ma faatautaia e i latou.

 

“Talu ai o le vave o le taimi na tuuina mai ai le fa’aaliga mo le suega, na mafua ai loa ona to’atele Leoleo e le i su’e i le suega, ma ua misi atu ai ma le avanoa e mafai ai ona si’itia o latou tulaga. E i ai fo’i lo’u talitonuga, o le to’atele o Leoleo o lo o umia pea tulaga maualalo i totou o le Ofisa o Leoleo i le taimi nei, ua tatau ona siitia o latou tulaga i luga, ua tele tausaga o le latou auaunaga i le matagaluega o Leoleo ma le malo,” o le vaega lea o le fa’asea a se tasi o Leoleo.

 

O suega e pei ona fesiligia e ni isi o Leoleo, sa fa’atautaia i le potu fono a le Ofisa o Taavale afi i Tafuna (OMV), mo Leoleo uma e fia maua le fa’ailoga o le Lutena, Satini ma le Kapeteni. O le suega mo Taitai Sinia (Commanders) sa fa’atautaia lea i le potu fono a le Ofisa autu o Leoleo i Fagatogo.

 

Saunoa Le’i e fa’apea, e leai se mafua’aga e tatau ai ona ta’u mamao i Leoleo le taimi ma le aso o le suega. O le tiute o le Leoleo e pei ona a’oa’oina ai o ia, ia malamalama i le tulafono o lo o ia fa’amalosia, aua o vaega uma ia o lo o aofia i le suega.

 

“Soo se tagata ua taua o le Leoleo fa’auuina, ua uma ona fa’atauto, e tatau ona sauni i soo se taimi e fesiligia ai o ia e fa’atatau i le tulafono. E le fa’apea o fiafia e malolo ma livi mai le galuega, ae a oo i taimi o suega ona mana’o lea e si’i lona tulaga. E le fa’apena le fa’atinoina o galuega a le Matagaluega o Leoleo, e te le maua fua se fa’ailoga, e tatau ona sii lou tulaga ina ua mautinoa ua e ausia togi talafeagai o le suega,” o le saunoaga lea a Le’i.

 

Na faamaonia e Le’i le to’atele o Leoleo ua silia i le ta’i 10 tausaga o galulue i le galuega, ae le o i ai lava ni o latou tulaga. O le isi lena mafua’aga o lo o ia unaia ai Ta’ita’i ina ia fa’amalosia Leoleo i le fa’atinoina o a latou galuega, aua o le isi lea auala e mafai ai ona maua togi e fa’aopoopo i le togi o le suega, ma mafai ai ona siitia le tulaga o le tagata.

 

“O le mataupu e fa’atatau i le siitia o tulaga, matou te talanoa ai mava ma Ta’ita’i Leoleo i soo se taimi matou te fono ai. Ou te fa’amanatuia fo’i ia te i latou le tatau lea ona logo Leoleo e sauni i soo se taimi. E le avea fo’i le umi o le tautua i le matagaluega ma auala e manatu ai le Leoleo, ua agava’a o ia i lona umia o se tulaga faapitoa. E tatau lava ona ia ausia togi ma tulaga uma e mafai ai ona sii lona tulaga, ma o ni isi o ia togi e maua mai i le suega, atoa ai ma le fa’atinoina o lau galuega, atoa ai ma lou malamalama lelei i lau galuega o lo o fai,” o le isi lea saunoaga a Le’i.

 

O se tasi o tulaga e taua tele mo le Leoleo pe a sii lona tulaga, e fesoasoani ai i le faia o faaiuga i le taimi o le galuega.

 

Saunoa Le’i e fa’apea, tusa lava pe laititi le Leoleo e pei ona taua e le to’atele o le atunu’u, afai na te umia se tulaga i totonu o le Ofisa o Leoleo, o le isi lena itu e ta’u atu ai le matua o le tofa e fa’atino ai le galuega ma faia fa’aiuga.

 

I le fa’aiuga o lana saunoaga, sa ia fa’afetaia ai ali’i ma tama’ita’i Leoleo i le galuega fita o lo o latou fa’atinoina i aso ta’itasi, o le tausiaina lea o le saogalemu o le atunu’u atoa.