Ads by Google Ads by Google

Faamanino Komesina le autu o le osofaiga a Leoleo i Petesa

ausage@samoanews.com

I le tele ai o finagalo eseese o le atunu’u e fa’atatau i le osofaiga a Leoleo lea na faia i Petesa i le aoauli o le aso Tofi o le vaiaso na te’a nei, ma tapunia ai se vaega o le auala e aofia ai ma le aveesea fa’amalosi o fanau ma faiaoga mai le aoga tulaga muamua a Tafuna, na maua ai le avanoa o le afioga i le Komesina o Leoleo e fa’amanino ai le autu o lea osofaiga.

 

Na fa’amanino e le tofa Le’i Sonny Thompson i sana imeli i le Samoa News i le fa’aiuga o le vaiaso na te’a nei e fa’apea, o le autu o le osofaiga a Leoleo, o le fa’ataunu’uina lea o se poloaiga na sainia e le Fa’amasinoga Maualuga, e mafua mai i le mataupu o lo o molia ai se alii i le faaoolima i le tulaga muamua, taumafai e faaoo le oti i se tagata i le tulaga muamua, fa’aaoga fa’asolitulafono o a’upega, atoa ai ma le umia o se a’upega e fa’asaina i Amerika Samoa.

 

Na fa’amanino atili e Le’i i le Samoa News e fa’apea, e leai ni fana na fa’apapa i le taimi o le osofaiga a Leoleo.

 

E leai se isi fa’amatalaga auiliili na tuuina mai e le Komesina e uiga i lenei mataupu.

 

E tele fesili na tuuina atu e le Samoa News i le ali’i Komesina e tusa ai o le osofaiga a Leoleo, peita’i e le tali mai ai o ia.

 

Sa fesiligia le Komesina pe na maua e Leoleo i le latou osofaiga ni a’upega poo ni fualaau fa’asaina. Sa fesiligia pe sa i ai se tagata poo ni tagata na taofia mai le osofaiga. Ae pe fa’amata o le osofaiga fo’i lea e fesoota’i ma le mataupu lea o lo o tu’uaia ai ni ali’i se to’alua i le tafanaina lea o se ta’avale a Leoleo i le masina o Tesema o le tausaga na te’a nei i tua o le lotoa a le Ofisa o Fesootaiga a Amerika Samoa (ASTCA) i Tafuna.

 

E eseese lagona na fa’aalia e le atunu’u e tusa ai o le osofaiga a Leoleo i le vaiaso na te’a nei. O ni isi sa latou fa’aaliga lagona le fiafia ma le fa’asea i le auala na fa’atautaia ai e Leoleo le osofaiga, ae o ni isi sa latou fa’afetaia le Komesina ma le Ofisa o Leoleo, i le galulue malosi pea e sailia i latou o lo o fa’atinoina gaioiga fa’asolitulafono ina ia molia ma taofia i le toese.

 

O le osofaiga na fa’atautaia lea e le Vaega Faapitoa e Sailia Fualaau Fa’asaina a Leoleo. Sa fa’aaupegaina uma Leoleo i le taimi o le osofaiga.

 

Na taua e se tasi o Tina matua na alu atu e piki lana fanau e aooga i le aoga a Tafuna Elementary lona le fiafia i le auala na fa’atino ai le osofaiga a Leoleo, ona ua avea le feoa’i o Leoleo ma auala ua oso ai lagona fefe i fanau aoga atoa ai ma lana fanau.

 

Na taua e le Tina e fa’apea, sa tatau ona filifili lelei le Komesina i se taimi talafeagai e fa’atino ai le latou osofaiga.

 

“E le gata ua fa’alavelave i feoaiga a tagata, taofia ai le auala, ae ua tutupu ai fo’i lagona fefe i fanau aoga ma la’u fanau. Ina ua ou alu atu e piki mai la’u fanau, sa latou fesili mai ia te a’u poo ai le la ua tafana e Leoleo”, o le saunoaga lea a le Tina na fa’asea.

 

O lagona fa’asea lava fo’i ia na fa’aalia e ni isi o matua ma tagata e nonofo latalata ane i le nofoaga na fa’atino ai le osofaiga a Leoleo.

 

Ae na taua e se tasi o Tina matua e alala latalata i le fale lea na osofaia e Leoleo, lona matua lagolagoina o le galuega a le Komesnia ma Leoleo o lo o fa’atinoina, ina ia mafai ai ona fa’aitiitia faiga fa’asolitulafono o lo o tutupu i le atunu’u.

 

Na taua e le Tina matua lea e fa’apea, soo se osofaiga lava a Leoleo e sailia ai fualaau fa’asaina, a’upega, poo tagata solitulafono, e le tau fa’ailogaina se taimi poo se aso e faia ai, ae fa’atino pe afai ua silafia e Leoleo ua talafeagai le taimi ma le aso.

 

“E tatau ona sauniuni uma tagata i soo se taimi e tutupu ai faalavelave faapenei. Ua tele suiga ua i ai Amerika Samoa i aso nei, ua ofi mai ai faiga mai fafo ma ua televave fo’i le olaga. O fualaau fa’asaina, fana ma isi amioga o loo tutupu i atunuu i fafo ua vaaia fo’i i Tutuila ma Manu’a, ma ua mana’omia ai le fesoasoani a Leoleo ina ia fa’aitiitia nei faiga leaga, o le mafua’aga lea ou te matua lagolagoina ai lava le osofaiga a le Komesina ma le Ofisa o Leoleo”, o le saunoaga lea a lea Tina matua i le Samoa News.