Ads by Google Ads by Google

Faaliga vaega gataifale o Aua i le 100 tausaga talu ai!


O se va’aiga lea i le gataifale ina ua pu’eina lea ata i le tausaga e 1917. O se va’aiga i le olaola ma ituaiga amu eseese sa i ai. [ata: Leua Aiono Frost]

O se va’aiga i meaalofa na taua’aoina mo Dr. Birkeland ma Dr. Green mai le NMS o Amerika Samoa ina ia fa’ailoa ai le latou agaga fa’afetai mo le tele o taimi sa la’ua tu’ufa’atasia ai lipoti fa’amaumau o le tatou gataifale ma ona puna’oa. [ata: Leua Aiono Frost]

O se vaaiga i le Level 7 -8, a Laulii Elementary ma le ali’i saeanisi Dr Birkeland ma le tama’ita’i saeanisi o Dr Alison Green mai Ausetalia i le aso Faraile ua te’a. [ata: Leua Aiono Frost]

O le aso Faraile ua te’a, sa vala’aulia fa’apitoa ai a’oga tulaga muamua e fa, e fa’afofoga i fa’amaumauga fa’aeletoronisi ua mae’a tu’ufa’atasia e le vasega o ali’i ma tama’ita’i saeanisi sa asia le atunu’u ma latou fa’amaumau mai le tele o ata ma fa’amatalaga e fa’atatau i le gataifale, amu, a’au ma i’a sa maua ai e tusa o le 100 tausaga talu ona faia pea nei galuega lelei.

 

E na’o le tasi le a’oga tulaga muamua na mafai ona auai i le Tauese P. Sunia Ocean Center i Utulei mo lea fa’amoemoe. O le tala mai isi aoga, ua le mafai ona ua motusia le auaunaga a pasi a’oga.

 

O le a’oga a Lauli’i Elementary School na totogia lava e le a’oga pasi tua mo le vasega 8 ma le vasega 7.

 

O le ali’i saeanisi o Dr Birkeland o se ali’i ua toeititi atoa lona 80 tausaga le matua, suesue auiliilia le gataifale i ituaiga ‘amu o lo’o olaola lelei ai, ituaiga ‘amu o lo’o matua fa’aleleia atili ai le a’au ma ola lelei ai ituaiga i’a eseese e silia ma le 200 ituaiga eseese  i le gataifale.

 

I lana folasaga, sa ia saunia le lipoti talu mai le ulula’i sailliga o le ituaiga ‘amu ma a’au o le atunu’u na fa’amauina i le tausaga 1917 e le ali’i saeanisi o Alfred Mayor mai le Carnegie Institute, ma o se fa’amauga sili ona umi lea ua toe fa’amauina lelei nei e le CRAG [Coral Reef Advisory Group] fa’atasi ai ma isi sailiiliga i luma mai o le 1917 e o’o mai lava i lenei vaitau.

 

E to’alua sui saeanisi ua iloga le la’ua fiafia e o mai so’o i le teritori mo lea galuega - o Dr. Chuck Kirkland ma Dr. Alison Green mai Ausetalia. O i la’ua e ao ina fa’ao’o i ai le fa’afetai tele, aua o taimi sa tau le amana’ia fo’i o tatou gataifale ma puna’oa, ae sa la’ua fa’amauina mai nei fa’amaumauga taua tele, aua ua toe tepa nei i ai, ma toe va’ai toto’a, po’o le a se fa’atusatusaga o na vaitau ma lenei vaitaimi.

 

I lana folasaga lea sa ia fa’ailoa ai, “O le gataifale o Amerika Samoa, i le fa’amaumauga i le tausaga e 1917, ma toe asia mai i le tausaga e 1975, ma toe asia mai foi i le 1985, 1995 ma le 2007, e uiga ese lea i so’o se ogasami i le lalolagi atoa.  E uma ane ona sailia lelei, ua iloga ai e olaola lelei. E le o i ai ma se eseesega tele, e ui ina lutia i le tele o afa, le tsumani ma ituaiga lu’iga ua feagai ma le lalolagi po’o le siomaga ona o fesuia’iga o le tau ma le so’ona vevela o le la, ae o lo’o toe olaola lelei lava ‘amu, le a’au ma i’a o le gataifale lea o Amerika Samoa.”

 

“O lea fa’amaumauga i le tausaga e 1917, ua avea ma fua fa’atatau e fa’ailo ai le ituaiga o ‘amu, le olaola o le a’au, le tele o ituaiga i’a sa maua i le gataifale i na vaitaimi ma lenei fo’i vaitau, ma le tele o a’afiaga sa afaina ai le gataifale, atoa ai ma le fagotaina o le gataifale e kamupani i’a e lua mai le vaitausaga 1950-1960, ae ua iloga, o lo’o lauolaola lelei mea uma i lea lava ogasami patino na fa’amauina.”

 

Sa ia fa’ailoa fo’i se isi mea o lo’o maofa ai le vasega o Saeanisi o lo’o asiasi mai pea ma faia sailiga uma. Ua le mautinoa lava e i latou, “Pe fa’apefea ona tutumau le fa’aleleia pea o le gataifale o Amerika Samoa i ona ‘amu, a’au ma le faitauga o ituaiga i’a e olaola lelei i le tatou gataifale. Na fa’amauina muamua e i latou i vaitau o le afaina o le gataifale le fa’aleagaina o le ‘amu ma le a’au o le teritori, e tele na’ua afa sa lutia ai atu Samoa, peita’i, e toe asia mai i taimi ua sologa lelei ai le folauga a le atunu’u, ua matua toe lelei atoatoa lava mea sa fa’aletonu e pei lava e le’i i ai se afaina.”

 

“O le ala fo’i lea o le gasolo mai pea o tagata suesue o le gataifale i le teritori nei, ona o lo’o taumafai pea lava ina ia sailia, pe se a se mea lilo i o tatou gataifale e mafai ai ona toe fa’aleleia atoatoa lo tatou gataifale ae le mafai e isi malo e pei o Hawaii ma le Atu Malesala poo atumotu o le Maikorenisia,” o se toe fa’aopoopo mai lea a Dr. Birkeland.

 

Sa ia faailoa foi ituaiga o i’a sa maua i na lava tausaga, o loo fa’atumauina. Peita’i ua mautinoa lava lona fa’aitiitia. Ua amata ona le toe va’aia i’a tetele ae maise fo’i o Malie o le sami. Afai ua le mafai ona va’aia nei ituaiga i’a i se a’au po’o se gasami, ua faitauina lea, ua fa’aitiitia lava i’a i le gataifale o se atunuu.

 

“E le tatau lava ona e fagotaina i’a sili na lapopo’a o le gataifale, e le tatau fo’i ona e fagotaina ma ‘ai i’a laiti o le gataifale, ae tatau ona e fagotaina mo le fofoga taumafa i’a e feololo, ina ia le fa’atama’ia le olaola lelei o i’a o le gataifale,” o se tasi lea o fa’amatalaga sa iloga ona fa’amautuina e le fanau.

 

O nei folasaga uma sa mua’i fa’aalia muamua i le maota o le galuega i Aua, ma ua mae’a fa’ailoa ai i le mamalu sa auai i le afio’aga o lo’o ua fa’amauina e avea ma autu o suesuega o le gataifale talu mai le lipoti na fa’amauina  i le tausaga e 1917. Na toe iloilo toto’a i le tauaga e 1973, 1980, 1995, 1998, 1999, 2000, 2004 ma le 2007. O le ala lea o le fa’ataua o le tatou gataifale, ina ia mautinoa fo’i o lo’o saogalemu lena itu o le siomaga. Ua fa’ailoa mai ma toe fa’amanatu i le lautele ina ia taofia le fa’alapisi i le gataifale, po’o vaitafe.

 

E ese mai le folasaga a Dr Birkeland, sa i ai foi folasaga a nisi o fanau a le atunuu sa fa’apoopo i le fa’aaliga atoa i le aso Faraile.