Fa'ailoga 30 tausaga ASEPA - fa'afetaia pa'aga galuega fa'amama


O le Fa'atonusili o le ASEPA, Ameko Pato ma le sui mai le USEPA Region 9, Michael Wolfram, o se tasi e tele lona sao i le tele o galuega o lo'o fa'atinoina nei e le ASEPA. [ata: Leua Aiono Frost]

O le taeao ananafi sa fa'ai'u aloa'ia ai le polokalama o le Fa'ataua Lou Siosiomaga - La'u Pasefika, Lo'u Lumana'i - Ia Mataituina A'afiaga o Suiga o le Tau, a le Ofisa o le ASEPA.

 

Peita'i e tolu isi mea tetele sa fa’ataua e le ASEPA i le fa’atasiga ananafi. O le atoaga o le 30 tausaga o lea ofisa, sa amatalia lava na'o se ofisa, i lalo o le va'ava'aiga a le Ofisa o le Kovana Sili. Peita'i o lea avea nei ma ofisa tu maoti o le vaega fa’amalosi tulafono. Ua fa'afaigaluega ai tagata e to'a 34.

 

O le latou Ofisa, o se fale muamua lea ua gafatia ona fa'atautaia ana galuega uma e aunoa ma sana pili e totogia mo se eletise fa'aaogaina, ma o se ulua'i fale lea o lena ituaiga ua fa'atuina i malo fa'aatumotu o le Pasefika.

 

O le keke ma le aiga fiafia a le ofisa, le latou pulega ma le aufaigaluega fa'atasi ma latou pa'aga ua aofia fa'atasi i galuega fa'amama, talu mai le tausaga 2013. Fa'afetaia le galuega, fa'afetai mo le sao o sosaiete, fa'alapotopotoga, ekalseia, afio'aga, aiga, pisinisi ma nisi o Ofisa o le Malo, sa latou tausoa fa'atasi ma le ASEPA, e "Fa'amtagofie ma Fa'amama Amerika Samoa!"

 

Na mua'i faafeiloa'ia le mamalu e le susuga le Sui Fa'atonu ASEPA, Fa'amao Jr Asalele, soso’o ai ma le saunoaga a le Faatonusili, Ameko Pato.

 

"Ua mae'a ona taua'aoina le tusi mai fa'auluuluga o le USEPA e fa'ailoa mai ai i le  Kovana Sili ma ta'ita'i o le malo o Amerika Samoa, o lo'o latou matauina, o lo'o aoga tele i ai tulafono uma tau le ‘Ea Mama’. I lea lava tusi, sa ia fa'afetaia ai le tele o galuega ua mae'a fa'amaumauina ma ua fa'ailoa atu fo'i o lo'o nafa ma leASEPA ina ia tausia le soifua o tagata ma meaola fa'apea ma la'au, ae maise o le Siosiomaga Mama ma Lauolaola o Amerika Samoa aua nei ma a taeao!"

 

O se fa'amalo na ia saunoa mai, "E tatau ia i tatou uma i totonu o lenei potu ona fa'afetaia, aua o lo'o saunoa tonu mai lava ia i tatou uma lenei saunoaga taua, o se fa'amalo i la outou pito la'au tausi e pei ona outou ofo mai ai, le auaunaga ia fa'amama ma fa'amatalagofie le atunu'u, ia saga fiafia mai i ai le to'atele o tagata maimoa, ma maua ai fo'i so tatou taumaoa'iga tausi."

 

Sa ia fa'afetaia fo'i le galuega tima'i mo le fa'ataua o le Siosiomaga Mama ma le Matagofie, i le vasega o tagata faigaluega, le tamaitai o Tumau Lokeni ma Ioane. "O i la'ua lava nei e fa'amoemoe tele i ai le vaega a le ASEPA e faatino ai lenei matata, aua o le auga tonu lea o tiute tau'ave a le ASEPA. Fa'afetai mo la oulua vaega."

 

Na saunoa foi le susuga ia Michael Wolfram, le sui o le USEPA mai Kalefonia Region 1X. O ia lea na te fa'amaonia galuega fa'atino a le ASEPA e ala i fa'atupega, polokalama fa'alauiloa, ae maise o mea e fa'aleleia atili ai le tautuaina o le tatou malo ma lona Siosiomaga.

 

Ma sa ia saunoa fa'amalo i le aufaigaluega ma ta'ita'i i le ASEPA. Sa ia matua fa'afetaia le vasega o pa'aga e to'a 15 nei ua iloga le umi ona faia o galuega fa'amama, ae sa faia lava e aunoa ma se taui.

 

O galuega nei e iloga ai, "E taua tele lo tatou Siosiomaga ia tei tatou uma. E amata mai lava ia te oe le tagata e to'atasi, ma fa'asolo ane ai i le aiga, soso'o ane ai ma fa'alapotopotoga e te auai ai, i le afio'aga ma Ekalesia, Pisinisi  ma Ofisa eseese o le Malo. Ua aotelega le atunu'u atoa i le alofa e fa'amama lo tatou Siosiomaga."

 

Ao le'i mae'a lana tautalaga, sa ia toe lu'ia pa'aga a le ASEPA, e aua le tu'ua le galuega lelei, ae fa'aauau ma le fa'anaunauta'iga, ia mautu i agaga o fanau fai a'e a le atunu'u atoa, ia ola ma fa'amama le siosiomaga.

 

O i latou na taua'aoina "Pepa e Talafua ai Oloa e Fa'aaoga i Fa'amama," e fuafua fo'i le tele o le tau fa'atusa o lea pepa e tala ai oloa, i le tele o fa'amama sa faia e le Sosaiete, fa'alapotopotoga, autalavou po'o le aiga fo'i. O fa'ailoga sa maua e ta'i $1,000;  $500, ma le $300 mo pa'aga e 15.

 

E to'aono i latou na mauaina fa'ailoga e ta'i $1,000: SDA Pathfinder Club i Malaeloa e 29 a latou galuega fa'amama na fa'atino. Autalavou Katoliko mai Fagatogo e 28 latou galuega fa'amama. Failolo Pulenu'u ma lona aiga,  Fa'amolemole Tuiese 28 galuega fa'amama na latou faia. Autalavou Ieova Nese mai Utulei 23 galuega fa'amama sa faia. SDA Autalavou mai Leone 21 fa'amama. Le tina o Iolani Misipeka mai Fagatogo talu mai lava le amataga o le Polokalama o lo'o fa'atino pea e ia ma le aiga le galuega fa'amama.

 

O galuega na taua'aoina Pepa e Tala Oloa ta'i $500: Autalavou Ekalesia New Apostolic Church i Pago Pago. Autalavou New Apostolic Church i Tafuna. Le aiga o Apo Siatuu i Utulei. Autalavou a le Heart of Worship Ministry i Tafuna. All People's Pentecostal Church i Pago Pago. Kanana fou High School e 12 galuega fa'amama. Grafalen's Landscaping mai Tafuna ma le MASI ma le Aiga o Imo i Nuuuli.

 

O i latou na taua'ao i ai Pepa e Talafua ai Oloa ta'i $300: Autalavou a Iakina SDA i Iliili ma ASCC Law & Justice Club mai Malaeimi.

 

O le tulafono mo le fa'aaogaina o "Pepa e Talafua ai Oloa," ua na'o oloa e fa'atino ai fa'amama. Suo, salu u'amea, Sapelu, taga lapisi, uilipaelo, mea uma fa'apena. E ta'ito'alua sui o fa'alapotopotoga ma sosaiete ua mae'a fa'amauina suafa i le faleoloa o le Niel's ACE Hardware i Malaeimi e mafai ona sainia nei pepa e tala ai oloa.

 

O le vasega o pisinisi e matele ina galulue faapa'aga ma le ASEPA e aofia ai: GHC Reid & Co., PPTC Company ma le All Star Signs.

 

Peita'i o vaega eseese o le Malo e matele ina galulue ma le ASEPA i le fa'amama e aofia ai: ASCC - Conservastion of Natural Resources; ASPA, Territorial Energy Office, Dept of Health, DOC, KVZKTV, National Park Services ma Miss American Samoa Inc (MASI).

 

Tagi lomiga o le aso Gafua mo isi tusitusiga i le ASEPA.

Comment Here