Ads by Google Ads by Google

Faaigoa permita malaga ai tagata AS i Samoa o se faiga fa’ailoga lanu

ausage@samoanews.com

Na taua e le afioga i le ali’i Faipule mai le itumalo o Saole, o le pemita a le malo o Samoa lea e tatau ona totogi ona fa’atoa mafai lea ona malaga tagata Amerika Samoa i Samoa, o se faiga e matua fa’ailogalanu lava lea i lona talitonuga.

 

E mafua lea tulaga e pei ona saunoa le afioga Kitara Vaiau, e leai lava se eseesega o le tusi folau Amerika o lo o umia e tagata na fananau i Amerika, ma le tusi folau o lo o umia e tagata na soifua a’e i Amerika Samoa.

 

“E fa’apefea la ona fai mai le malo o Samoa e na o sitiseni Amerika e le mana’omia se pemita e malaga ai, ae o tagata Amerika Samoa e tatau ona totogi le pemita lea, ae tasi lava le tusi folau lea tatou te malaga fa’atasi ai. O se faiga e le amiotonu lea tulaga i lo’u taofi, e fa’ailoga lanu fo’i,” o le saunoaga lea a Vaiau i le taimi o folafolaga a le maota o sui i le vaiaso nei.

 

Na taua atili e ali’i Faipule e fa’apea, ua to’atele ni isi o lona itumalo ua talanoa atu ia te ia, mo se auala e maua ai se fesoasoani mo lenei mataupu, ona ua fai ma fa’alavelave ia te i latou le tau talosaga o le pemita, aemaise lava pe afai o se fa’alavelave fa’afuase’i e mana’omia ai le vave malaga atu i Samoa mo fa’alavelave a aiga.

 

Na faamanino e Vaiau i luma o le maota o sui e fa’apea, e le o le tupe o lo o totogi le mafua’aga o lona fa’asea, ae o le le talafagai o le auala o lo o fa’atino ai e le malo o Samoa lenei pemita, ua atagia mai ai le fa’ataua o tagata sitiseni Amerika ae fa’atuatuana’i tagatanu’u o Amerika Samoa, ae o i laua lava o le uso e tasi.

 

E le o se taimi muamua lenei ua fesiligia ai e afioga i Faipule le mataupu lenei i luma o le maota.

 

Na fa’afetaia e le Fofoga Fetalai o le maota o sui, afioga Savali Talavou Ale le mataupu na fa’atula’i e le afioga i le ali’i faipule mai Saole.

 

Saunoa Savali lona lagonaina o finagalo o tagatanu’u e pei ona fa’ailoa mai e Vaiau, e i ai fo’i lagona eseese o tagata e tutupu mai ai e fa’atatau i le pemita ua fa’atula’i e le malo o Samoa mo Amerika Samoa.

 

Ona o ia tulaga, na taua ai e Savali lona sauni e fa’ailoa atu i le Kovana lenei mataupu, ina ia avea o se tasi o mataupu e talanoaina i le Fonotaga a Samoa e 2, lea ua fuafua e usuia i Samoa i le masina fou.

 

Na taua e le afioga i le ali’i Faipule ia Toeaina Faufano Autele le taua tele o le mataupu, ae o se mataupu fo’i e manaomia ai le futana’i o Ta’ita’i o malo e lua i le sailiina o se fofo.

 

Sa ia taua fo’i lona finagalo e fa’apea, e le o le tupe le mafua’aga o lagona fa’asea o ni isi o le atunu’u, ae o le le talafeagai pe a mafaufau atu i le tulaga o le tusi folau o lo o umia e tagatanu’u o Amerika Samoa.