Ads by Google Ads by Google

Faafetaia e matua ma fanau le agalelei o le malo


Le taimi na tufatufa atu ai e sui o le Komiti pepa taumafa i fanau ma le to’atele o le atunu’u sa auai i le fa’amanatuina o le 118 tausaga o le fu’a a Amerika Samoa i le vaiaso nei i le malae taalo i Tafuna. [ata AF]
ausage@samoanews.com

A saili se isi vaega sa pito sili ona fiafia i ai le to’atele o le mamalu o le atunu’u i le fa’amanatuina o le 118 tausaga o le fu’a a Amerika Samoa i lenei tausaga, o le tulaga i pepa taumafa maua fua o lo o fa’aauau pea ona maua e le atunu’u mai le faigamalo a Lolo ma Lemanu.

 

Na molimauina e le Samoa News le lolofi atu o le atunu’u i tagata matutua, o talavou aemaise ai fo’i fanau laiti i le faleie sa tufatufaina ai e le Komiti pepa taumafa, mo le tauaaoina o a latou pepa taumafa maua fua e $6 mai le malo.

 

Na vaaia le lau fofoga fiafia o le mamalu o le atunu’u a o aga’i atu e piki mai a latou pepa taumafa.

 

E ui i le susu ma le palapala o le itu e aga’i i le faleie sa tufa ai pepa taumafa, ae le i fa’atafa ai le atunu’u ona o le faleie lea o lo o maua ai le taumafa maua fua.

 

“O Samoa lava ia e fiafia i soo se mea e maua fua e aunoa ma se tupe e alu ai”, o le saunoaga fa’a ataata lea a se tasi o Tama ao tutu ma nai ona alo e to’atolu i le laina.

 

E te aga’i atu i le faleie ona muamua lea oomi lou aao taumatau i le fagu Bingo, ona fa’atoa piki lea o lau pepa taumafai. O lea fa’ailoga ina ia iloa ai ua mae’a ona maua lau pepa taumafa, ma taofia ai le toe alu atu fa’alua o se tagata i le laina.

 

E le i umi ona taunu’u le Samoa News i le nofoaga o lo o tufa ai pepa taumafa ae faalogoina loa ua fa’apea le saunoaga a se sui o le Komiti.

 

“Faatali ali’i, ua uma ona avatu lau pepa analeila ao lea fo’i ua e toe sau”, o le saunoaga lea a le sui o le Komiti i se ali’i laititi pe a ma le 9 tausaga.

 

Na tu le ali’i ma valu lona ulu ona fa’apea lea, “O lo’u kei ga fai mai ou ke koe sau”. Na tuu e le sui o le Komiti le pepa taumafa i le lima o le ali’i lea ma lana saunoaga na fai i ai, “Alu laia aua e te toe sau i le laina”.

 

O le fonotaga mulimuli a le afioga i le ali’i Kovana ia Lolo Matalasi Moliga ma lana Kapeneta ao lumana’i ai le fa’amanatunia o le fu’a o lenei tausaga, sa toe fa’amautuina ai e le ali’i kovana le taua tele o pepa taumafa o lo o tufa fua atu mo le atunu’u.

 

O lona finagalo, aua ne’i avea o se tulaga faigata i tagata o le atunu’u le leai o se tupe e fa’atau ai se meaai mo le fanau, ma itu o le a misia ai le oo atu e molimauina polokalame a le malo i aso taua fa’apenei.

 

Saunoa Lolo, o le tiute o le malo o le faia o mea lelei uma e fesoasoani ai i le atunu’u, aemaise lava i tagata ma aiga lima vaivai.

 

Na fa’afetaia e le to’atele o le atunu’u aemaise matua le finagalo o le Kovana ma le malo, e ala i pepa taumafa o lo o fa’aauau pea ona maua fua e tagata i aso o le fu’a i tausaga ta’itasi talu mai le 2013.

 

“O se fa’amama avega tele lea mo a’u ma le fanau. E to’a 4 la’u fanau, e fia o mai uma fo’i e matamata i le fu’a, ae o le fa’alavelave, e le lava le tupe e aai ai pe a tagi mai i se meaai. Ae ua avea pepa taumafa maua fua ua le toe popole ai lo’u loto i se meaai, aua o lea ua tofu lava le tamaititi ma le ipu meaai na maua mai i le malo”, o le saunoaga lea a Falani Ulisese i le Samoa News.