Fa’auu puleaoga Matatula mai Capella University

Fa’aletino Sala Roberts faauu mai le Capella University  [ata foai]

I le fa’au’uga a le Capella University i Minneapolis, Minnesota ia Aokuso, 2016 na savali ai le tama’ita’i Pule A’oga mai Matatula Elementary, Fa’aletino Sala Roberts, i le solo a le vasega fa’au’u e talia lona fa’ailoga “Doctor of Education.”

 

Na mafai ona maua le avanoa e talanoa ai ma lenei puleaoga, aua e ui lava ina loa le auaunaga i le Matagaluega o A’oga, ae o lo’o va’aia le taumafai pea ina ia ausia fa’ailoga maualuluga ia atili ai ona fa’aleleia tomai e aoaoina ai fanau, ma aga’i ai fo’i i luga le la’asaga e atia’e ai fanau a le atunu’u.

 

“O le taumafaiga e le faigofie, aua e le o motusia le soifua faigaluega e tautua fanau, o tausi aiga ma mea uma e faia i totonu o aiga Samoa, o le ala lea e le mapu ai le tausaili i la’asaga fou e fa’aleleia ai le agava’a,” o le fa’asoa mai lea a Roberts i le Samoa News.

 

“O se fa’ata’ita’iga lelei fo’i lea i fanau uma lava ua fai aiga ae le’i uma aoga kolisi po’o a’oga maualuluga, aua le motusia pe mate ai lou naunauta’iga e fa’aauau au a’oa’oga. Punoua’i pea i ai,e maua lava le taui lelei i le tagata tauivi i a’oa’oga.”

 

Ua atoa le tolu tausaga o avea Roberts ma Puleaoga i Matatula, peita’i na mua’i avea ma Sui Pule Aoga i Manulele Junior High, Lauli’i, Matatula ma Alofau mai le 2000 -2013, ao ia umia le fa’ailoga Master of Arts in Education mai San Diego State University.

 

Mai le tausaga 1992 i le 2000, sa avea ai o ia ma Faufautua Fa’apitoa i le aoga Maualuga i Fagaitua mo Faiaoga, ao umia e ia le fa’ailoga Bachelor of Science in Business and Psychology mai Portland State University na fa’au’u mai ai i le tausaga e 1981. Na amata lana tautua i le Matagaluega o Aoga  i le avea ai o ia ma faia’oga i le 1982 seia oo i le 1992 ma sa faiaoga ai i Samoana High.

 

“O le aoga lea o fa’ailoga na tausaili, ia fa’aleleia atili ai le auaunaga mo le matagaluega o aoga ae maise lava o le mataituina lea o faiva o faia’oga ina ia aga’i i luma le atamamai o fanau a le atunu’u,” o a Roberts lea.

Comment Here