O le malumalu o le Ekalesia Fa'apotopotoga a Iesu i Samoa i le afio'aga o Fagatogo na fa'aulufaleina i le aso Faraile ua te’a. Na faia le sauniga o le fa'apaiaga ma tala ai faitoto'a mo le ulufale o i latou uma na auai, e fia maimoaina le Nila o le Atua i lea fo'i tovine i Fagatogo lava, ma sa taita'ia lea sauniga e le susuga le Toeaina Fiti Aloali'i, Ta'ita'i Matagaluega EFIS Upolu a'o le Sui Ta'ita'ifono Aoao a le EFIS.

O le sauniga i fafo, sa taita'ia lava lea e le Fa'afeagaiga a le CCJS Fagatogo Toeaina Foma'i Fa'amao Asalele, ma o ia fo'i sa taua'aoina i ai le Tusi Pasi mai le Matagaluega o Galuega Lautele a le malo, ua agava'a ai le Malumalu mo sauniga i le Atua ma isi galuega a le Ekalesia e pei ona manatu ai i latou.

O le o'otiga o le Lipine sa tu'uina aloaia lea i le faletua o le afioga le Kovana Sili, le tina o le atunu'u Cynthia Malala Moliga.

Na soso'o lea ma le sao o le susuga le Agaiotupu, East & West Construction le susuga Robert Uta'i na taua'aoina ai le Ki o le faitoto'a o le Malumalu.

Na tofusao sui vala'aulia iloga o le Ekalesia i ona Fa'afeagaiga galulue i Niu Sila, Ausetalia ma Amerika i le sauniga.

O le Toeaina Taitai Matagaluega EFIS Ueligitone, NZ sa ia si'itia le tatalo fa'apitoa o le sauniga i le amataga. Ina ua mae'a le tala o le galuega ma vaega o le sauniga ona soso'o lea ma le tatalo o le fa'apa'iaga na si'itia e le Toeaina Taitai Matagaluega EFIS mai Daly City, Kalefonia, Farao Mauala Sanerivi Wendt.

O le Faitauina o le Tusi Pa'ia sa fofogaina e le Toeaina Taitai Matagaluega EFIS mai Seattle Washington, Moyer Tiualii Ueligitone Viena.

O le tala o le galuega na nafa lea ma le susuga le Toeaina Fomai ia Asalele, lea sa ia tolaulauina ai le tala o le galuega i Fagatogo mai lona amataga, e pei ona fa'aiugafonoina e le fonotele i so'o se taimi e fa'atino ai sauniga o fa'apa'iaga.

"E moni e leai se mea e faigata i le Atua! Aua e ui ina vaivai, ae faia ia mafai, e ui fo'i ina malolo atu nisi ua momoe a'o taumafaia lenei galuega, ae le'i tu'ua ai, o lea ua tula'i ma ua tino mai ata na moemiti i ai, fa'afetai e fo'i i le Atua i lona fa'amalosi mai."

Na ia mua'i fa'ailo mai alofa'aga mo le Ekalesia, ua avea ma fa'amalo ona ua a'e manumalo faiva na feagai ai ma le Matuaofaiva ma le falefala o le Aiga Salemalama, ae maise o le Ekalesia sa latou faia le faiva o le fa'aoloolo ma'au ia mae'a le Nila o le Atua.

O i latou na fa'ao'o mai a latou fa'amanuiaga e aofia ai nisi iloga a le Ekalesia o lo'o i fafo,  ae maise o nisi o Fa'afeagaiga galulue a le EFIS i si atunu'u o le lalolagi.

Mai le tausaga 1938 na amata mai ai lenei tovine, ma sa amata e le Toeaina Levi ma Salilo ma o le Ekalesia Fa'apotopotoga a Iesu i Samoa o se tama na fofoa mai i le LMS po'o le EFKAS e pei ona avea ai o ia ma ulumatua na ulua'i maua le sulu o le Atua i le Atu Samoa.

I lea tausaga sa mua'i faia sauniga a le Ekalesia i le Falevali o le US Navy i Fagatogo. Soso'o lea ma le si'itia ane i le Faletusi o le Malo o Amerika Samoa, sa faia lava maliliega a le Malo mo lea tulaga.

O le tausaga e 1963 na fa'ato'a mafai ai ona amata fausia le Malumalu muamua ma fa'aulufale ai i le tausaga 1967. O lea malu na umi ona faia ai sauniga ma o le latou Fa'afeagaiga sa fa'aulufale le malu ua galulue ai o Rev. Siulagi ma Fuarosa Solomona.

Malolo lena fa'afeagaiga ma le faletua ae o'o mai le tautua a Rev. Mauala Sanerivi ma Susie Wendt. Na fa'apasia ina ia fausia se malumalu fou i lona fo'i vaitau o lana tautua ae na toe suia ina ia faia na'o se fa'afouga. Na faia galuega ma ua i'u ane, ua foliga mai lava ua toe fou mea uma, ona tu'ua lea e le Fa'afeagaiga Toeaina Mauala le galuega ia Aperila 5, 2009.

Tula'i mai, Fa'amao ma Perise Asalele e fa'aauau le galuega, lea na toe sasa'a fo'i le fafao a le fonotaga a le Ekalesia e fausia se malumalu fou i le tausaga 2001, ma amata ai loa galuega saili le tupe.

Piki fo'i e le Ekalesia le Komiti mo le fausaga o le Malumalu. O le susuga Peseta na te tusia le ata, ma sa pasia fo'i e le Komiti le ata lenei. Saili ai e i latou le Konekarate mo le galuega, e fa kamupani sa fa'aulu latou ofo, peita'i na taua'aoina le galuega i le East & West Construction.

Na fono le ekalesia ma pasia ai le ta'ita'i o le galuega mai le Ekalesia o le susuga Vaipuna P. Foifua e tula'i lea tofiga, ina ia mautu lelei galuega e feso'ota'i lelei fo'i o ia ma le afioga le Matuaofaiva ma le aiga Salemalama.

O Setema 20, 2016 na tu'u ai i lalo le Malumalu Tuai mo le vaiaso atoa, ona amata ai lea o le galuega fausia ia Setema 29, 2016 peita'i ua mae'a lelei ia Fepuari 2018, ma ua fa'aulufaleina ai.

O le tau aofa'i o le galuega ua tu'ufa'atasia mai e le Komiti e $568,400. Alofa'aga na tu'ufa'atasia mai e $31,000. E leai se nogatupe ma e leai fo'i se Aitalafu o le galuega lenei ua tatou fa'apa'iaina. O le fa'afetai ia te outou i ala eseese sa outou foa'i ai mo lenei fa'amoemoe, ua tula'i ma ua va'aia fo'i fua o lo outou a'ao mafola.

O le fata fo'i e osi ai le taulaga sa faimeaalofa mai ai tama o le Ekalesia ma Ipu ma tapenaga uma na fa'ameafale ai Malu o le Atua na faimeaalofa mai ai fo'i nisi o tina o le Ekalesia, ua silafia e le Atua nei foa'i aoga uma.

Peita'i na fa'ailoa e le Toeaina Fa'amao Asalele, "O le 80% o le tupe atoa na fausia ai lenei malu o lo outou a'ao foa'i, fa'afetai fa'afetai, e tali le Atua i lau fo'a'i.”

Ina ua mae'a sa tula'i fo'i le ta'ita'i mo lana lauga o le sauniga mamalu o le fa'apa'iaga ma sa ia toe fa'amalo ai i le Ekalesia loto tetele ma le galulue punoua'i, aua e le o le to'atele ae o loto ia 'autasi i le fa'amoemoe e tasi ua vala'auina ai e fa'atino ma fai ia mafai.

O pese ma vi'iga o le Atua na fofogaina uma e le Aufapese Tu'ufa'atasi Ekalesia Fa'apotopotoga a Iesu i Samoa i Amerika Samoa nei lea na ta'ita'ia ai e Flo Wendt, e tele Salamo sa peseina e i latou i lea sauniga mamalu.