Ads by Google Ads by Google

Fa’au’uga 4 kosi eseese faatautaia Matagaluega o Tupulaga & Tina


O se vaaiga i le to’a 48 o i latou na fa’au’u i le aso Faraile ua te’a mai kosi eseese sa faatauaia e le Matagaluega o Tupulaga Talavou ma Tina a le malo. [ata: Leua Aiono Frost]

O le aso Faraile ua te’a sa faatautaia ai le fa’au’uga o kosi eseese e fa sa fa’atautaia vasega mo le 3 masina e le  Matagaluega o Tupulaga Talavou ma Tina a le malo ma sa faia le fa’au’uga i le Fale Ta’alo o le malo i Pago Pago.

 

E to’a 48 i latou na fa’ai’u lelei i nei kosi, ma ua taua’aoina fo’i o latou Tusi Pasi, e faamaonia lelei ai, o latou agava’a ua mae’a a’otauina ai nei, ma ua agava’a fo’i ona fa’atutuina ai ni pisinisi laiti e i latou ua mae’a fa’au’u mai nei vasega.

 

O kosi eseese nei e aofia ai le Lolomi ma le Gaosia o le Elei; O le Tui Teu, O le Kuka ma le Kosi Komipiuta, e aoa’o ai tina talavou ae ua amata aiga ma ua le fa’aauauina ai latou a’oga.

 

Na saunoa le Sui Faatonu Pa’u Roy Ausage ma ia faailoa, “O lenei taumafaiga ina ia matua maua’a ni tomai fa’apitoa mo Tina talavou, tina matutua fo’i ua saili ni tomai e aoga i totonu o lotoifale o latou aiga, ae maise le fatuaiga tausi a le tina lava ia, ae tainane fo’i ia fa’aauupegaina ai i latou ina ia sailia tomai e agava’a ai i ni galuega e fia tautua ai i le atunu’u, aiga ma ekalesia.”

 

“O le aoga lea o le matagaluega, ina ia saili faiva e fa’asoa atu mo le mamalu o tupulaga talavou ae maise fo’i o Tina o le atunu’u,” sa fa’amae’a mai ai lana tautalaga taua.

 

O le polokalama fa’asolo mo lea aso lautogia, sa fa’atautaia e le fa’atina o le matagaluega, Ramona Malepeai Toeaina. O le taulaga si’itia sa lafo lea i le faletua o le Fa’afeagaiga AOG Della Fia Fuimaono mai Iliili.

 

O le au fa’auu e aofia ai le vasega Kuka e to’a 18 i latou, Tui Teu Fugala’au e to’a 14, Vasega Elei e 11 ma le Kosi Fa’a-Komipiuta e e to’alima.

 

O le avanoa o faia’oga o nei kosi, sa maua fo’i ma o se latou toe tima’i lea i le vasega fa’aiuaso a’o le’i tala atu i tua, e faia le mea ua manatu le tagata e ao ina faia, e tusa ai o lona tautiga i le a’oa’oina o nei tomai fa’apitoa.

 

“Ia outou o atu ma fa’aaoga! Aua le fa’atalale i lau taleni ua e maua nei, afai e te galue i ai, e mautinoa e te va’ai i le fua lelei o lau taumafaiga. Ua aoga fo’i ia te oe lenei masaniga ma le sailiga tomai sa tatou nopia’i ai iinei,” o se tala lea a le faletua o Malia Lui, lea sa aoa’oina le Kuka ma le tui teu fugala’au.

 

Na tula’i le ali’i o Tou  Collins ma tima’i i lana vasega Elei. “E lima lelei tomai ua maea a’oa’oina ai outou, ua ou iloa lelei lava ua outou agavaa ai mo le fa’atautaiga fo’i o ni a outou pisinisi laiti. Aua le fefe e la’a i luma, aua afai e le laa i luma, o lona uiga ua la’a i tua ma e le o se mea lelei la lea, aua ua ou iloa lelei, na outou saili malo ona o le fia maua o tomai fa’apenei e fa’aaoga tatau ai outou taimi, saili le tamaoaiga tausi o aiga, ma ia iloa lava fo’i e oe ia ona gaosia au ie elei mo lou aiga.”

 

O tomai nei e lima e aofia ai le tusi le mamanu Elei, tipi le pepa o le mamanu ina ia mafai ona fai le Elei, lolomi pe vali le Elei ma le Tie dye. Na una’ia malosi e Collins lana vasega ina ia fa’atutu loa ni latou pisinisi laiti aua e maua fo’i se fesoasoani mai i le Matagaluega e taumafai ai ona fa’apasia latou laisene mo pisinisi laiti.

 

O le vasega lea sa tutula’i lona sui sa fa’au’u mai ai, o se tasi o faiaoga o le Kolisi Tu’ufa’atasi, ma ia talosaga i le matagaluega ina ia fa’atautaia fo’i se kosi e fa’aautu i le fa’atula’ia o ni pisinisi po’o le fa’atautaiga o pisinisi laiti, i tomai e mo’omia mo so’o se tasi e fia fa’atuina sana pisinisi. O le tina na talosaga o Fiatagata Maloa Johnson, ma tolu kosi sa ia tau’avea e aofia ai ma le Kuka, faatasi ma le Tui Teu Fugala’au.

 

O i latou na taua’aoina latou tusi pasi i nei kosi e aofia ai: Kosi o le Kuka: David McMoore, Emma Paleafei Faiva; Fanuatanu Sa’ako; Fiatagata Maloa LA Johnson; Ianeta Fofoga Misi; Luaao Puleunutoa; Mana Fa’avale; Mareta Smith; Maria Sofia Malosi; Moeitafa Aumua; Opetela Tautalafua; Rosalina Umebayashi; Seupepe Seau; Shirley Muliva’a; Siapo Mua Satoa; Siliva Seuseu; Uini Mulitauaopele ma Veronica La Fulu.

 

Kosi o le Tui Teu Fugala’au: David McMoore; Elena Davila; Emy Tua; Fanuatanu Sa’ako; Fiatagata Maloa LA Johnson; Luaao Puleunutoa; Luaipou Fiamate; Mareta Smith; Maria Sofia Malosi; Opetela Tautalafua; Pa’i Matila; Rosalina Umebayashi; Seupepe Seau ma Tupito Fa’alava’au.

 

Kosi Elei/ Tie Dye: Della Fia Fuimaono; Fetu Maua’i; Fiatagata Maloa LA Johnson; Hollies Pepe Tuiolosega; James Atafua; Leith Taniela Aniseko; Malta Sa’u; Maria Sofia Malosi; Marieta Manase; Nuusina Eisara Alo; Opetela Tautalafua.

 

Kosi Komipiuta #5 Tina Talavou: Joyce Tupua; Lusia S. Toolepai; Palagi V. Sooalo; Saini T. Vito ma Saito Tiamagiagi.