Ads by Google Ads by Google

Fa’atupulaia pea solitulafono e a’afia ai le ‘ava malosi i le atunu’u


[ata: archive]
ausage@samoanews.com

Ua maitauina pea i fa’amaumauga a le Fa’amasinoga i aso ta’itasi, o le tele o mataupu tau solitulafono eseese o lo o tofu atu i luma o le fa’amasinoga mo le fa’atulagaina o iloiloga, o lo o a’afia ai lava tulaga o le ‘ava malosi, ma o se tulaga lea ua molimauina ai le atugalu o le Fa’amasinoga i le faigata lea ona foia o lenei fa’afitauli.

 

O le toe taofia ai e Leoleo o se Tama matua mai Vatia i le vaiaso nei ona o tu’uaiga i lona ‘ona ma fa’atino gaioiga e save’u ai le nonofo filemu o tagata, na taua ai e le afioga i le Tama’ita’i Fa’amasino ia Gwen Tauiliili-Langkilde le tatau lea ona i ai se auala e taofia ai le fa’afitauli o le ‘ava malosi o lo o feagai mai lenei Tama.

 

O le susuga a Fasia Fetuao, o se tasi lea o ali’i e to’afa i ai ali’i na taofia mai e Leoleo i le fa’aiuga o le vaiaso na te’a nei, ma maua ai le avanoa e tutula’i i luma o le fa’amasino fa’aitumalo i le taeao ananafi, ma latou teena ai tuuaiga eseese fa’asaga ia te i latou.

 

A o finau loia a itu e lua i le fa’amasinoga mo le fa’atulagaina o se vaega tupe e tatala ai le ua molia i tua, na fa’ailoa e Tauiliili-Langkilde e fa’apea, o lo o manino i fa’amaumauga a le fa’amasinoga le amata a’afia ai o Fetuao i le tulafono aemaise ai le fa’afitauli o le ‘ava malosi i le tausaga e 2001 seia oo mai lava i le taimi nei.

 

E talitonu le Samoa News, toeititi lava o taimi uma e taofia ai e Leoleo ia Fetuao ma tu’uaia i solitulafono eseese, e a’afia ai lava tulaga o le ‘ava malosi, ma o se tasi o tuutuuga e masani ona tu’uina atu e le fa’amasinoga fa’aitumalo ia te ia i taimi e lau ai ana fa’asalaga, o le faasa lea ona ia toe tagofia le ‘ava malosi.

 

O Fetuao na taofia mai e Leoleo i le aoauli o le aso Toona’i na te’a nei, Tesema 10 mai lona aiga i Vatia, ina ua talosagaina e ni isi o lona aiga se fesoasoani a Leoleo e fa’afilemu ai le ua molia mai le pisapisao ma laulauvavale a’o ‘ona o ia.

 

Na fa’ailoa e molimau i Leoleo e fa’apea, na amata mai lava i le taeao le inuga a Fetuao seia oo mai lava i le taimi na amata ai loa ona le mafai ona taofiofi lona ‘ona ma le lafo o upu mataga a o fa’afofoga aiga tuaoi ma lana fanau.

 

A o taumafai Leoleo e ave Fetuao i totonu o le ta’avale, sa alaga leotele le ua molia ma fai i Leoleo, o le loto leaga o lona aiga ia te ia ma lana fanau ua mafua ai ona latou viliina Leoleo, o ia fo’i e le fefe e fasi soo se tagata.

 

Na ta’u ta’ita’i e Leoleo ia Fetuao ina ua taunu’u le ta’avale i le ofisa o Leoleo i Fagatogo, e mafua mai i le ova o lona ‘ona, ma ua tau le mafai fo’i ona tautala i taimi e tali mai ai i fesili a Leoleo.

 

O isi ali’i e to’atolu na taofia e Leoleo i le fa’aiuga o le vaiaso na te’a nei, e aofia ai le ali’i o Sione Satini, Valu Aukusitino, ma le ali’i lea o lo o tu’uaia i lona fasiga o lona to’alua ao tumu ai tagata faigaluega a se tasi o Kamupani i’a i le aso To’ona’i na te’a nei.

 

I faamaumauga a le fa’amasinoga o lo o taua ai e fa’apea, o le aoauli o le aso Toona’i na te’a nei na logo ai e ni molimau le Ofisa o Leoleo i Fagatogo mo se fesoasoani, e uiga i se ali’i sa ia fa’ao’olima i lona to’alua ma manu’a tigaina ai le fafine i le malae o le Su’iga’ula a le Atuvasa i Utulei.

 

Na taunu’u Leooleo na latou vaaia ai le fafine na a’afia o lo o tagi mai i le isi itu o le malae, o lea na latou aga’i atu ai loa e fia talanoa ia te ia, peita’i na fa’afuase’i ona alu atu i ai ma se ali’i, lea na iloa mulimuli ane, o ia lea o le to’alua o le tama’ita’i na a’afia.

 

Na taua e le ali’i lea i Leoleo e fa’apea, talu ai o lo o faia se mafutaga fa’alilolilo a lona to’alua ma se tasi o ali’i la te faigaluega fa’atasi i le kamupani, o le mafua’aga lea o lona fa’ao’olima ia te ia. O manu’a na a’afia ai le fafine na a’afia e aofia ai se ta’e i le pito i luga o lona mata agavale.

 

Na teena e le ua molia le moliaga o le fa’aoolima i le tulaga tolu fa’asaga ia te ia, ma ua tatalaina nei o ia i tua e aunoa ma se tupe na totogi e fa’atali ai le aso 10 Ianuari lea ua fa’atulaga e toe valaau ai lana mataupu.

 

A o tatala ai o ia i tua mai le toese i Tafuna, ua fa’asa e le fa’amasinoga ona ia toe taumafai e fa’afeso’ota’i lona to’alua, pe toe alu fo’i i le fale o lo o nonofo ai lona to’alua ma le la fanau e to’alua, a ia saili se isi  nofoaga e nofo ai e fa’atalitali ai taualumaga o lana mataupu.

 

O isi ali’i e to’alua na taofia e Leoleo i Leoleo i le fa’aiuga o le vaiaso e aofia ai Satini ma Aukusitino.

 

O Satini na taofia mai e Leoleo i le malae tapolo i Iliili ina ua ‘ona ma fa’aumuumu, sosoo ai ma lona lafo o upu mataga e ono save’u ai le nonofo filemu o tagata lautele. O le aso 10 Ianuari lea ua faatulaga e toe tula’i ai Satini i luma o le fa’amasinoga, i le mae’a ai lea o lona teena o le moliaga o le fa’atupu vevesi i nofoaga faitele lea ua molia ai o ia e le malo.

 

O le ali’i o Aukusitino na taofia mai e Leoleo i Leone i le aso Toona’i na te’a nei, ina ua ‘ona ma alu ma se agaese i le fale sa faia ai se mafutaga a se aiga, ae ina ua taumafai tagata o le aiga na a’afia atoa ai ma lona Tama e taofi ma fa’afilemu le ua molia, sa atili ai ona vevela amioaga a le ali’i ‘ona ma ia ta lu’iina ai tagata sa i ai e o atu latou te fufusu.

 

I le mae’a ai o lana iloiloga i le taeao ananafi lea na ia teena ai moliagaa o le faatupu vevesi i nofoaga faitele atoa ai ma le soli fua o le fanua o le isi aiga (tresspass), na teena ai loa e le fa’amasinoga le talosaga ina ia tatala Aukusitino i tua, ae na fa’atulaga e le afioga i le Tama’ita’i Fa’amasino ia Tauiliili-Langkilde le tupe e $500 e totogi ona fa’atoa tatala lea o le ua molia i tua e fa’atali ai le aso 10 Ianuari lea ua fa’atulaga e toe valaau ai lana mataupu.