Ads by Google Ads by Google

Fa’atupulaia aofa’i tagata ua a’afia siama fa’ama’i o le ‘zika virus’


Pulesili o le Falema’i a le malo, le LBJ i Fagaalu, tofa Taufete’e John Faumuina. [ata AF]
ausage@samoanews.com

O le Fonotaga lona Lua a le Vaega o loo galulue i le puipuia o le Soifua Maloloina i Amerika Samoa, lea o lo o fa’agasolo i le Fale Laumei a le malo i Utulei i le fa’aiuga o le vaiaso nei, ua manino mai ai i fa’amaumauga sa mafai ona latou fa’alauiloaina, le fa’atupulaia pea lea o le aofa’i o i latou o lo o a’afia i siama o le gasegase pipisi o le zika virus o lo o feavea’iina e namu, i vaega eseese o le Iunaite Setete e aofia ai ona setete ma teritori.

 

Na taua e le Pulesili o le Falema’i i Faga’alu, le LBJ, tofa Taufete’e John Faumuina i lana saunoaga autu na tatala aloaia ai lenei fonotaga e fa’apea, e tusa ma le to’a 19,777 le aofa’i o i latou ua masalomia le a’afia i le gasegase o le zika virus i totonu o setete e 50 o le Iunaite Setete, ma o lo o fa’amaumauina pea le fa’aopoopo pea i luga o le aofa’i o lo o fa’amaonia le a’afia i aso ta’itasi i siama o lenei fa’ama’i.

 

Ae mo fa’amaumauga ia i latou ua fa’amaonia le a’afia, e tusa ma le to’a 4,016 le aofa’i o tagata ua a’afia i le zika virus i totonu o setete uma o le Iunaite Setete, ae to’a 27,314 le aofa’i o i latou ua masalomia le a’afia i totonu o teritori e 3 o le Iunaite Setete e aofia ai ma Amerika Samoa.

 

“O nei fa’amaumauga uma ua momoli mai ai se fa’ailoilo i le atunuu, o lo o tupu pea i luga le aofa’i o tagata o lo o a’afia i le siama o le zika virus, ma ua o o i le taimi ua tatau ai ona tatou galulue fa’atasi e saili se auala e fofo ai lenei fa’afitauli”, o le saunoaga lea a Taufete’e.

 

O fa’amaumauga mai le Vaega o Puipuiga o Fa’ama’i pipisi i le Iunaite Setete (CDC) sa mafai ona fa’alauiloa i le taimi o lenei fonotaga, na manino mai ai le tele o mafu’aaga eseese e ala ai ona pipisi atu le siama o le zika virus i le to’atele o tagata.

 

O ni isi o mafua’aga e mafua mai lea i siama o lo o feavea’i e namu o lo o latou feave’aiina ‘auga o le fa’ama’i, ae o isi mafua’aga e mafua mai i feusuaiga i le va o tagata e to’alua e aofia ai ma ulugali’i, ma mafua ai loa ona sosolo atu i alatoto ma a’afia ai le isi tagata.

 

Talu mai le aso 13 Oketopa 2016 e pei ona taua i fa’amaumauga a le CDC, e tusa ma le to’a 899 le aofa’i o tina ma’itaga i totonu setete e 50 a le Iunaite Setete ua fa’amaonia le a’afia i siama o le zika virus, ae to’a 1,927 tina ma’itaga mai teritori e 3 e aofia ai ma Amerika Samoa ua fa’amaonia le a’afia i ‘auga o lenei fa’ama’i.

 

Mo tina ma’itaga i totonu o le Iunaite Setete ua fa’amaonia le a’afia, o le to’a 23 o pepe ua fananau mai i tina o lo o a’afia i le siama o le zika virus ua a’afia a latou pepe i a’afiaga tumau, ae o le to’a 5 o tina ma’itaga na mafai ona toe fafano a latou ma’itaga.

 

I teritori e 3 a le Iunaite Setete, o Puerto Rico le teritori o lo o pito to’atele le aofa’i o tagata ua fa’amaonia le a’afia i le zika virus, i le aofa’i e silia i le 26,700, o le US Virgin Islands e 469, ma Amerika Samoa e na o le to’a 47.

 

I fa’amaumauga a le CDC o lo o taua ai, o le to’a 7 o i latou o lo o a’afia i le zika virus i Amerika Samoa, e mafua mai i tulaga o faigamalaga mai isi atunu’u.

 

Na taua e Taufete’e i lana saunoaga e fa’apea, o ripoti ua mafai ona fa’asalalau e le CDC e faatatau i le fa’ama’i o le zika virus, ua atagia mai ai le tele o a’afiaga e ono aafia ai le tagata pe afai ae maua ai o ia i ‘auga o lenei fa’ama’i, e pei o le a’afia ai i le fa’ama’i o le mafaufau, aemaise ai o le pagatia ai o tina ma’itaga, ma ua moomia ai le tatau lea ona galulue tagata uma e saili se fofo o lenei fa’ama’i.

 

“Ua manino i ripoti le tele o le lu’itau ua fetaia’i nei ma Amerika Samoa ona o lenei fa’ama’i mata’utia, e le na o le pau fo’i lea o le fa’ama’i o lo o mafai e namu ona feavea’i, ae o le fautuaga masani i le atunu’u, ia sili lava le puipuia nai lo le tau togafitiga, ma ia tausisi i ta’iala uma o lo o fa’alauiloa mai e foma’i e tatau ona faia ina ia mautinoa e puipuia ai le atunu’u atoa”, o le saunoaga lea a Taufete’e.

 

E ui o lo o maitauina pea le galulue malosi o Vaega uma o loo puipuia le Soifua Maloloina o le atunu’u e faia auala uma ina ia foia ai lenei fa’afitauli, peita’i na taua e Taufete’e le tele o lu’itau o lo o fetaia’i ma vaega ia i le taumafai lea e saili ni auala e fa’atino ai la latou galuega.

 

“E tele naua lu’itau o lo o fetaia’i ma le malo, le atunu’u atoa ai ma le falema’i faapea le soifua maloloina i le taimi nei, o ni isi o ia lu’itau e aofia ai le le lava o tupe ma mea faigaluega e fa’atino ai auaunaga mo le puipuiina o le atunu’u mai fa’ama’i eseese, e le o lava ni tupe e avatu ai a tatou fanau e a’oa’oina i auala eseese e mafai ai ona puipuia o tatou tagata, e le o lava fo’i tupe e fa’a faigaluega ai ni foma’i faapitoa e gafa ma le faia o togafitiga, po o tagata faigaluega fo’i e fesoasoani i foma’i i le fa’atinoina o le galuega o le fesoasoani atu, ae ui i nei mau lu’itau, o le agaga atoa lava i le falema’i i Faga’alu ma le Soifua Maloloina, ia mafai ona silafia e le atunu’u le taua o le ola puipuia leleni mai le a’afia i gasegase matuia”, o le saunoaga lea a Taufete’e.

 

Na taua e ni isi o foma’i o lo o galulue i le tu’uina mai o faamatalaga mo puipuiga o le zika virus e pei o le susuga ia Emily Piercefield, o se tama’ita’i foma’i mai Amerika, e taua tele le tatau lea i tagatanu’u o Amerika Samoa ona malamalama i a’afiaga o le zika virus, atoa ai ma auala e mafai ai ona puipuia i latou.

 

“O le taua o puipuiga mo lenei fa’ama’i, ina ia afai ai ona fa’asao mai le atunu’u mai le ono o o atu i se isi tulaga e sili ona pagatia mai siama o le zika virus, e pei o le a’afia atu ai lea o le tagata i le gasegase o le mafaufau, atoa ai ma le a’afia atu ai ma tina ma’itaga, ma i’u ina fa’aletonu atu ai ma a latou pepe”, o le saunoaga lea a Piercefield i le Samoa News.

 

Sa ia taua fo’i e fa’apea, e le na o le zika virus lea o lo o feavea’i e namu, ae o lo o aofia atu ai ma isi gasegase e pei fo’i o le denger fever, o le mafua’aga lea e tatau ai ona silafia e le atunu’u auala uma lava e mafai ai ona puipuia le sosolo atu o le siama o lo o feavea’i e namu, aua o isi taimi e le iloa ai o lo o feavea’i fa’atasi lava e le namu siama o le zika virus ma le denger fever, ae mafai ona foia ia fa’afitauli pe afai e lelei ona faia auala e puipuia ai le atunu’u mai le a’afia i lenei fa’ama’i le alofa.