Ads by Google Ads by Google

Fa’atulaga lafoga 2% mai totogi fa’amaninio fonotaga kapineta


[ata: archive]
ausage@samoanews.com

Ua toe fa’atulaga e le Matagaluega o Tagata Faigaluega a le malo se suiga i le polokalame o loo tipi mai ai le lafoga e 2% mai totogi o tagata faigaluega uma a le malo, ina ia foia ai le fa’afitauli lea na tula’i mai i le piriota totogi a le malo ua mavae atu, ina ua to’atele tagata faigaluega e lei mafai ona tipiina ese mai lea lafoga mai a latou totogi, e pei ona fa’amaonia e le Fa’atonusili i luma o le Fono a le Kapeneta i le vaiaso nei.

 

Na fa’amanino e le faletua ia Eseneiaso J. Liu i luma o le Kapeneta a le kovana e fa’apea, talu ai le polokalame fou lea ua fa’aaoga e le malo e fa’agaioi ai totogi o tagata faigaluega (system), o le mafua’aga tonu lea na ala ai ona tipi le lafoga o totogi e 2% a isi tagata faigaluega ae misi le tipiina o lafoga a isi tagata faigaluega.

 

“E talitonu le matagaluega e le o se tulaga lelei lea mo le fa’atinoina o la matou pito laau, ae o lea ua matou galulue e fa’amautu fa’amaumauga o loo mana’omia ina ia oo atu i le isi piriota totogi a le malo ua mae’a ona toe fa’aleleia lea tulaga, ma o i latou uma e lei tipiina a latou lafoga e 2% i le piriota totogi a le malo ua mavae atu, o le a latou vaaia i a latou siaki le suiga e pei ona fuafuaina, ae mo i latou sa tipi a latou lafoga e 2% mai a latou siaki, latou te le vaaia se suiga i a latou siaki i le piriota totogi o loo lumana’i nei”, o le saunoaga lea a Liu i luma o le Kapeneta e tau fa’amalamalama ai le tusi lea sa ia tauaao atu i Faatonusili o Matagaluega ma Ofisa uma a le malo e uiga i lenei mataupu.

 

E pei ona taua e Liu i le tusi sa tu’uina atu i i le vaiaso na te’a nei e fa’apea, o le taumafai ina ia siitia auala e fa’aleleia atili ai galuega a le matagaluega ma le malo, ua suia ai le polokalame ua fa’aaoga e lona Ofisa e fa’atulaga ai totogi o tagata faigaluega, e pei ona suia mai i le polokalame tusi o le “IFAS 7.7 management system” e aga’i atu i le “ONESolution”.

 

“I le taumafai ai e faia suiga e pei ona taua, ua matou molimauina ai tulaga le lelei i le tipiina mai o le lafoga e 2% mai ni isi o tagata faigaluega a le malo, ma e fia fa’ailoa atu, o le isi piriota totogi o loo loma nei o le a mafai ai ona fa’ailoaina atu suiga mo lafoga e le’i tipiina mai i le piriota totogi ua mavae atu”, o se vaega lea o le tusi a Liu i ta’ita’i o Ofisa eseese a le malo.

 

Na fa’afetaia e le afioga i le ali’i kovana taumafaiga e pei ona faia e le Ofisa o Tagata Faigaluega, lea ua mafai ai ona si’itia auaunaga ma tautua fou mo le fa’aleleia o auala e fa’a faigofie ai le fa’atinoina o galuega a le malo, aemaise ai fo’i le galulue e fa’amautu tulaga uma e pei ona fesiligia.

 

I le tulaga o le lafoga e 2% e pei ona fesiligia, na taua e le ali’i kovana le taua tele o lenei fuafuaga, lea o loo mafai ai ona maua le fesoasoani mo le falema’i a le atunu’u.

 

E pei ona silafia, o le tulafono o le lafoga o totogi e 2% e pei ona taua, na pasia mai i le nofoaiga a Togiola ma Faoa i le 2012 ma le fa’amoemoe e totogi ai le aitalafu e $3 miliona a le falema’i o le LBJ sa maua mai i le Teugatupe o Taui o Fa’alavelave Fa’afuase’i, ma le fa’amoemoe a mae’a ona totogi le nonogatupe, ona tuuina atu loa lea o lenei vaega tupe e fesoasoani ai i le fa’atupeina o le tautua a le Falema’i.