Ads by Google Ads by Google

Fa’atonu o galuega fa’atausima’i alo o Amerika Samoa i le PSA Health Care


Le tamaitai ia Lorna Pula [ata foai]

PSA HEALTH CARE - FA’ATONU GALUEGA FA’A-TAUSIMA’I

 

I le aso e fa’aalia ai ituaiga avanoa faigaluega eseese mo le Vasega o Fitafita Tuai ae maise fanau a’oga fa’au’u mai a’oga maualuluga, kolisi ma iunivesite i Tacoma, Washington na tula’i ai le tama’ita’i Samoa e maua lona fa’ailoga BScience i le Health Care ma lona Masters i le Human Resource Management, Lorena Pula ma lana aufaigaluega i le PSA Health Care.

 

“Ua maua lenei avanoa lelei e fa’ailoa atu ai, o lo’o mana’omia tele lenei ituaiga o tagata faigaluega i le matou polokalama i Uosigitone nei, e le tau toe faia nisi galuega se tele i ou tusi pasi o le a o’o mai ma oe, ae o le a fa’aaogaina lava. Ua i ai fo’i se fesoasoani e mafai ona ofoina atu mo oe e le matou polokalama e fa’afaigofie ai ona soso’o le soifua faigaluega i Amerika Samoa ma Samoa Tuto’atasi foi, ma le faigaluega ai i lenei setete,” o le tala lea a Pula.

 

Ua tu’uina mai lana so’otaga e ala i le Upega Tafa’ilagi po’o Emeli ina ia lelei so’otaga amata e aiaia ai le faigaluega i Uosigitone o se tama’ita’i Tausima’i Pasi. lpula@psahealthcare.com ma le telefoni 1-253-912-4862

 

“Ou te manatu e tatau lava ona ou aoga atu i nisi o alo o le atunu’u o lo’o mana’omia se fesoasoani. Ou te naunau lava ina ia to’atele ni tatou alo mai Samoa e tulimata’ia avanoa faigaluega i lenei fo’i vaega o le tautua lautele i Uosigitone,” o se tala lea a Pula.

 

O ia ua to’a fa si a la fanau ma MSgt Ira Va’atausili Pula: Ivan, Ira Jr., Annabella ma Mamaluolefaletolu. Ia te ia, o lona lea vala’auina, o le tautua mai e ala i le tausiga fa’apitoa o gasegase o le atunuu, ma filifili tagata agava’a ma le alolofa e fa’atinoa lea galuega lelei.

 

O Pula o se tasi o alo o Amerika Samoa mai Nuuuli. Ma o ona matua o Soosemea ma Mamalu Moliga Savusa. Na fa’auu Pula i Samoana High School i le 1996. Ona tautua lea i le militeri ma avea ma Operating Room Technologist i le Tripler Medical Center mo le 4 tausaga. I le tausaga 2007 na vala’auina ai lona to’alua e tautua mai le tafa o taua i Iraki mo le 15 masina ma ia faia ai lana filifiliga e toe taliu mai i Amerika Samoa, ma toe fa’aauau lana a’oga i le ASCC.

 

Ina ua mae’a lana a’oa’oga lea i le Helath Care na amatalia atu i le ASCC, na amata loa lea o lana tautua i le PSA Health Care ma sa amata mai lava i lona avea ma Staffing Coordinator, se’ia oo ina fa’amanuiaina i le Fa’atonu Tagata Faigaluega i le itu o lo’o fa’amautu ai lea Ofisa i Uosigitone.