O le aso Faraile o le vaiaso nei, Mati 30, ua poloaina ai e le Vaega Iloilo o le Fa’amasionga Maualuga le susuga i le alii Faifeau ia Rev. Amaama Tofaeono ma lona aiga, ia o o atu i ai ua latou tuua le maota o le Ekalesia Faapotopotoga Kerisiano i Amerika Samoa (EFKAS) o lo o latou nofoia i le taimi nei.

O le maota o le Ekalesia o lo o nofoia e Rev. Amaama ma lona aiga, talu mai le taimi na filifilia ai o ia i le Fono Tele a le Ekalesia ia Iulai 2016 e avea ma Failautusi Aoao o le Ekalesia mo le umi e 4 tausaga.

O lea fa’aiuga mai le afioga i le ali’i Fa’amasino ia Elvis P. Patea, na tu’uina atu lea i se iloiloga faapitoa sa faia i le vaiaso na te’a nei, i le mataupu i le va o le EFKAS ma Rev. Amaama.

E pei ona taua e le Fa’amasinoga i lana fa’aiuga, e 10 aso lea ua tuuina atu ia Rev. Amaama e tapena ese ai ma lona aiga. O le aso Faraile o le vaiaso nei, o a taeao lea e atoa i ai le 10 aso e pei ona taua i le poloaiga a le Fa’amasinoga.

Na fa’ailoa e Patea ia Rev. Amaama, afai e mae’a aso e 10 ae o lo o i ai pea lava i le maota o le Ekalesia, o le a auina atu loa le Masela o le Fa’amasinoga poo se Leoleo e aveese o ia ma lona aiga.

O le tama’ita’i loia ia Gwen Tauiliili-Langkilde o lo o tula’i mo le itu a le Ekalesia, ae o le susuga Charles Alailima o lo o tula’i mo Rev. Amaama.

I le taimi o le iloiloga i le vaiaso na te’a nei, na talosaga ai Alailima i le fa’amasinoga mo se avanoa e fa’atuatuai ai lana faaiuga e fa’atula’i ese ai Rev. Amaama mai le maota o le Ekalesia, se’i fa’atali se faaiuga a le Laulau Fono a le Fono Tele e tusa ai o le tusi fa’amavae a Rev. Amaama lea ua tu’uina atu i ai.

Na finau Tauiliili-Langkilde i le fa’amasinoga ina ia teena le talosaga a le itu tete’e, ae tuuina mai loa sana poloaiga e fa’atonu ai Rev. Amaama e tula’i ese ma le maota o le Ekalesia.

E silia laititi ma le 15 minute o iloilo e ali’i Fa’amasino la latou fa’aiuga, ma tuuina mai ai loa le faaiuga e teena ai le talosaga a Rev. Amaama, ae poloaina loa o ia ina ia tula’i ese ma le maota o le Ekalesia.

Ina ua fesiligia Alailima i sona finagalo e uigai lenei mataupu, na taua ai e le ali’i loia e faapea, sa poloaina e le fa’amasinoga ia Rev. Amaama na te totogi le tupe e $35,000 pe afai e fia nofo pea i le maota o le Ekalesia, e fa’atali ai se fa’aiuga o lana talosaga apili o lo o i luma o le Fa’amasinoga.

Saunoa Alailima, talu ai e le maua e Rev. Amaama se vaega tupe tele faapea, ua ia manatu ai loa e tula’i ese mai le maota o le Ekalesia. Na taua atili fo’i e Alailima le taumafai o Rev. Amaama e saili se auala e toe faia ai se leleiga ma le Komiti a le Au Toeaiina, peita’i sa lei manuia lea taumafaiga.

Na taua e Rev. Amaama i le Samoa News lona fesiligia o le faaiuga a le Fa’amasinoga ua tuuina mai, e tusa ai o le mataupu i le va o ia ma le Ekalesia. I lona talitonuga, sa manino le fa’aiuga muamua sa tuuina mai e le Fa’amasinoga, e i ai mataupu e patino lava i le Ekalesia, e i ai fo’i mataupu e ‘au i ai le malosi o le Fa’amasinoga.

I lona talitonuga, o le mataupu i le va o ia ma le Komiti a le Au Toeaiina, o le mataupu lea e patino lava i le Ekalesia, e le ‘au i ai le malosi o le Fa’amasinoga.

Sa ia taua fo’i lona finagalo fa’anoanoa i le tulaga ua aga’i i ai le mataupu a le Ekalesia, ma lona taumafai malosi e saili se auala e foia ai lenei mataupu i auala fa’a Kerisiano, peita’i e foliga mai o lo o fa’auliulito pea lava le finagalo o le Ta’ita’ifono o le Komiti a le Au Toeaiina.

“I lo’u lagona i lenei mataupu, o lea ua toe oo mai fo’i i le vaitau lenei na fa’asatauro ai Iesu, ae le o i ai lava se tofa fa’a le Atua i le Komiti a le Au Toeaiina e mafai ai ona maua sa matou feiloaiga e foia ai lenei fa’afitauli. E leai ma se tuuaiga sa latou faia ia te a’u o fa’amaonia, a o lenei ua oo ai lava ina fa’atula’i ese a’u ma lo’u aiga e aunoa ma se mea sese sa ou faia”, o le saunoaga lea a Rev. Amaama.

“Saunoa Iesu, o se tasi e au pito itiiti o o’u uso nei ua outou faia i ai, o A’u lava lea (Iesu). E maua pea le lototele e onosa’i ai ma tatalo i le Atua, ina ia fa’aalia le mea moni ma ia foa’i i Ta’ita’i o le Ekalesia le alofa fa’a le lagi e faia ai fa’aiuga e manuia ai le Ekalesia”.

O le mataupu i le va o le Ekalesia EFKAS ma Rev. Amaama, na tofu atu i le fa’amasinoga ina ua talosagaina e le Komiti a le Au Toeaiina se poloaiga a le fa’amasinoga talu mai le masina o Mati 2017, e fa’atula’i ese ai Rev. Amaama ma lona aiga mai le maota o le Ekalesia.

O lea fa’aiuga na faia e le Au Toeaiina ina ua mae’a ona latou fa’amalolo le tofi Faifeau Fa’auu o Rev. Amaama mo le 3 tausaga, ona o tu’uaiga i lona le ausia o le tapula’a maualuga a le Ekalesia.

Talu ai o le tofi o le Failautusi Aoao e tatau ona umia e se tasi e i ai le tofi o le Faifeau Fa’au’uina, o le mafu’aaga lena na faia ai loa ma le fa’aiuga a le Komiti a le Au Toeaiina e aveese le tofi o le Failautusi Aoao mai ia Rev. Amaama.

O lo o fa’atali se fa’aiuga a le Vaega Apili e tusa ai o le talosaga apili a Rev. Amaama fa’asaga i le fa’aiuga a le Vaega Iloilo a le Fa’amasinoga.