O le taeao ananafi sa fa'atautaia ai le fonotaga po'o le Fa'atofala'iga a le DOH Tobacco Diabetes Coalition e so'ofa'atasi ai ma ana pa'aga fa'apitoa e aofia ai le World Health Organisation (WHO) ma le NCD, ina ia taumafai e toe vaaia toto'a tulafono ua mae'a fa'amalosia ai le taofia o le ulaula tapa'au, le fefa'atuaiga o sikaleti ma tapa'a i totonu o Amerika Samoa.

E le gata i lea ae ia toe taga'i toto'a fo'i i auala o lo'o ua i ai nei lea manulauti i totonu o atunu’u e lima o lo'o aofia fa'atasi i le lekeona i le vasa pasefika: Amerika Samoa, Samoa, Niue, Tokelau ma Palau.

O sui o le WHO sa auai mai e mataituina lenei fa'atofala'iga, e aofia ai Kolisi Viki mai Samoa, o ia o lo’o va'aia le lekeona lenei, fa'atasi ai ma le tama'ita'i o Ada Moadsiri o le Faia'oga fa'apitoa i lea matata a le WHO.

I le fonotaga sa mua'i tula'i le Fa'atonusili o le Matagaluega o le Soifua Maloloina, Motusa Tuileama Nua e fa'afetaia le pa'au mai o sui tofia e fa'asoa mai i lenei fa'atofala'iga, ae maise fo'i o sui na vala'au fa'apitoa e fa'afofogaina lenei fonotaga.

"O lenei le aga e faia e le tasi, ae le a'afia ai na'o ia, e a'afia lona aiga, ae maise o nisi o tagata lautele o lo'o latou manavaina le asu o le sikaleti. O lona uiga, ua e faia lea ala o fiafiaga fa'aletagata mo se lelei, ae ua faia ma lou mautinoa, o lo ua a'afia ai le ola maloloina o i latou uma o lo'o fa'atasi ma oe,” o se tasi lea o folasaga a Moadsiri.

Ona o lenei fa'atofala'iga e lua aso, o lona uiga, e o'o ane i le taimi e mae'a ai, ua maea aiaia se suiga, e ao ina fa'aulu o se maga o le tulafono o i ai nei ina ia aofia ai ma Sikaleti Eletorinisi [e-cigarette], fa'aofi ma nisi aiaiga e finagalo i ai lea vasega o sui mai matagaluega ta'itasi na latou aiaia le ulua'i tulafono o i ai nei, ia atili ona lelei le fa'amalosiga o le tulafono.

Na fa'afetaia e Motusa le auai mamao mai o sui  o le WHO/NCD i le fonotaga, aua a leai i latou, e le iloga ona va'ai toto'a le tatou atunu'u i ala fo'i o fa'amalosia ai lea mau i isi malo uma ua atuvasa faatasi ma i tatou.

O matagaluega sa auai o latou sui e aofia ai: Samoan Affairs, Ofisa Loia Sili, DOH, DHSS, DOC, DPS, ASTCA, ASPA, ASEPA, DOE, ma le Ofisa o le Kovana i lana Komiti Fa'apitoa e Va'ai Toto'a i le afaina o le atunu'u i Fuala'au Fa'asaina ma Vaila'au O'ona.

"E tatau ona iloa mai e le atunu'u atoa, le galuega tima'i o lo'o taumafaia nei. Ia le pogisa i latou, ae ia malamalama i le taua o le fa'atofalaiga lenei o taumafai i ai, ma suiga e tatau ona fa'aofi i le tulafono o i ai, ia fa'amalosia le tulafono ae ua aotelega mana'oga tupito, ia taofia le afaina o le lautele, pe afai e tagofia e se tasi le sikaleti e fa'amalie ai lona mana'o,” o se tautalaga lea a  Motusa.

Na toe fa'amanatu e Moadsiri i lana folasaga mea uma e ono afaina ai le sui e fiafia e ulaula. O ituaiga o siomaga e mo'omia ona soifua ai le tagata, ia soifua mama mai mea e a'afia ai lona soifua maloloina.

Na fesili o ia i le mamalu lautele, aisea e afua ai ona ulaula tapa'a tagata? Ua to'atele ua iloga mai e tali, "E mafua ona o se fia fa'alialia e mafai ona ia ulaula? Aua o se gaoioiga sa fa'asa mai ia te'i latou ao laiti e fa'ato'a faia pe a matua ma ua faigaluega ua maua le tupe e fa'atau ai? O nisi o se aga e va'ai lava o faia e lona tama ma lona tina po'o nisi o lona aiga e tele tupe, e ao ina faia fo'i e ia ona o se sikaili po'o se ola fa'aalialia!"

Ua tele fa'asalalauga e fa'ailoa atu ai le a'afiaga o le soifua pe afai e ulaula tapa'a, o lona uiga o se gaoioiga e fia ae matua leai se mea aoga e te maua ai, ae na'o pagatia lava e fofoa mai ai.

Na fa'aauau pea le folasaga ma iloga ai faia fo'i suesuega aoga mo le fanau talavou i a'oga, o lea suesuega e fa'atautaia lava e le DOE i le vasega o fanau i a'oga maualuluga, ma ua aofia ai ma le fanau amata mai le Level 6, 7 ma le 8 i a'oga tulaga muamua a le atunu'u.

E ta'i lua tausaga ma aotelega mai fa'aiuga o nei suesuega taua, ma ua iloga ai, ua amata ona fa'aitiitia le faitau aofai o fanau ua tagofia le sikaleti ae natia e le fa'ailoa i aiga ma faia'oga mai le vaitau lea e 2004 - 2011, peita'i mai le 2011 - 2013 ua toe va'aia ua toe si'i teisi i luga.

Mo le vasega o tagata matutua e tagofia le sikaleti, ua na'o le matagaluega o le Soifua Maloloina e faia suesuega, ma le matagaluega o le DHSS lea e fa'atautaia latou suesuega ma maua ai fa'amaumauga o fa'aaogaina.

E tusa ma le 40% o le faitau aofai o le atunu'u ua ulaula; 20% e fiafia e fa'ato'a ulaula pe a tafafao ma latou uo, ae 40% o totoe o i latou ua le fia ulaula tapa'a. Mai nei suesuega, e mafai ona fa'aaoga i le talosagaina o seleni e fa'atino ai ni galuega tima'i, po'o galuega e matua fa'aitiitia atili ai le ulaula tapa'a o le atunu'u.

I le afa mulimuli o le fa'atofala'iga, na saunoa ai, le sui loia sili ia Jedidiah Bigelow, o ia lea o lo'o nafa ma le Comsumer Law a le malo. Na ia e fa'amalamalama le tulafono ua mae'a fa'atulaga ma ua fa'amalosia fo'i, peita'i e i ai ona vaivaiga e mafai ai ona alofaga kamupani gaosi sikaleti o nisi ituaiga fou, e aofia ai le E-Cigarette ma le mafai ai ona aofia i le tulafono ua fa'amalosia.

Lona lua e le o mailoa tonu sui e fa'amalosia le tulafono lea, po'o leoleo a le DPS, po'o le DOH po'o le DHSS, e ao ina fa'aofi se maga i le tulafono o i ai, e agatonu sa'o i na vaega e lua. Ua toe iloilo toto'a i le tulafono lea ua i ai nei, e va'aia toto'a lona fa'aupuga ma fa'aofi i ai, ma ia toe pasia mai e le Fono Faitulafono mo le fa'amalosiga a'ia'i.

O le vaega fo'i lea na mapuna a'e ai ma isi a'afiaga o nisi o mea o lo'o auau i ai le taumafaiga atili e taofia le toe tagofia e tagata lautele o le sikaleti. E lelei ona fa'ataugata, ae aua nei fa'ataugofie ina ia mafai ona fa'atauina e le fanau talavou.  Peita'i a taugata, ua atili ai ona fa'ateleina le tupe e ao e le faipisinisi o laisene e fa'atau atu le tapa'a, ae leai se aoga tele i le tagata ulaula lea e naunau tele i le sikaleti.

Lua a fai e fa'ataugata, o le afuaga lea o le toe faatau ta'itasi o sikaleti laiti i le tau ua mafai ona fa'atau ai e le fanau talavou.

O lea fo'i vaega o le fetufa'iga, ua manino ai le mata o le vai, "E mafai lava ele au fai oloa a le atunu'u ona fa'ailoa mai e le lava le sikaleti, ona matua tasi'i ai lea o tau sikaleti, ae o lo'o lava le sapalai, ae taugata ai le tau o sikaleti, toe fa'amalosia atili ai ma le fa'atau ta'itasi e pei ona faia e le 'au faioloa Asia i nisi taimi, ma le fa'aitiitia ai le fa'aletonu ae ua fa'ateleina."

E leai fo'i se taofi a le Consumer a le Ofisa o le Loia Sili e fa'atonu ai faleoloa ua maualuga tele le tau o le sikaleti, e faitalia lava le faipisinisi i le tau o le tapa'a.