Ads by Google Ads by Google

Fa’ateia to’atele tagata lotu ina ua tofu Fa’amasinoga mataupu Ekalesia EFKAS


Se vaaiga i le maota o le Failautusi Aoao o le Ekalesia i lona nofoaga autu i Kanana Fou. [ata AF]
ausage@samoanews.com

Na taua e le to’atele o ni isi o tagata lotu a le Ekalesia Fa’apotopotoga Kerisiano i Amerika Samoa (EFKAS), le fa’ateia tele o i latou ina ua salalau i tusitusiga i le nusipepa le tofu atu o le mataupu a le Ekalesia i luma o le Fa’amasinoga Maualuga, ae sa tatau lava ona foia i le lotoifale o le Ekalesia ana lava mataupu.

 

“Sa le tatau lava ona oo le mataupu i luma o le Fa’amasinoga, ae sa tatau i Ta’ita’i o le Ekalesia ona taumafai i se isi auala e foia ai tulaga fa’aletonu sa alia’e mai, e fa’atali ai le Fonotele a le Ekalesia i le tausaga fou mo se fa’aiuga. Ae o le tofu atu ai o le mataupu i luma o le fa’amasinoga ma fa’atasina atu ai ma le igoa pele o le Ekalesia, o se tulaga lea ua matua fesiligia ai le ta’ita’iga o le Ekalesia”, o le saunoaga lea a se tasi o totino matua o le Ekalesia, o ia fo’i o se sui o le Komiti Galue a le Ekalesia.

 

“E le fa’atusatusaina mataupu fa’ale-Ekalesia ma mataupu o lo o vavao ai aiga, nu’u ma itumalo i tulaga o le sailiina o le pule i suafa matai, o fanua, po o isi lava fo’i mataupu e pei ona tatou vaaia i aso nei. O le Ekalesia a le Atua, e le tau sailia ai se pule pe tau tu’u atu i le fa’amasinoga e aumai ai se fa’aiuga. O lo o manino lava le Tusi Paia ma a’oa’oga a Iesu sa ia fa’ataoto. A iai se mea e leaga ai le va o oe ma lou uso, tu’u lau taulaga ae alu e fa’alelei ma lou uso. A mae’a, saili i le Atua e aumai ai le faamagaloga. Peitai o le tulaga e pei ona ou vaavaai atu i ai, ua atagia mai ai le leai o se ta’ita’iga a le Atua i ta’ita’i o le Ekalesia sa taulamua i le tu’uina atu o lenei auauna ma lona aiga i le Fa’amasinoga”.

 

O lagona su’ifefiloi mai ni isi o tagata lotu o le Ekalesia sa fa’aalia i le vaiaso na te’a nei e uiga i lenei mataupu, na mafua ai ona taumafai le Samoa News e saili se avanoa e feiloa’i ai ma le Sui Taitaifono o le Ekalesia ao fa’agasolo taualumaga o le fa’amasinoga i le vaiaso na te’a nei, susuga Rev. Elder. Fa’aeteete Saifoloi, peita’i na saunoa le sui ta’ita’ifono, e sili pe a talanoa i le Ta’ita’ifono.

 

Ae ina ua taumafai atu mo se avanoa i le Ta’ita’ifono o le Ekalesia, susuga Rev. Elder. Eveni Mamoe Jr, sa ia teena ai se avanoa fa’atasi ai ma lana saunoaga, “ou te le fia talanoa i se nusipepa”.

 

Na toe taumafai le Samoa News mo se isi avanoa i le taeao ananafi, ae na fa’aalia e le tama’ita’i sa ia taliina mai le telefoni i le Ofisa autu a le Ekalesia i Kanana Fou, “fa’amalie atu, fai mai le Ta’ita’ifono e le mana’o o ia e talanoa atu i le nusipepa”.

 

Na pau le itu sa fia maua i ai se saunoaga a Ta’ita’i o le Ekalesia, po o le a sa latou saunoaga e tusa ai o lagona fa’aalia mai tagata o aulotu, i latou ia o lo o tautuaina le Ekalesia i soo se vaega ma latou tausi fa’apelepele le ta’uleleia o le igoa o le Ekalesia.

 

Na taua e se tasi o Tina matua o le Ekalesia e fa’apea, afai ua filifili ta’ita’i o le Ekalesia e tu’u atu le mataupu i le fa’amasinoga, sa tatau lava la ona o na o le Ta’ita’ifono, sui Taitaifono ma le faifeau o lo o fa’asaga i ai le tagi, ae aua le aofia ai fua le igoa o le Ekalesia atoa.

 

“Ou te le malamalama pe fa’apefea ona fai mai, o le mataupu lenei i le va o le Ekalesia EFKAS ma le Failautusi Aoao, ae o le Failautusi Aoao ma lona aiga, o latou fo’i o totino o le Ekalesia. Ua foliga mai la ua fa’asagatau le Ekalesia i tagata lotu, ae o le Ekalesia e ola ai agaga o tagata lolotu ae le o le fasioti, o le Ekalesia fo’i e fa’avae ana fa’aiuga i aoaoga a le Tusi Paia, ae le fa’avaea i lagona fa’aletagata, o le loto fia taui ma sui, ma le loto le fa’amagalo”, o le saunoaga lea a se tasi o Tina matua o le Ekalesia.

 

Ae na taua e se tasi o Sui o le Komiti Galue a le Ekalesia e fa’apea, e le o tusa ma le Fa’avae o le Ekalesia le fa’aiuga a le Au Toeaiina ua faia, o le latou fa’amalolo lea o le Failautusi Aoao, ona e le mafai e le Au Toeaiina ona fa’amalolo le Failautusi, o le fa’aiuga lena e faia e le Ekalesia Aoao i le taimi o lana Fonotele.

 

E pei ona manino i le molimau a le Failautusi Aoao o lo o fa’aautu i ai le tagi a le Ekalesia, susuga Rev. Dr. Amaama Tofaeono i luma o le fa’amasinoga, e fa’a 4 ona ia talosaga I le latou Laulaufono o le Fono Tele a le Ekalesia mo se leleiga, ae kopi i le Laulaufono a le Fono a le Au Toeaiina, peita’i sa latou teena lava lana talosaga. 

 

I se fa’atalatalanoaga a le Samoa News ma Rev. Dr. Ama’amalele Tofaeono ma lona faletua, o Rev Dr Joan. A Tofaeono, sa la fa’aleoina ai lagona lava ia e tasi e pei ona manatu i ai ni isi o tagata lotu, i le puipui lea i le ta’uleleia o le igoa pele o le Ekalesia.

 

“O lea ua iu lava ina molia i laua i le fa’amasinoga, e aunoa ma se galuega a le Komiti o le Au Toeaina e teuteu le lotoifale o le Ofisa o le Fono Tele. Ma ua alia’e mai loa le sapasapaia e le Au Toeaina o le faaiuga na faia e le Laulaufono o le Fono Tele ia Mati 30, 2017, e aveese le Failautusi Aoao o le Ekalesia. O le itu manino, e le mafai e le Laulaufono a le Fonotele ona faate’a le Failautusi Aoao, ona o ia foi sa filifilia e le Fonotele, o lea foi sa faaali manino i le tusi na aumai e le Failautusi a le Au Toeaina, e le o se mataupu lenei mo le au toeaina, o le mataupu i le lotoifale lava o le ofisa o le Fono Tele”, o le saunoaga lea a Rev. Dr. Tofaeono.

 

Na taua e le faifeau ma lona faletua le fa’ateia o i laua ao malolo i lo la maota i le Aso Maliu na mavae atu nei, ina ua fa’afuase’i ona taunu’u atu le loia ia Lupe ma le Tusi Samania mai le fa’amasinoga. O lea tusi na poloaina ai i laua ina ia oo atu i le potu faamasino i le vaiaso na sosoo ai, ona ua molia i le tatau ona tula’i ese ma le maota o le Ekalesia. Na taua e Rev. Dr. Ama Tofaeono, “Na ma lagona le tiga ma le faanoanoa, ona ua le onosai sei maea le faamamaluina o le vaiaso paia, ona fai lea o ia tulaga e toeaina, o taitai lotu. Sa o ma ofo i le mafai e taitai o le lotu ona saunoa ma lauga i le Aso Faraile lelei i le maliu o Iesu, ae o lea foi ua latou fa’asatauro faatasi i maua ma Iesu i lena aso.  E fai o le faamanatuina o le sauaina o Iesu taitai o le Lotu Iutaia, ae o lea ua sauaina ai i maua toeaina taitai o le EFKAS e ala i le aveina o maua i le faamasinoga”.

 

Na faaopoopo e le faletua faifeau fomai, le tei ua itagia fua laua e le tele o tagata EFKAS ona ua latou tuuai ua o ma o ave le Ekalesia i le tulafono, ae le sao lea tuuaiga.

 

“O le tele o ma uo ua aloalo mamao, o isi ua na o le talanoa mai i le telefoni ma faamalie mai ua fefefe i iloa latou e le Au Toeaina ona afaina ai lea o latou galuega. E oo lava i nai faiaoga ma o latou aiga i le Kolisi Faafaifeau i Kanana Fou, faapea aoao ma latou faletua, ua faasa e le Peresitene ona talanoa mai se isi ia te i maua. Ua tei lava lea ua amusia, inosia ma tuulafoaiina ae leai so ma sese ma se mafua’aga tatau. Peitai o le oo mai o nei fa’afitauli ma lu’itau e tele, ua matuai o maua mautinoa ma molimauina ai le alofa o le Atua i lo ma aiga. Ua saga fa’amausali ai lo ma talitonuga, o loo soifua le Atua”, o le saunoaga lea a Rev Dr Joan Tofaeono i le Samoa News.